குட்டி...குட்டி...விஷயங்கள்.

by **rameshnaga** Thu Sep 20, 2012 8:02 pm

நீர் தேடி அலைகின்றன..
பறவைகள்.

"என் கண் வந்து அருந்திச் செல்"

என்கிறாள்-
ஜன்னலோர... முதிர்கன்னி.
*****************************************************************
என் அறைக்குள்
கூடு கட்டித் தங்கிய
குருவியின் கனவில்...

வந்து கொண்டிருக்கிறது
எனது வீடு

அதன் கூட்டிற்குள்...
இருப்பதாக.
*******************************************************************

காற்றை....
நழுவவிட்டு விட்ட
பலூனைக்
கையில் வைத்திருக்கும்
குழந்தை....

எல்லோரிடமும் கெஞ்சியது போல்
என்னையும் கெஞ்சிக் கொண்டிருக்கிறது...

என் மூச்சுக் காற்றைத்
தரச்சொல்லி.
******************************************************************************

இரவு....நிஜம்.
நிழல் அல்ல.

பகல்...நிழல்...
நிஜம் அல்ல.

எனக்குத்தானே தெரியும்..
எனது உண்மை முகம்.
*******************************************************************************
நான்-
குழந்தையாய் இருந்த போது
என் அம்மாவுக்கு
நான்...கற்றுக்கொடுத்த மொழி
எனக்கு மறந்து விட்டது.

அம்மாவுக்குத்தான்
ஞாபகமிருக்கிறது......
அதன் ஒவ்வொரு எழுத்தும்.

என் குழந்தைகளுக்குச்
சொல்லிக் கொண்டிருக்கிறாள்...

அலையெனப் புரளும்
ஆனந்தத்துடன்.
***************************************************************************