விஸ்வரூபம் திரைக்கு வருவது எப்போது?''

**சிவா** · **சிவா** Sun Sep 23, 2012 10:13 am

விஸ்வரூபம்

கமல்ஹாசன் எழுதி, இயக்கி, நடித்து, இணைந்து தயாரித்துள்ள படம் விஸ்வரூபம். இதில் கமல்ஹாசன், ஆண்ட்ரியா, பூஜா குமார், ராகுல் போஸ் உள்ளிட்டோரும் இப்படத்தில் நடித்துள்ளனர். சங்கர் எசான் லாய் என்பவர் இசையமைக்கிறார். சனுஜான் வர்கீஸ் ஒளிப்பதிவு செய்துள்ளார்.

படத்தை ராஜ்கமல் நிறுவனமும், பிவிபி சினிமாவும் இணைந்து தயாரிக்கின்றன. படம் தமிழ், தெலுங்கு மற்றும் இந்தியில் வெளியாகிறது விஸ்வரூபம்.

படத்தின் பெரும்பகுதி காட்சிகள் வெளிநாடுகளில் படமாக்கப்பட்டுள்ளன.

படம், அடுத்த மாதம் (அக்டோபர்) திரைக்கு வரும் என்று எதிர்பார்க்கப்பட்டது.

இந்த நிலையில், `விஸ்வரூபம்' படத்தில், ஆரோ 3டி என்ற புதிய தொழில்நுட்பம் பயன்படுத்தப்படுவதால், படம் திரைக்கு வருவதில் தாமதம் ஏற்பட்டிருப்பதாகவும், அடுத்த வருடம் ஜனவரியில்தான் படம் திரைக்கு வரும் என்றும் வதந்திகள் பரவின. அதை நம்ப வேண்டாம் என்று கமல்ஹாசன் கேட்டுக்கொண்டிருக்கிறார்.

அறிக்கை

இதுதொடர்பாக அவர் விடுத்துள்ள அறிக்கையில் கூறியிருப்பதாவது:-

``ஆரோ 3டி தொழில்நுட்பம், ரசிகர்களுக்கு திரைப்படம் பார்க்கும் அனுபவத்தை மேலும் பல படி நிலைகளுக்கு உயர்த்தி பெரும் கிளர்ச்சியை அளிக்கும். இந்த ஆரோ 3டி தொழில்நுட்பத்தை `விஸ்வரூபம்' திரைப்படம் மூலமாக நம் பார்வையாளர்களுக்கு நாங்கள் கொண்டு வருவதில், பெரிதும் மகிழ்ச்சி அடைகிறேன்.

மற்ற தொழில்நுட்பங்களைப்போல் அல்லாமல், ஆரோ 3டி இயங்குதளத்தின் செயல் உருவாக்கமும், மிக குறைந்த நிறுவுதல் நேரமும் இதன் பெரும் சிறப்பு. என்னுடைய நண்பர் வில்பிரடின் இந்த ஆரோ 3டி தொழில்நுட்பம், இந்திய திரைப்பட ரசிகர்களுக்கும் பயன்படும் வகையில், பல நல்ல திரையரங்குகளும், அதன் நிர்வாகிகளும் வளர்ச்சி மனோபாவத்தோடு இதை எடுத்துச் செல்ல முன்னோக்கி வருவது மிகவும் மகிழ்ச்சி அளிக்கிறது.

`ரிலீஸ்' எப்போது?

`விஸ்வரூபம்' படத்தின் வெளியீட்டு நாள் பற்றி பல புரளிகள் பரவி வருகின்ற இவ்வேளையில், என்னுடைய ராஜ்கமல் பிலிம்ஸ் அலுவலகத்தில் இருந்து மட்டுமே இதுகுறித்த உண்மையான தகவல்கள் வெளியாகும் என்று உறுதியளிக்கிறேன்.''

இவ்வாறு அந்த அறிக்கையில் கமல்ஹாசன் கூறியிருக்கிறார்