காதல் செய்ததால் தண்டனை : 16 வயது சிறுமிக்கு கசையடி ஆப்கானிஸ்தானில் பயங்கரம்

by **சிவா** Mon Sep 17, 2012 11:35 pm

காஸ்னி :ஆப்கானிஸ்தானில் காதல் செய்த 16 வயது டீன் ஏஜ் இளம்பெண்ணுக்கு கசையடி தண்டனை வழங்கப்பட்டது. சம்பந்தப்பட்ட காதலனுக்கு ரூ.90 ஆயிரம் அபராதம் விதிக்கப்பட்டுள்ளது. ஆப்கானிஸ்தானில் உள்ளது காஸ்னி மாகாணம். இங்கு தலிபான்களின் ஆதிக்கம் அதிகம். இந்த மாகாணத்தில் உள்ள ஜகுரி கிராமத்தில் ஒரு வாலிபரை 16 வயது இளம்பெண் சபீரா என்பவர் காதலித்துள்ளார். இந்த விஷயம் கிராம மக்களுக்கு தெரிய வந்தது. இதுகுறித்து நடந்த கிராம பஞ்சாயத்தில் சபீராவுக்கு கசையடி வழங்கவும், காதலனுக்கு ரூ.90 ஆயிரம் அபராதம் விதிக்கவும் முடிவெடுக்கப்பட்டது. அதன்படி தண்டனை நிறைவேற்றப்பட்டதாக தெரிகிறது.

இதுகுறித்து மாகாண பெண்கள் நலத் துறை தலைவர் சுக்ரியா வாலி கூறுகையில், சபீராவுக்கு வெள்ளை உடை அணிவித்து கிராம மக்கள் மற்றும் குடும்பத்தினர் முன்னிலையில் கசையடி கொடுத்துள்ளனர். இப்போது அவளுடைய உடல்நலம் பாதிக்கப்பட்டுள்ளது. இந்த சம்பவம் கடந்த 9ம் தேதி நடந்துள்ளது என்றார். ஜகுரி கவர்னர் ஜபார் ஷெரீப் கூறுகையில், சம்பவம் நடந்தது உண்மை என்று உறுதியாகி உள்ளது. இதுகுறித்து தீவிர விசாரணை நடத்த அதிகாரிகளை அனுப்பி உள்ளோம் என்றார்.