கூடங்குளம் தாக்குதல் பற்றி விசாரிக்க ஓய்வு பெற்ற நீதிபதி தலைமையிலான மத்தியகுழு இன்று வருகை

கூடங்குளம் அணுமின் நிலையத்தை மூடக்கோரி அணுஉலை எதிர்ப்பாளர்கள் அணுமின்நிலையம் அருகே கடந்த 10-ந்தேதி முற்றுகை போராட்டம் நடத்தினார்கள். அப்போது போலீசாருக்கும், போராட்டக்காரர்களுக்கும் இடையே மோதல் வெடித்தது.

போராட்டக்காரர்களை போலீசார் தடியடி நடத்தியம், கண்ணீர் புகை குண்டுகளை வீசியும் விரட்டியடித்தனர். இந்த மோதல் சம்பவத்தில் ஏராளமான போலீசாரும், போராட்டக்காரர்களும் காயமடைந்தனர்.

இந்த தாக்குதல் சம்பவத்தை தொடர்ந்து நெல்லை மற்றும் தூத்துக்குடி மாவட்டங்களின் பல்வேறு பகுதிகளில் வன்முறை ஏற்பட்டது. போலீஸ் சோதனைச்சாவடிகள் சூறையாடப்பட்டன. மதுக்கடைகளுக்கு தீவைக்கப்பட்டது.

திருச்செந்தூர் அருகே உள்ள மணப்பாட்டில் வன்முறையை கட்டுப்படுத்த போலீசார் நடத்திய துப்பாக்கி சூட்டில் அந்தோணி என்ற மீனவர் பலியானார். போலீசார் தாக்குதல் நடத்தியதை கண்டித்து இடிந்தகரையில் அணுஉலை எதிர்ப்பாளர்கள் நடத்திய கடலில் இறங்கும் போராட்டத்தில் சகாயம் என்ற மீனவர் தவறிவிழுந்து காயமடைந்ததில் பலியானார்.

போராட்டக்காரர்கள் மீதான தாக்குதலுக்கு கண்டனம் தெரிவித்ததும், தாக்குதலுக்கு காரணமானவர்கள் மீது நடவடிக்கை எடுக்க வலியுறுத்தியும் தமிழகம் முழுவதும் போராட்டங்கள் நடந்தன.

இந்தநிலையில் அணுஉலை எதிர்ப்பாளர்கள் மீது போலீசார் நடத்திய தாக்குதல் மற்றும் 2 மீனவர்கள் பலியானது ஆகிய சம்பவங்கள் குறித்து விசாரணை நடத்துவதற்காக மத்திய உண்மை கண்டறியும் குழு இன்று இடிந்தகரை வருகிறது.

மும்பை ஐகோர்ட்டின் முன்னாள் நீதிபதி கோல்சே பாட்டீல் தலைமையில் மூத்த பத்திரிக்கையாளர் கல்பனா சர்மா, எழுத்தர் ஜோடி புரூஸ், வக்கீல் ரமேஷ் உள்ளிட்ட 6 பேர் அந்த குழுவில் இடம்பெற்றுள்ளனர். அவர்கள் இன்று டெல்லியில் இருந்து திருவனந்தபுரத்திற்கு விமானம் மூலம் வந்து, அங்கிருந்து காரில் நாகர்கோவிலுக்கு மாலை 4 மணியளவில் வருகிறார்கள்.

முதலில் அவர்கள் நாகர்கோவிலில் உள்ள கூடங்குளம் அணுஉலை எதிர்ப்பு போராட்டக்குழு ஒருங்கிணைப்பாளர் உதயகுமாரின் வீட்டிற்கு சென்று, அவரது மனைவி மீரா மற்றும் பெற்றோரிடம் விசாரணை நடத்துகிறார்கள். பின்பு அங்கிருந்து புறப்பட்டு மாலை 6.30 மணியளவில் இடிந்தகரைக்கு வருகிறார்கள்.

அங்கு போராட்டத்தில் ஈடுபட்டுள்ள மக்களிடம் தாக்குதல் சம்பவம் குறித்து விசாரணை நடத்துகிறார்கள். அவர்கள் அங்கு சுமார் 2 மணி நேரம் விசாரணை நடத்த திட்டமிட்டுள்ளதாக தெரிகிறது.

தாக்குதல் சம்பவம் குறித்து முழுமையாக விசாரிப்பதற்காக மத்திய குழுவினர் இடிந்தகரையில் 2 நாட்கள் தங்குகிறார்கள். பின்பு மத்திய குழுவினர் விசாரணை அறிக்கை தயாரித்து மத்திய அரசிடம் ஒப்படைக்க உள்ளார்கள்.

மாலைமலர்

இவர் விசாரணையை முடித்தவுடன் அறிக்கையை யாரிடம் தாக்கல் செய்வார். அரசிடம் தானே!

எய்யா நீதிமானே ஒழுங்கா வேலை செய்ய முடியாதுன்னு தானே 58 வயசுல ஒய்வு கொடுக்குறாங்க அப்படியிருக்க ஒய்வு பெற்றபிறகு நீங்க வந்து என்னத்த விசாரணை பண்ணி கிழிக்க போறீங்க

இதெல்லாம் வெறும் கண்துடைப்பு நாடகம்தான்