விழித்திரை அடையாளம்! - தென்கச்சி!

ஒரு ஆளை அடையாளம் கண்டுபிடிக்கணும்ன்னா அதுக்குச் சுலபமான வழி என்ன?

முகத்தைப் பார்த்துக் கண்டுபிடிக்கறதுதான்.

ஆனா மனுஷன் தப்பு பண்ண ஆரம்பிக்கும்போது அவனைக் கண்டுபிடிக்கறதுக்கு வேறே வழிகளைத் தான் கையாள வேண்டியிருக்கு!

கைரேகை அதுக்கு ரொம்ப உபயோகப்படுது.

கைரேகைகள் ஒருத்தருக்கு இருக்கிறது மாதிரி இன்னொருத்தருக்கு இருக்கிறதில்லே. பல்வரிசையும் அப்படித்தான்.

ஏமாத்தறவங்க அதிகமாப்போனா... இருக்கிறவங்க எச்சரிக்கையா இருக்க வேண்டியிருக்கு!

Bio Metrics அப்படிங்கறது ஒரு பெரிய தொழில்நுட்பம். இதை உபயோகப்படுத்தி சில பாதுகாப்பு உத்திகளையெல்லாம் உருவாக்கியிருக்காங்க அமெரிக்காவிலே!

வீட்டுக்குச் சொந்தக்காரர் குரல் கொடுத்தா கதவு திறக்கும். அல்லது அவரு கைவச்சா கதவு திறக்கும். மத்தவங்க யாரு என்ன பண்ணினாலும் கதவு திறக்காது. இது எப்படி?

அவரோட குரல் அல்லது கைரேகை ஒரு எலெக்ட்ரானிக் சாதனத்திலே ஏற்கனவே பதிவு பண்ணப்பட்டிருக்கும்.

இவரு குரல் கொடுக்கறப்போ அல்லது கையை வைக்கறப்போ அதை ஒப்பிட்டுப் பார்த்து சரியா இருந்தா கதவு திறந்துக்கற மாதிரி ஒரு ஏற்பாடு இது.

இதே மாதிரி ஒருத்தரோட விழித்திரையிலே உள்ள ரத்தக்குழாய் அமைப்பு பாருங்க... அதுகூட ஒருத்தருக்கு இருக்கிறமாதிரி இன்னொருத்தருக்கு இருக்கிறதில்லே! அதனாலே அதைவச்சி அடையாளம் கண்டுபிடிக்கக்கூடிய சாதனங்களும் இப்போ பழக்கத்துக்கு வந்தாச்சு!

கைரேகையை ஒப்பிடற சாதனத்தைவிட, விழித்திரை ரத்தக்குழாய் அமைப்பை அடையாளம் காணற சாதனம் இருக்கு பாருங்க... இது ரொம்ப நுட்பமானது... நம்பத் தகுந்தது. ஒரு ஆளை அடையாளம் காண இது எடுத்துக்கற நேரம் ஒரு வினாடிதான்!

ஒரு கருவி இருக்கும். அதுலே உள்ள ஒரு சிறு துளையிலே கண்ணைவச்சிப் பார்க்கணும். உடனே இந்த சாதனம் குறைந்த சக்தி உள்ள அகச்சிவப்பு ஒளியைப் பாய்ச்சி, அவரது விழித்திரையின் ரத்தக்குழாய் அமைப்பை ஆராஞ்சி... ஏற்கனவே அதன் நினைவுப் பெட்டகத்துலே பதிவு செய்யப்பட்டிருக்கிற அமைப்புகளோட ஒப்பிட்டுப் பார்த்து... சரியான ஆள்தானா இல்லையான்னு அடையாளம் காட்டிவிடும்!

குரலை வச்சி அடையாளம் கண்டுபிடிக்கறதும் Biometrics முறைகளிலே ஒண்ணு!

ஒரு நபரோட குரலை டிஜிட்டல் குறியீடுகளா மாத்தி பதிவு பண்ணிக்கிட்டு மீண்டும் அதே குரலை இனங்காணக்கூடிய, சாதனங்கள் ஏற்கனவே அமெரிக்காவுலே விற்பனைக்கு வந்தாச்சு.

ஒரு ஆளுக்கு ஜலதோஷம் பிடிச்சிருந்தாக்கூட அந்த சாதனம் சரியாகவே கண்டுபிடிச்சுடுதாம்.

குரலை மாத்தி பேசறவங்ககூட இந்தக் கருவியை ஏமாத்த முடியாது! இதை ஆஸ்பத்திரிகள், வங்கிகளிலே உள்ள இரும்புப்பெட்டகக் காப்பறைகள் - இங்கேயெல்லாம் உபயோகப்படுத்தலாம். குழந்தைகள் உள்ள இடங்களுக்கு இது ரொம்ப உபயோகப்படும். கதவு பூட்டிக்கிட்டுதுன்னு வச்சிக்குங்க கதவை திறக்க சாவியை உபயோகப்படுத்தத் தெரியாத குழந்தைகள் குரல் எழுப்பியே கதவைத் திறந்துட முடியும்!

எதில் காலத்துலே... இந்த Biometrics முறை இன்னும் பல ஆச்சரியங்களை ஏற்படுத்தும்ன்னு எதிர்பார்க்கறாங்க.

ஸ்டியரிங்கை தொட்டதுமே கார் ஸ்டார்ட் ஆயிடும். சாவி வேண்டியதில்லே. கார் சொந்தக்காரர் தொட்டாத்தான் 'ஸ்டார்ட்' ஆகும்! ஒரு மனுஷனோட நடை... அவர் டைப்ரைட்டரைத் தொடுறவிதம் இதையெல்லாம் வச்சிக்கூட ஆளை அடையாளம் காணக்கூடிய தொழில்நுட்பம் வரலாம்!

என்னதான் தொழில்நுட்பம் வளரட்டும்... குடும்பத்துக்குள்ளே நடக்கற திருட்டுக்களைக் கண்டுபிடிக்கறது ரொம்ப கஷ்டம் சார்.

ஒரு வீட்டுலே பெட்டியிலே இருந்த பணம் காணாமே போச்சு. வீட்டுக்காரரோ அல்லது பையனோதான் எடுத்திருக்கணும். பெட்டியைத் திறந்து பார்த்த அந்த வீட்டுக்கார அம்மா..

இதுலே இருந்து பணத்தை எடுத்தது நிச்சயமா என் வீட்டுக்காரர் இல்லே! அப்படின்னு உறுதியா சொல்லிப்புட்டாங்க. அந்த வீட்டுக்காரருக்கு ரொம்பப் பெருமை.

"அது எப்படி அவ்வளவு கரெக்டா சொல்றே?"ன்னு அவரே கேட்டார்.

"பெட்டியிலே இன்னும் கொஞ்சம் பணம் மிச்சம் இருக்கு... அதனாலே அப்படிச் சொன்னேன்!" அப்படின்னாங்க.

மிகவும் நன்று சிவா