கடும் எதிர்ப்பையும் மீறி அன்னிய நேரடி முதலீட்டு கொள்கை அமலுக்கு வந்தது

**சிவா** · **சிவா** Thu Sep 20, 2012 7:17 pm

சில்லரை வணிகத்தில் அன்னிய நேரடி முதலீட்டை அனுமதிப்பது தொடர்பாக மத்திய அரசு முடிவு செய்து அறிவித்தது. மத்திய அமைச்சரவையில் எடுக்கப்பட்ட இந்த முடிவுக்கு எதிர்ப்பு தெரிவித்து பல்வேறு அரசியல் கட்சிகள் சார்பில் நாடு முழுவதும் இன்று பொது வேலை நிறுத்தம் நடைபெற்றது. இதனால் பல மாநிலங்களில் பாதிப்பு ஏற்பட்டது.

இந்த கடும் எதிர்ப்பையும் மீறி, அமைச்சரவையில் எடுக்கப்பட்ட பல்வேறு பொருளாதார சீர்திருத்த முடிவுகள் குறித்து இன்று தொழிற்கொள்கை மற்றும் மேம்பாட்டுத்துறை அறிவிக்கை வெளியிட்டுள்ளது. அதில், சிங்கிள் பிராண்ட் மற்றும் மல்டி பிராண்ட் சில்லரை வணிகத்தில் நேரடி அன்னிய முதலீடு தொடர்பான அரசின் முடிவு இன்று முதல் அமலுக்கு வருவதாக கூறப்பட்டுள்ளது.

மேலும் விமான போக்குவரத்து துறையில் நேரடி அன்னிய முதலீடு கொள்கை, ஒலி-ஒளிபரப்பு துறை, எரிசக்தி துறை ஆகியவற்றிலும் அன்னிய முதலீடு உடனடியாக அமலுக்கு வருவதாக கூறப்பட்டுள்ளது.

இதன்மூலம் வால்மார்ட் போன்ற நிறுவனங்கள் இந்தியாவில் பல்பொருள் அங்காடிகளை திறக்க அனுமதி அளிக்கப்பட்டுள்ளது. நேரடி அன்னிய முதலீடு விசயத்தில் அந்தந்த மாநிலங்களே முடிவு செய்துகொள்ளலாம் என அரசு தெரிவித்துள்ளது. இதனால் அன்னிய முதலீட்டுக்கு ஆதரவு தெரிவித்துள்ள 10 மாநிலங்கள் மற்றும் யூனியன் பிரதேசங்களில் வெளிநாட்டு நிறுவனங்கள் முதலீடு செய்ய முடியும்.

மாலைமலர்