அமெரிக்காவுக்கு எதிரான போராட்டம்: பாகிஸ்தானில் நடந்த கலவரத்தில் 20 பேர் பலி

**சிவா** · **சிவா** Sat Sep 22, 2012 9:41 am

பாகிஸ்தானில் அமெரிக்க சினிமாவுக்கு எதிரான நாடு தழுவிய போராட்டம் நேற்று நடைபெற்றது. இந்த போராட்டத்தின்போது பல்வேறு நகரங்களில் கலவரம் வெடித்தது.

கராச்சியில் நடந்த வன்முறையில் மிக அதிகமாக 14 பேர் பலியானார்கள். 110 பேர் படுகாயம் அடைந்தனர். தலைநகர் இஸ்லாமாபாத், கராச்சி மற்றும் பெஷாவர் நகரில் 200 பேருக்கும் அதிகமானவர்கள் காயம் அடைந்தார்கள்.

பெஷாவர் நகரில் டி.வி. சேனல் ஊழியர் உள்பட 5 பேர் கொல்லப்பட்டனர். போராட்டத்தின்போது ஆயுதங்களுடன் கலந்து கொண்ட சிலர் துப்பாக்கியால் சுட்டதையும் பார்க்க முடிந்தது. பல்வேறு நகரங்களில் நடைபெற்ற போராட்டத்தின்போது கடைகள் மற்றும் வர்த்தக நிறுவனங்கள் சூறையாடப்பட்டன. சினிமா தியேட்டர்கள் தீ வைத்து கொளுத்தப்பட்டன.

போராட்டத்தை அமைதியாக நடத்தும்படி பாகிஸ்தான் அரசு மக்களுக்கு வேண்டுகோள் விடுத்து இருந்தது. நேற்று அரசு விடுமுறையும் அளிக்கப்பட்டு இருந்தது. ஆனால், போராட்டத்தில் கலந்து கொண்டவர்கள் ஆவேசத்துடன் வன்முறையில் ஈடுபட்டனர். பாகிஸ்தான் முழுவதும் நடந்த கலவரத்தில் 20 பேர் பலியானார்கள். நூற்றுக்கணக்கானவர்கள் படுகாயம் அடைந்தனர்.

மாலைமலர்