ஒரு கடவுளும் சில பூக்களும்

**சிவா** · **சிவா** Sat Aug 04, 2012 11:00 am

கருவறைக்குள்
மூலவராய் நின்று
அருள்பாலிக்கும்
எங்களூர் சாமி
வருடம் ஒருமுறை
உற்சவராய்
உலா வருவார் தெருக்களில்

மூட்டு வலியில்
முடங்கிப்போன அப்பா
விதவையான பின்
வீட்டைவிட்டு வெளியே வராத பாட்டி
நேரில் போய்
தரிசிக்க முடியாத
வேலைப் பளுவோடு அம்மா

இப்படியாக
வருடம் முழுக்க
தன்னை வந்து பார்க்க இயலாத
பக்தர்களுக்காக
வீதி இறங்கி வர
சம்மதித்த சாமி...

படையல் வைத்து
நாள் தவறாமல் விரதமிருந்து
அர்ச்சனையாலும் அபிஷேகத்தாலும்
ஆராதித்து
வெள்ளி, செவ்வாயில்
விரல் நோகக் கட்டிய
பூச்சரம் சாற்றி
வழிபட்டிருந்தாலும்

எல்லோராலும் விலக்கப்பட்டு
கொல்லையில்
உட்கார்ந்திருந்த எனக்கு
தரிசனம் தர
மனம் இரங்காமல்
திரும்பிப் போன அன்றும்

அடுத்த வார
அர்ச்சனைத் தட்டின்
பூக்களுக்காக
மொட்டுவிட்டது
என் வீட்டு பவளமல்லிச் செடி.

- சுமதிஸ்ரீ