உயிர் கொடுத்தவள்

"அம்மா''

"அன்றைய செய்தித்தாளைப் படித்துக் கொண்டிருந்த மதுரம், மகள் தாரா கூப்பிடுவதைக் கேட்டதும் என்ன என்பது போல அவளைப் பார்த்தாள்.

"ஆபீசுலேருந்து மத்தியானம் சாந்தி சித்தி கிட்டே பேசினேன். எனக்கு கல்யாணம் நிச்சயமாயிருக்கிற செய்தியை சொன்னேன் சந்தோஷப்பட்டாங்க. பத்திரிகை அடிக்கக் கொடுத்திருக்கோம். வந்ததும் அனுப்பறேன்னு சொன்னேன். அப்புறம் வந்து..'' தயங்கினாள் தாரா..

"என்னடி வந்து... போயின்னு... சொல்லித் தொலையேன்''

"அம்மா சித்தியோட பேச்சை எடுத்தாலே உனக்கு பிடிக்காதுன்னு எனக்குத் தெரியும். இருந்தாலும் அவங்ககிட்டே, "எங்கம்மாவும் உங்களை கூப்பிடுவாங்கன்னு'' சொன்னேன். சித்தப்பாவும், சித்தியும் தான் மனையிலே உட்கார்ந்து எனக்கு கல்யாணம் செய்து வைக்கணும்னு ஆசைப்படறேன்மா''

"உன்னையே வேண்டாம்னு ஒதுக்கிட்டுப் போனவ தான் தாரை வார்த்துத் தரணுமா? முடி யாது. என்னோட பெரிய பொண்ணு தான் மனையிலே உட்காருவா'' என்றாள், சற்றே கோபத்துடன்.

மதுரத்தின் சொந்த தங்கை தான் சாந்தி. மதுரத் தின் கோபத்திற்கும் காரணம் இருந்தது.

மதுரத்தின் கணவர் சம்பந்தம் பள்ளிக்கூடத்தில் எழுத்தர் வேலையில் இருந்தார். ஆண் குழந்தை வேண்டும் என்று ஆசைப்பட்டவருக்கு மூன்றாவ தாகத்தான் மகன் பிறந்தான். முதல் இரண்டும் பெண் குழந்தைகள். நடுத்தர வர்க்கத்திற்கு இந்த மூன்று குழந்தைகளே அதிகம் என்று நினைத்த மதுரம், எதிர்பாராமல் நான்காவதாக கர்ப்பம் தரித்தபோது அதிர்ந்து தான் போனாள்.

"மதுரம்...இந்த மூன்று குழந்தைகளையும் நாம ஒழுங்கா வளர்த்தா போதும். நாலாவது குழந்தை நமக்கு வேண்டாம். நாப்பது நாள் தானே ஆயிருக்கு. வா லேடி டாக்டரை பார்த்துவிட்டு வருவோம்'' என்று கணவர் சம்பந்தம் கூறவே, மதுரத்திற்கும் அதுவே சரியென்று பட்டது.

மருநாள் மதுரம் ஆஸ்பத்திரிக்கு, கிளம்பிக் கொண்டிருந்தாள். அந்த சமயம் பார்த்து அவள் தங்கை சாந்தி உள்ளே நுழைந்தாள். கல்யாணம் ஆகி பத்து வருஷம் ஆகியும் தாயாகும் பாக்கியம் அவளுக்கு கிடைக்கவில்லை.

"அக்கா... கருவிலே இருக்கற சிசுவை அழிச்சுடாதே. உன் வயிற்றிலே வளர்றது என்னோட குழந்தைன்னு நினைச்சுக்கோ. குழந்தை பிறந்ததும் நானே என் சொந்தக் குழந்தை மாதிரி வளர்ப்பேன் ப்ளீஸ் அக்கா ப்ளீஸ்'' என்று கெஞ்சிய தங்கையைப் பார்க்க பாவமாக இருக்கவே, ஆஸ்பத்திரிக்குச் செல்லும் எண்ணத்தை கைவிட்டாள்.

ஆஸ்பத்திரியில் பெண் குழந்தையை பெற்றெடுத்த நேரத்தில் தங்கைக்கும் தகவல் அனுப்பினாள். தங்கை சாந்தியும் குடும்பத்தோடு வந்தாள். ஆனால் நடந்தது...

"ஆண் குழந்தையா இருந்தா தூக்கிட்டுப் போகலாம்னு நெனச்சேன். பொம்பளப் பிள்ளை எங்களுக்கு வேண்டாம்'' என்று சாந்தியின் மாமியார் பட்டென்று சொல்லி விட்டார்.

"என் மாமியாரை எதிர்த்து என்னாலே எதுவும் செய்ய முடியாதுக்கா...'' என்று சாந்தியும் சொல்லி விட்டாள். தங்கையின் பேச்சும் செய்கையும் மதுரத்தின் உள்ளத்தை துளைத்து விட்டது. அதிலிருந்து அக்கா-தங்கைக்குள் சரியான பேச்சு வார்த்தை இல்லாமல் போனது..

அடுத்த வருடமே சாந்தி உண்டானாள். என் மகளை வேண்டாம் என்று சொன்னவளுக்கு பெண் குழந்தை தான் பிறக்க வேண்டும் என்று சொல்லிக் கொண்டிருந்தாள் அக்கா மதுரம்.. அவள் வாக்கு பலித்தது. மதுரத்திற்கு பெண் குழந்தை பிறந்ததும் சொல்ல முடியாத சந்தோஷம் மதுரத்திற்கு.

கொடிக்கு காய் பாரமா? கஷ்டப்பட்டு நான்கு குழந்தைகளையும் மதுரம் படிக்க வைத்தாள். மூத்த மகள் இரண்டாவது மகள் இருவருக்கும் நல்ல இடத்தில்
திருமணம் செய்து கொடுத்தாள். பையன் என்ஜினீயருக்குப் படித்து முடிக்கும்
சமயத்தில் அவள் கணவர் சம்பந்தம் இறந்து விட்டார். தாராவுக்கும் வேலை கிடைக்க, முன்பு போல் பணக் கஷ்டம் இல்லை. ஏனோ தன்னை ஏமாற்றிய தங்கையை அவளால் மன்னிக்க முடியவில்லை.

மகள் மறுபடியும் பேச ஆரம்பிக்க மதுரம் நிகழ்காலத்திற்கு வந்தாள்.

"அம்மா...இன்னிக்கும் பெண் குழந்தை பிறந்தா கள்ளிப் பாலை கொடுத்து சாகடிக்கும் நிலமை இருக்கத்தான் செய்கிறது. மாமியார் வேண்டாம்னு சொன்னதால சித்திக்கு தைரியம் இல்லை. ஆனா நான் இந்த உலகத்துக்கு வர காரணமா இருந்தவங்களே அவங்க தானே. நீ அழிக்க நினைச்சே. ஆனா அவங்க தடுத்து நிறுத்தி எனக்கு உயிர்ப்பிச்சை கொடுத்தது அவங்க. பத்து மாதம் என்னை சுமக்காதவங்க தான். என்னை பாலூட்டி சீராட்டி வளர்க்காதவங்க தானே. அதனால அவங்களும் எனக்கு அம்மா மாதிரி தான். `உன்னை அழிக்கணும்னு நினைச்சேன். ஆனா நீ மரகதச் சிலையா இருக்கே'ன்னு அடிக்கடி நீ என்கிட்ட சொல்வே இல்லே... மணவறையில தாயாக உட்கார்ந்து என்னை தாரை வார்த்துக் கொடுக்கும் போது அவங்க மனசிலேயும் அந்த நிமிஷத்திலாவது என்னை வேண்டாம்னு மறுத்த குற்ற உணர்வு வந்து தானே போகும்!''

மகள் கூறியவற்றில் உள்ள உண்மை உறைத்தது மதுரத்திற்கு.

"சரி உன் இஷ்டப்படியே நடக்கட்டும்மா'' கசப்பு மறந்து கனிவோடு மகளைப் பார்த்தாள் அம்மா .

உயிர் குடுத்தவள் ... ரொம்ப அருமையான கதை...
பகிர்வுக்கு நன்றி தம்பி...