ராஜபக்சேவுக்கு கறுப்புக்கொடி காட்ட சென்ற வைகோ தடுத்து நிறுத்தப்பட்டார்

by **சிவா** Thu Sep 20, 2012 11:05 am

ராஜபக்சேவுக்கு கறுப்புக்கொடி காட்ட சென்ற வைகோவை மத்திய பிரதேச எல்லையில் போலீசார் தடுத்து நிறுத்தினர்.

ம.தி.மு.க. போராட்டம்

மத்தியபிரதேச மாநிலம், சாஞ்சியில் நாளை (வியாழக்கிழமை) புத்த பல்கலைக்கழக அடிக்கல்நாட்டு விழா நடக்கிறது. இந்த விழாவில் பங்கேற்க இலங்கை அதிபர் ராஜபக்சே வருவதற்கு எதிராக தமிழ்நாட்டில் பெரும்பாலான அரசியல் கட்சிகள், பல்வேறு அமைப்புகள் எதிர்ப்பு தெரிவித்து போர்க்கொடி உயர்த்தி உள்ளன.

இந்த நிலையில், ராஜபக்சே வருகைக்கு எதிர்ப்பு தெரிவித்து, கறுப்புக்கொடி ஆர்ப்பாட்டம் நடத்த ம.தி.மு.க. பொதுச்செயலாளர் வைகோ, 15 பஸ்களில் ம.தி.மு.க. தொண்டர்களுடன் கடந்த சில தினங்களுக்கு முன் சாஞ்சிக்கு புறப்பட்டு சென்றார்.

கைதாக தயார்

சாஞ்சி செல்லும் வழியில் மராட்டிய மாநிலம், நாக்பூரில் வைகோ நேற்று நிருபர்களிடம் பேசினார். அப்போது அவர், "இலங்கையில் அப்பாவி தமிழ் மக்கள் கைகள் கட்டப்பட்ட நிலையில், அரை நிர்வாணமாக கொடூரமான முறையில் இனப்படுகொலை செய்யப்பட்டதற்கு ராஜபக்சேதான் முழு பொறுப்பு. இதை மத்திய பிரதேச முதல்-மந்திரி சிவராஜ்சிங் சவுகான் தெரிந்திருந்தும்கூட, ராஜபக்சேயை அழைத்துள்ளார். இதை மத்திய அரசும் அங்கீகரித்துள்ளது'' என்றார்.

"நீங்கள் கைது செய்யப்படுவதற்கு வாய்ப்பு இருப்பதாக சொல்லப்படுகிறதே?'' என்ற நிருபரின் கேள்விக்கு வைகோ, "நானும், எனது கட்சி தொண்டர்களும் எந்த நடவடிக்கையையும் எதிர்கொள்ள தயாராக இருக்கிறோம். நான் இதுவரை 29 முறை கைது செய்யப்பட்டுள்ளேன். 4 ஆண்டு காலத்தை நான் சிறையில் கழித்திருக்கிறேன். பொடாவில் சிறைவாசம் அனுபவித்திருக்கிறேன். எனவே கைதாவது எல்லாம் புதிதல்ல'' என பதில் அளித்தார்.

தடுத்து நிறுத்தினர்

தொடர்ந்து வைகோவும், ம.தி.மு.க. தொண்டர்களும் சாஞ்சி நோக்கி பயணம் செய்தனர். அவர்கள் சென்ற பஸ்கள் மராட்டிய-மத்தியபிரதேச மாநிலங்களின் எல்லையில் அமைந்துள்ள சிந்துவாரா மாவட்டத்தில், பந்துர்னா என்ற இடத்துக்கு சென்றன.

அப்போது அங்கு குவிக்கப்பட்டிருந்த போலீசாரும், அதிரடிப்படையினரும் பஸ்களை வழிமறித்தனர். வைகோ, ம.தி.மு.க. தொண்டர்கள் தொடர்ந்து செல்ல முடியாமல் தடுத்து நிறுத்தினர். இதுதொடர்பாக சிந்துவாரா மாவட்ட கலெக்டர் மகேஷ் சந்திர சர்மா, போலீஸ் சூப்பிரண்டு புருசோத்தம் சர்மா ஆகியோரை வைகோ சந்தித்தார். " எங்களை எதற்காக தடுத்து நிறுத்துகிறீர்கள்?'' என கேள்வி எழுப்பினார்.

தடை உத்தரவு

இதுதொடர்பாக ஜபல்பூர் போலீஸ் ஐ.ஜி. மதுக்குமார் கூறுகையில், " வைகோவை அதிகாரிகள் மலர்க்கொத்துடன் வரவேற்றனர். சிந்துவாரா பகுதியில் குற்றவியல் நடைமுறைச்சட்டம் பிரிவு 144-ன் கீழ் தடை உத்தரவு பிறப்பிக்கப்பட்டிருப்பதால், தொடர்ந்து அவர்கள் செல்ல அனுமதிக்க முடியாது என கூறினோம்'' என்றார்.

தொடர்ந்து பந்துர்னா, சவுன்சார், சிந்துவாரா ஆகிய இடங்களில் அமைக்கப்பட்டுள்ள தற்காலிக சிறைகளுக்கு செல்லுமாறு ம.தி.மு.க.வினரை அதிகாரிகள் கூறினர். ஆனால் வைகோ அதை ஏற்க மறுத்துவிட்டார்.

தர்ணா போராட்டம்

மேலும் வைகோவும், ம.தி.மு.க.வினரும் சாலையில் அமர்ந்து தர்ணா போராட்டம் நடத்தினர். அப்போது வைகோ பேசுகையில், " எங்களிடம் போபாலில் வைத்து விவாதிப்பதாக முதல்-மந்திரி சிவராஜ் சிங் சவுகான் வாக்குறுதி அளித்தார். ஆனால் அதற்கு மாறாக இப்போது மாநில எல்லையில் தடுத்து நிறுத்தி விட்டனர்'' என்றார். தொடர்ந்து வைகோவும், ம.தி.மு.க.வினரும் தர்ணா போராட்டத்தை அமைதியாக தொடர்ந்து கொண்டிருந்ததாக ஐ.ஜி. மதுக்குமார் தெரிவித்தார்.

தினத்தந்தி