20 ஓவர் கிரிக்கெட்: இந்தியா அபார வெற்றி

20 ஓவர் உலக கோப்பை கிரிக்கெட்டில் இங்கிலாந்தை பந்தாடிய இந்திய அணி 90 ரன்கள் வித்தியாசத்தில் தோற்கடித்தது.



ஷேவாக் நீக்கம்

20 ஓவர் உலக கோப்பை கிரிக்கெட்டில் நேற்றிரவு கொழும்பில் நடந்த `ஏ' பிரிவு ஆட்டத்தில் இந்தியாவும், நடப்பு சாம்பியன் இங்கிலாந்தும் மோதின. இந்தியா ஏற்கனவே சூப்பர்-8 சுற்றுக்கு முன்னேறி விட்டதால் இந்த ஆட்டத்தில் ஷேவாக், ஜாகீர்கான், அஸ்வின் ஆகியோருக்கு ஓய்வு அளிக்கப்பட்டது. அவர்களுக்கு பதிலாக ஹர்பஜன்சிங், பியுஷ் சாவ்லா, அசோக் திண்டா ஆகியோர் சேர்க்கப்பட்டனர்.

டாஸ் ஜெயித்த இங்கிலாந்து, முதலில் இந்தியாவை பேட் செய்ய அழைத்தது. தொடக்க ஆட்டக்காரர் ஷேவாக் இல்லாததால் கம்பீருடன் இர்பான் பதான் இந்தியாவின் இன்னிங்சை தொடங்கினார். பதான் 8 ரன்னில் ஆட்டம் இழந்தாலும், கம்பீரும், அடுத்து வந்த விராட் கோக்லியும் அணியை சரிவில் இருந்து மீட்டெடுத்தனர். ஆனால் ஸ்கோர் மிதமான வேகத்திலேயே சென்று கொண்டிருந்தது. கோக்லி 40 ரன்களிலும் (32 பந்து, 6 பவுண்டரி), கம்பீர் 45 ரன்களிலும் (38 பந்து, 5 பவுண்டரி) கேட்ச் ஆனார்கள்.

170 ரன்கள் குவிப்பு

இதைத் தொடர்ந்து ரோகித் ஷர்மாவுடன், கேப்டன் டோனி கைகோர்த்தார். 16-வது ஓவர் வரை இந்திய அணியின் ஸ்கோர் (3-119) சீராகவே நகர்ந்தது. கடைசி 4 ஓவர்களில் தான் ரன்குவிப்பில் துரிதம் காட்டினர். கேப்டன் தன் மீது வைத்த நம்பிக்கையை வீணாக்காமல் நிலைத்து நின்ற ரோகித் ஷர்மா, கடைசி ஓவரில் சிக்சர், பவுண்டரி அடித்து அரைசதத்தை கடந்தார். இந்த இன்னிங்சில் சிக்சர் விளாசிய ஒரே வீரர் ரோகித் ஷர்மா தான். இருப்பினும் இந்த ஜோடிக்கு முன்பாக யுவராஜ்சிங் அல்லது ரெய்னா இறங்கியிருந்தால் இன்னும் சிறப்பாக அமைந்திருக்கலாம். டோனி 9 ரன்களில் (8 பந்து) எல்லைக்கோடு அருகே பிடிபட்டார்.

நிர்ணயிக்கப்பட்ட 20 ஓவர்களில் இந்திய அணி 4 விக்கெட்டுக்கு 170 ரன்கள் சேர்த்தது. ரோகித் ஷர்மா 55 ரன்களுடன் (33 பந்து, 5 பவுண்டரி, ஒரு சிக்சர்) களத்தில் இருந்தார். கடைசி 4 ஓவர்களில் மட்டும் இந்திய அணி 51 ரன்கள் திரட்டியது.

மண்டியிட்டது இங்கிலாந்து

பின்னர் ஆடிய இங்கிலாந்து அணி, இந்திய தாக்குதலுக்கு ஈடுகொடுக்க முடியாமல் `விக்கெட் அணிவகுப்பு' நடத்தியது. அலெக்ஸ் ஹாலஸ் (0), லுக் ரைட் (6) ஆகியோரை இர்பான் பதான் கழற்ற, அதன் பிறகு இந்தியாவின் சுழலில் இங்கிலாந்து சிக்கி சிதறி போனது. இந்திய பவுலர்கள் எக்ஸ்டிரா வகையில் ஒரே ஒரு வைடு மட்டுமே வழங்கினர். அந்த அளவுக்கு ஸ்டம்பை குறி வைத்து துல்லியமாக பந்து வீசி அசத்தினர்.

குறிப்பாக நீண்ட இடைவெளிக்கு பிறகு வாய்ப்பு பெற்ற சுழற்பந்து வீச்சாளர் ஹர்பஜன்சிங் தனது திறமையை நிரூபித்து காட்டினார். அவர் 4 விக்கெட்டுகளை அள்ளினார். மற்றொரு சுழற்பந்து வீச்சாளர் சாவ்லா தனது பங்குக்கு 2 பேரை பெவிலியனுக்கு அனுப்பி வைத்தார்.

முடிவில் இங்கிலாந்து அணி 14.4 ஓவர்களில் 80 ரன்களுக்கு சுருண்டது. இதன் மூலம் இந்திய அணி 90 ரன்கள் வித்தியாசத்தில் 2-வது வெற்றியை ருசித்தது. ஹர்பஜன்சிங் ஆட்டநாயகன் விருது பெற்றார். தோற்றாலும் இங்கிலாந்து ஏற்கனவே சூப்பர்-8 சுற்றுக்குள் நுழைந்து விட்டது குறிப்பிடத்தக்கது.

ஸ்கோர் போர்டு

இந்தியா

கம்பீர் (சி) கீஸ்வெட்டர் (பி) பின் 45
பதான் (பி) பின் 8
கோக்லி (சி) பேர்ஸ்டோ (பி) ஸ்வான் 40
ரோகித் ஷர்மா (நாட்-அவுட்) 55
டோனி (சி) ஹாலஸ் (பி) டெர்ன்பேச் 9
ரெய்னா (நாட்-அவுட்) 1
எக்ஸ்டிரா 12

மொத்தம் (20 ஓவர்களில் 4 விக்கெட்டுக்கு) 170
விக்கெட் வீழ்ச்சி: 1-24, 2-81, 3-119, 4-166

பந்து வீச்சு விவரம்

ஸ்டீவன் பின் 4-0-33-2
டெர்ன்பேச் 4-0-45-1
ஸ்டூவர்ட் பிராட் 4-0-36-0
பிரிஸ்னன் 4-0-35-0
ஸ்வான் 4-0-17-1

இங்கிலாந்து

கீஸ்வெட்டர் (சி) கோக்லி (பி) சாவ்லா 35
ஹாலஸ் (பி) பதான் 0
லுக் ரைட் எல்.பி.டபிள்ï (பி) பதான் 6
மோர்கன் (பி) ஹர்பஜன்சிங் 2
பேர்ஸ்டோ (பி) சாவ்லா 1
பட்லர் (பி) ஹர்பஜன் 11
பிரிஸ்னன் (சி) கம்பீர் (பி) ஹர்பஜன் 1
பிராட் (சி) கம்பீர் (பி) திண்டா 3
ஸ்வான் (ஸ்டம்பிங்) டோனி (பி) ஹர்பஜன் 0
ஸ்டீவன் பின் (நாட்-அவுட்) 8
டெர்ன்பேச் (ரன்-அவுட்) 12
எக்ஸ்டிரா 1

மொத்தம் (14.4 ஓவர்களில் ஆல்-அவுட்) 80
விக்கெட் வீழ்ச்சி: 1-2, 2-18, 3-39, 4-42, 5-51, 6-54, 7-60, 8-60, 9-60

பந்து வீச்சு விவரம்

இர்பான் பதான் 3-0-17-2
பாலாஜி 1-0-10-0
திண்டா 2-0-26-1
ஹர்பஜன்சிங் 4-2-12-4
சாவ்லா 4-1-13-2
யுவராஜ்சிங் 0.4-0-2-0

-

ஹர்பஜன் சாதனை; இங்கிலாந்து வேதனை

*இந்திய சுழற்பந்து வீச்சாளர் ஹர்பஜன்சிங் 12 ரன்கள் விட்டுக்கொடுத்து 4 விக்கெட்டுகளை கைப்பற்றினார். 20 ஓவர் போட்டியில் இந்திய பவுலர் ஒருவரின் சிறந்த பந்து வீச்சு இதுவாகும். இதற்கு முன்பு 2007-ம் ஆண்டு தென்ஆப்பிரிக்காவுக்கு எதிராக ஆர்.பி.சிங் 13 ரன்னுக்கு 4 விக்கெட் எடுத்ததே இந்திய பவுலர் ஒருவரின் சிறந்த பந்துவீச்சாக இருந்தது.

*20 ஓவர் போட்டி வரலாற்றில் இங்கிலாந்தின் குறைந்த ஸ்கோர் (80 ரன்) இதுவாகும். இதற்கு முன்பு கடந்த ஆண்டு வெஸ்ட் இண்டீசுக்கு எதிராக 88 ரன்களில் சுருண்டதே மோசமான ரன்னாக இருந்தது.

*இந்த ஆட்டத்தில் இந்தியா 90 ரன்கள் வித்தியாசத்தில் வெற்றிக்கனியை பறித்தது. 20 ஓவர் போட்டியில் அதிக ரன்கள் வித்தியாசத்தில் இந்தியா பெற்ற வெற்றி இதுவாகும். இதற்கு முன்பு கடந்த ஆகஸ்டு மாதம் இலங்கைக்கு எதிராக 39 ரன்கள் வித்தியாசத்தில் வென்றதே இந்த வகையில் சிறந்த வெற்றியாக இருந்தது.

தினத்தந்தி

அபாரம்....பாராட்டுகள்

வாழ்த்துகள்.

வடக்கு தெற்கு பிரச்சினையில் ஹர்பஜனை நம்பி
நம் வீரர் அஸ்வினை ஒதுக்காமல் இருந்தால் டீமிற்கு நன்று.

நேற்று ரோஹித் அருமையாக ஆடினார்.!

இந்திய அணியின் பந்து வீச்சு நேற்று மிகவும் சிறப்பாக இருந்தது...
அருமையாக விளையாடி அதிரடியாக வென்ற வீரர்களுக்கு வாழ்த்துக்கள்...