சினிமா விமர்சனம் - 16 வயதினிலே

by **சிவா** Thu Sep 20, 2012 7:03 pm

கமலஹாசன்... சப்பாணி பாத்திரப்படைப்பு இந்தப் படத்தில் மிகச் சிறந்த அம்சம். அந்த காரெக்டருக்குள் புகுந்து, மூழ்கி, திளைத்து எழுந்திருக்கிறீர்கள் - தலைசிறந்த நடிப்பு.

இளையராஜா... அன்னக்கிளியில் பாட்டுகள் 'ஹிட்' ஆனது குருட்டு அதிர்ஷ்டத்தால் இல்லை என்று நிருபித்திருக்கிறீர்கள். இந்தப் படத்தில் வரும் எல்லாப் பாடல்களும் காதுக்கு இனிமையைத் தருகின்றன.

கலைமணி... கிராமத்துச் சூழ்நிலை படம்தான் என்றாலும், அளவுக்கு மீறிய பட்டிக்காட்டு வசனங்களை எழுதி புழுதி வாரி இறைக்காமல் அளவோடு அழகாக வசனம் எழுதியிருக்கிறீர்கள்.

பாரதிராஜா... நிறைய புதுமைகளைச் செய்திருக்கிறீர்கள். கிராமியச் சூழ் நிலையை மாற்ற முயற்சிக்காமல், அப்ப டியே தத்ரூபமாகத் தந்திருக்கிறீர்கள். ரஜினிகாந்தை கமல் கொலை செய்யும் இடத்தை ரத்தினச்சுருக்கமாகப் பட மாக்கியிருக்கிறீர்கள். போலீஸ் ஸ்டேஷன், கோர்ட் என்று அறுக்காமல், நெஞ்சை உருக்கும் வகையில் மாறுதலான முடிவு கொடுத்திருக்கிறீர்கள். சபாஷ்!

ஒரு காட்சியில் ஹீரோ கோவணத்துடன் வந்தாலும், அவனுடைய மனநிலை காரணமாக, அருவருப்பு ஏற்படாமல் செய்திருப்பது உங்கள் தனி சாமர்த்தியம்.

ஓணானை சாகடிப்பதைக் கூட சகிக்க முடியாத அப்பாவி ஒரு கொலை செய்துவிட்டான் என்ற எண்ணத்தை ஆழமாகப் பதிய வைக்க, பழைய ஓணான் ஷாட்டை இன்னொரு முறை காண்பித்திருக்கலாம். இது ஒரு யோசனைதான்.

இளநீர் கை நழுவிப் போவது ரொம்பப் புதுசு - மாஞ்செடியை மிதிப்பது ரொம்பப் பழசு.

நிவாஸ்... ஒளிப்பதிவு ரொம்பப் பிரமாதம். இயற்கைக் காட்சிகளை அள்ளிக் கொடுத்திருக்கிறீர்கள். ஆனால், ஒரு சில காட்சிகளில் ஃபோகஸ் சரியாக இல்லை. முக்கியமாக, குடத்தில் தண்ணீர் எடுக்காமல் வரும் ஸ்ரீதேவி, காந்திமதியிடம் 'திருதிரு'வென்று விழிக் கும் காட்சி இதற்கு ஓர் உதாரணம். இத்தனைக்கும் அது 'ஸ்டெடி க்ளோஸ் ஷாட்'. காமிரா உதவியா ளரை இனி கவனமாக இருக்கச் சொல்லுங்கள்.

தவிர, ரஜினிகாந்த் பெட்டிக் கடையில் மயில்மார்க் பீடி கேட்டு வரும் காட்சி ஏன் அத்தனை கறுப்பாகத் தெரிகிறது? (பட்டினப்பிரவேசத்தில் வரும் ஷு பாலீஷ் காட்சி மாதிரி) இது உங்கள் தவறான 'அண்டர் எக்ஸ்போஷரா' அல்லது லாபரட்டரியின் தவறான 'அண்டர் டெவலப்பிங்கா'?

'செந்தூரப்பூ' பாடலை மிக அருமையாகப் படமாக்கியுள்ளீர்கள். ஆனால், இதில் இரண்டு ஸ்ரீதேவிகளைக் காட்ட மாஸ்க்ஷாட் எடுப்பதற்குப் பதில், பின்னால் வேறொருவரை நிற்க வைத்து 'டியூப்' தெரியும்படி செய்திருக்க வேண்டாம்.

பாஸ்கர்... ஆரம்பக் காட்சியில், ஸ்ரீதேவி யாரையோ எதிர் பார்த்து நிற்கிறார் ரயில்வே ஸ்டேஷனில் - ரயில் வருகிறது - கண்கள் தேடுகின்றன - நினைத் தவர் வரவில்லை - ஏக்கமும் விரக்தியும் அடைகிறார் - பிறகு ரயில் கிளம்புகிறது - இப்போது மறுபடியும் யாரையோ தேடும் பழைய 'எக்ஸ்பிரஷன்' எங்கிருந்து வருகிறது? முன்பின் மாற்றிப் போட்டிருந்தால் குறை தவிர்க்கப் பட்டிருக்கும்.

இதைப் போலவே இரண்டு இடங்களில் 'ஸ்டே' (Stay) தெரிவதையும் நீங்கள் தவிர்த்திருக்கலாம். காந்திமதியுடன் சந்தைக்குப் புறப்படும் சமயத்தில் கமல் நின்று போவது நன்றாகத் தெரிகிறது. அதேபோல், கமல் ரஜினிகாந்தை அடித்துவிட்டுக் குளக்கரைக்கு வரும்போது ஸ்ரீதேவியின் ஆக்ஷனுக்கு முன், குடத்தின் 'ஸ்டே' தெரிகிறது.

மொத்தத்தில்... '16 வயதினிலே!' போல் இன்னும் நான்கு படங்கள் வந்தால், தமிழ்ப்படத்தின் தரம் உயர்ந்து தலை நிமிர்ந்து நடக்கலாம்!

விகடன்