புகுந்த வீடு

அன்று சனிக்கிழமை. காலை முதல் காமாட்சி ஆவலோடு அடிக்கடி வாசலைப் பார்த்தபடி இருந்தாள். அவள் படும் அவஸ்தையைச் சாய்வு நாற்காலியில் சாய்ந்தபடி கணவர் கணபதி மவுனமாக ரசித்துப் பார்த்தபடி இருந்தார்.

தமயந்தி உள்ளே நுழைந்ததும் காமாட்சி வாயெல்லாம் பல் தெரிய "வாம்மா எப்படி இருக்கே? ரெயில் லேட்டா?'' விசாரித்தபடி காபி கொண்டு வந்து நீட்டினாள்.

காபியை பருகியவள், "அம்மா நீ நிம்மதியாக டிவி பார்'' எனக் கூறி விட்டு சமையலறைக்குள் நுழைந்தாள். சமையலறை மற்றும் எல்லா அறைகளையும் சுத்தம் செய்துவிட்டு, வாஷிங் மெஷினில் துணிகளைப் போட்டு விட்டு `உஸ் அப்பாடா' என்று வந்து உட்கார்ந்தாள்.

"அம்மா! வீடு ஏன் இப்படி குப்பையும் கூளமுமாக இருக்கிறது?''

"என்னம்மா செய்றது? வயசாயிட்டதால வேலை செய்ய முடியலை. நீ வாராவாரம் வந்து சரிசெய்துட்டுப் போறே. அங்கே உன் புகுந்த வீட்டிலும் வாரம் பூராவும் வேலைவேலைன்னு தான்இருக்கிறே... அதோட உன் கணவரையும் பார்த்துக்கணும். அங்கேயிருக்கிற இரண்டு கிழடுகளைப் பார்த்துக்கணும். பாவம் நீ...'' மகளுக்காகக் கவலைப்பட்டாள் காமாட்சி.

என்னம்மா செய்றது? இன்று என் கணவர் எங்கேயாவது போகலாம்னு தான் சொன்னார். அவருக்கு வாரம் பூராவும் வேலை. தினமும் இரவு எட்டு மணிக்குத்தான் வீடு திரும்புகிறார். நான் தான் ஏதோ சொல்லி சமாளிச்சிட்டு வந்துட்டேன். அதில் அவருக்குக்கூட வருத்தம் தான்.''

"நீ செஞ்சது தாம்மா சரி. பாவம் நீ அவங்க வீட்டிலே தான் வாரம் பூராவும் உழைக்கிறே.. அம்மா பாசத்துல ஒருநாள் ஓடி வந்துர்றே. அதுகூட அவங்களுக்கு பொறுக்கலியாக்கும்?

தமயந்தி ஏதோ சொல்ல வாயெடுப்பதற்குள் அப்பா கணபதி குறுக்கிட்டார். "தமயந்தி...நீ ஆபீஸ் போனா எப்ப திரும்பி வருவே? கேட்டார் கணபதி.

"இரவு ஏழு மணிக்கு வருவேம்ப்பா. ஏம்ப்பா?''

"நீ வீட்டிற்கு வந்தபின் இரவு சாப்பாடு செய்வியா? ஆபீஸ் போகும் அவசரத்தில் காலையில் முடிக்காமல் போன காரியங்களை எப்பொழுது செய்வே?

"இரவு சாப்பாட்டை மாமியார் செய்துடுவாங்கப்பா. நான் காலையில் கழுவாமல் போட்டுவிட்டுப் போயிருந்த பாத்திரங்களையும் தேய்த்து கழுவி வெச்சிடுவாங்க.''

"அப்ப...வீட்டிற்கு வந்தால் உனக்கு வேலை ஒண்ணுமிருக்காது. ஜாலிதான்.''

அப்பா இப்படிச் சொன்னதும் அம்மாவுக்கு வந்ததே ஆத்திரம்.

"என்ன பேச்சு பேசுறீங்க? குழந்தை எப்படி ஜாலியா இருக்க முடியும்? காலையில் சீக்கிரம் எழுந்து டிபன் செய்யணும், மத்தியானம் லஞ்ச் செய்து கிழடுகளுக்கு வைக்கணும். ஆபீஸ் போகணும், பாவம் தமயந்தி ஓய்வில்லாமல் கஷ்டப்படறா..''.

"அம்மா நான் எழுந்து வருவதற்குள் மாமியார் சமையல் செய்துடுவாங்க. நான் டிபன் மட்டும் செய்வேன்.''

தமயந்தி உனக்கு திருமணம் நடந்து மூணு மாசம் தான் ஆகிறது. மாப்பிள்ளை சனி, ஞாயிறு விடுமுறையில் உன்னுடன் ஜாலியா வெளியே போய்வர விரும்புவார். உன் வயதான மாமியார் வாரம் பூராவும் உழைத்து விட்டு ஞாயிறு ஓய்வெடுக்க விரும்புவாங்க. ஆனால் நீ என்ன செய்றே? அவர்கள் விருப்பத்தை நிறைவேற்றாமல் இங்கு வந்து ஏற்கனவே சோம்பேறி லிஸ்ட்ல இருக்கிற உன் அம்மாவை இன்னும் சோம்பேறியாக்கறே! ஏன், உன் அம்மாவால் எனக்கு மட்டும் செய்ய முடியாதா?அங்கே நீ உன்னோட கணவரின் ஆசையை நிறைவேற்றாவிட்டால் அவருக்கு உன் மீது கோபம் வரும். பிரச்சினை வரும். உன் மாமனார், மாமியார் நல்லவங்களா இருப்பதால் உன்னை இங்கு வாராவாரம் வர அனுமதிக்கிறாங்க. அவங்க மனசை நோகடிக்காதே. எப்ப உனக்கு திருமணம் நடந்துச்சோ அப்ப இருந்தே உன் சொந்தவீடு நீ புகுந்த வீடுதான். அங்குதான் உனக்கு எல்லாம். வீணா நீயே உன் வாழ்க்கையை நாசம் செய்துக்காதே, பிறகு உன் இஷ்டம்.'' நீண்ட அறிவுரை கூறினார், கணபதி.

"ஸாரிப்பா. நான் தவறு செய்து விட்டேன். நான் இப்பொழுதே என் வீட்டிற்கு கிளம்புகிறேன்.'' தவறு உணர்ந்து அப்போதே புறப்பட்டாள் தமயந்தி.

- கே.என்.எஸ். மணியன்