திருப்பதி பிரம்மோற்சவ விழாவில் 3½ லட்சம் பக்தர்கள் குவிந்தனர்

திருப்பதி பிரம்மோற்சவ விழாவில் நேற்று தங்க கருட வாகனத்தில் மலையப்பசாமி வீதி உலா வந்தார். இதனை காண 3½ லட்சம் பக்தர்கள் குவிந்தனர்.

பிரம்மோற்சவ விழா

திருப்பதி ஏழுமலையான் கோவில் பிரம்மோற்சவ விழாவின் 5-வது நாளான நேற்று காலை தங்க திருச்சி வாகனத்தில் மலையப்பசாமியும், மோகினி அவதாரத்தில் கிருஷ்ணரும் நான்கு மாட வீதிகளில் வீதி உலா வந்து பக்தர்களுக்கு அருள் பாலித்தனர்.

அதைத்தொடர்ந்து மாலை 5.30 மணி முதல் 6.30 மணி வரை கோவில் அருகில் உள்ள ஊஞ்சல் மண்டபத்தில் உற்சவரான மலையப்பசாமிக்கு ஊஞ்சல் சேவை நிகழ்ச்சி நடைபெற்றது. இந்த ஊஞ்சல் சேவை முடிந்ததும், உற்சவர் வாகன மண்டபத்துக்கு அழைத்துச் செல்லப்பட்டு அங்கு தங்க கருட வாகனத்தில் வைக்கப்பட்டு சிறப்பு அலங்காரங்கள் நடைபெற்றன.

கருட வாகனத்தில்

விலை மதிப்புமிக்க தங்க-வைர-வைடூரிய நகைகள் அணிவிக்கப்பட்டு மலர் அலங்காரம் செய்யப்பட்டது. ஸ்ரீவில்லிப்புத்தூர் ஆண்டாள் சன்னதியில் இருந்து ஆண்டாள் சூடிக்கொடுத்த மாலை மற்றும் பட்டுத்துணிகள் உற்சவருக்கு அணிவிக்கப்பட்டன. இந்த அலங்காரங்கள் முடிவடைந்ததும் இரவு 8 மணி முதல் நள்ளிரவு ஒரு மணி வரை தங்க கருட வாகனத்தில் உற்சவரான மலையப்பசாமி நான்கு மாட வீதிகளில் உலா வந்து பக்தர்களுக்கு காட்சி அளித்தார்.

இந்த ஊர்வலத்தில் ஆந்திர மாநில கவர்னர் நரசிம்மன், அறங்காவலர் குழு தலைவர் கனுமூரிபாப்பிராஜு, தேவஸ்தான செயல் அலுவலர் எல்.வி.சுப்பிரமணியம், மாவட்ட கலெக்டர் சாலமன் ஆரோக்கியராஜ், மாவட்ட போலீஸ் சூப்பிரண்டு கிராந்தி ராணா டாடா மற்றும் பலர் கலந்து கொண்டனர்.

3½ லட்சம் பக்தர்கள்

கருட சேவையில் கலந்து கொள்வதற்காக பல்வேறு மாநிலங்களில் இருந்தும், பல்வேறு நாடுகளில் இருந்தும் ஏராளமான பக்தர்கள் திருமலையில் குவிந்தனர். இதனால் பக்தர்களின் கூட்டம் அலைகடலென திரண்டிருந்தது. கருட சேவையில் சுமார் 3½ லட்சத்திற்கு மேற்பட்ட பக்தர்கள் கலந்து கொண்டு ஏழுமலையானை தரிசனம் செய்தனர்.

நான்கு மாட வீதிகளில் இரவு நடக்கும் கருட சேவையை காண்பதற்காக பக்தர்கள் காலை 9 மணிக்கே கேலரியில் வந்து அமர்ந்தனர். நேரம் செல்ல செல்ல பக்தர்கள் கூட்டம் கேலரி முழுவதும் நிரம்பி வழிந்தது. இதனால் கேலரியில் கால் வைப்பதற்கு கூட இடம் இல்லாமல் பக்தர்கள் தவித்தனர். திருப்பதி அலிபிரி மற்றும் ஸ்ரீவாரிமெட்டு ஆகிய 2 நடைபாதைகள் வழியாக பக்தர்கள் சாரை சாரையாக சென்றனர். தேவஸ்தானம் சார்பில் பக்தர்களுக்காக 2 நடைபாதைகளிலும் இலவச உணவு, மோர் மற்றும் குடிநீர் வழங்கப்பட்டது.

வரிசையில் பக்தர்கள்

இதே போல மொட்டை அடிக்கும் இடம் மற்றும் இலவச சாப்பாடு வழங்கும் இடங்களில் பக்தர்கள் வரிசையில் நின்றவாறே சாப்பிட்டுவிட்டு, பின்பு மொட்டை அடித்துக் கொண்டு சென்றனர். மேலும் தங்கும் அறைகள் கிடைக்காதவர்கள் கோவில் வளாகம், சாலையோரம், பூங்காக்கள் மற்றும் ஆங்காங்கே படுத்து ஓய்வெடுத்தனர்.

பிரம்மோற்சவ விழாவின் 6-வது நாளான இன்று (ஞாயிற்றுக்கிழமை) காலை 9 மணி முதல் 11 மணி வரை அனுமந்த வாகனமும், இரவு 9 மணி முதல் 11 மணி வைர கஜ வாகனமும் நடைபெறுகிறது.

தினத்தந்தி