விபத்தில் பாதிக்கப்பட்டவர் சிகிச்சைக்கு பின்பு, வீட்டில் வைத்து இறந்தாலும் இழப்பீடு மறுக்கக்கூடாது - ஐகோர்ட்டு உத்தரவு

**சிவா** · **சிவா** Sun 23 Sep 2012 - 13:17

விபத்தில் பாதிக்கப்பட்டவர் சிகிச்சைக்கு பின்பு, வீட்டில் வைத்து இறந்தாலும் இழப்பீடு மறுக்கக்கூடாது என்று மதுரை ஐகோர்ட்டு உத்தரவிட்டுள்ளது.

லாரி மோதி பலி

மதுரை மாவட்டம் ஆலம்பட்டியை சேர்ந்தவர் போஸ்(வயது 35). இவர், கடந்த 14.5.2004 அன்று நாகமலைபுதுக்கோட்டை பல்கலைக்கழக ஆஸ்பத்திரி அருகே மோட்டார் சைக்கிளில் சென்று கொண்டிருந்தார். அப்போது அந்த வழியாக வந்த லாரி மோதியதில், போஸ் பலத்த காயம் அடைந்தார். மதுரை பெரிய ஆஸ்பத்திரியில் அவருக்கு தீவிர சிகிச்சை அளிக்கப்பட்டது.

விபத்தில் அவரது உயிர்தலத்தில் பலத்த காயம் ஏற்பட்டதால், அவரது உயிருக்கு எப்போது வேண்டுமானாலும் ஆபத்து ஏற்படலாம் என்று டாக்டர் அறிவுறுத்தினார். இந்த நிலையில் ஒரு மாதத்துக்கு பின்பு, 16.6.2004 போஸ் வீடு திரும்பினார். இந்த நிலையில் ஒரு மாதம் கழித்து போஸ் இறந்து விட்டார்.

ஐகோர்ட்டில் அப்பீல்

இதனால் இழப்பீடு கேட்டு, போஸ் மனைவி வள்ளிமயில் மதுரை மாவட்ட கோர்ட்டில் வழக்கு தொடர்ந்தார். வழக்கை விசாரித்த கோர்ட்டு, ஆஸ்பத்திரியில் இருந்து வீட்டுக்கு திரும்பிய பின்பு போஸ் இறந்ததால் இழப்பீடு வழங்க உத்தரவிட முடியாது என்று உத்தரவிட்டது.

இந்த உத்தரவை எதிர்த்து வள்ளிமயில் மதுரை ஐகோர்ட்டு கிளையில் அப்பீல் செய்தார். இந்த அப்பீல் மனு நீதிபதி ஜி.எம்.அக்பர்அலி முன்னிலையில் விசாரணைக்கு வந்தது. மனுதாரர் சார்பில் வக்கீல்கள் வீராகதிரவன், பாண்டிபெருமாள் ஆகியோர் ஆஜராகி வாதாடினர்.

இழப்பீடு மறுக்கக்கூடாது

மனுவை விசாரித்த நீதிபதி உத்தரவில் கூறி இருப்பதாவது:-

டாக்டர் தனது சாட்சியத்தில் மனுதாரரின் கணவருக்கு விபத்து மூலம் உயிர்தலத்தில் பலத்த காயம் ஏற்பட்டு இருப்பதால் எப்போது வேண்டுமானாலும் அவரது உயிருக்கு ஆபத்து ஏற்படலாம் என்று கூறி உள்ளார். இதை கீழ்கோர்ட்டு கருத்தில் கொள்ளவில்லை.

விபத்தில் ஏற்பட்ட காயத்துக்கு பின்பு தான், மனுதாரரின் கணவர் உடல்நிலை பாதிக்கப்பட்டு இறந்துள்ளார். எனவே இழப்பீடு வழங்க மறுப்பது சரியல்ல. மனுதாரருக்கு ஆண்டுக்கு 7.5 சதவீத வட்டியுடன் 3 லட்சத்து 23 ஆயிரம் ரூபாய் இழப்பீடாக இன்சூரன்ஸ் நிறுவனம் வழங்க வேண்டும்.

இவ்வாறு உத்தரவில் கூறப்பட்டுள்ளது.

தினத்தந்தி