மச்சான்...

அப்பா, சிவலிங்கத்துக்கு மகன் பாலு மீதும் கடைக்குட்டி மகள் மோகனா மீதும் கோபம் கோபமாய் வந்தது.

இரண்டு வருஷத்துக்கு முன்னால் மூத்த மகள் தேவிகாவுக்கு திருமணம் நடந்தது. பொல்லாத நேரம், அஞ்சு மாசத்துக்கு முன்பு ஸ்கூட்டியை ஓட்டிக் கொண்டு போனவள், லாரியில் அடிபட்டு, அந்த இடத்திலேயே உயிரை விட்டு விட்டாள்.

அந்த அதிர்ச்சியிலிருந்து சிவலிங்கம் மீண்டு வருவதற்குள் இப்போது மீண்டும் ஒரு அதிர்ச்சியான செய்தி அவரோட காதுகளுக்கு எட்டியிருக்கிறது. பாலுவும், மோகனாவும் சேர்ந்து அக்காவின் புருஷனுக்காக, தீவிரமாய் பெண் தேடும் வேலையில் இறங்கியிருக்கிறார்களாம். மகள் போன பின்பு அவருக்கு மருமகன் மேலிருந்த கரிசனமெல்லாம் சுத்தமாய் போய் விட்டது. நேரிலே பார்த்தாலும் எதுவும் பேசாமல் ஒதுங்கியே போனார். மகனும், மகளும் மச்சானைப் பற்றி பேச்செடுத்தாலே, அவருக்குள்ளே எரிச்சல் எகிறிப் போகிறது.

இப்படியிருக்க, இவங்க ரெண்டு பேரும் என்னா வெங்காயத்துக்கு அந்தாளுக்காக பெண்ணைத் தேடி அலையணும்? கடுப்பாய் குமுறிக் கொண்டிருந்தவர் மகனையும், மகளையும் கூப்பிட்டு நிறுத்தி கோபத்தைக் காட்டினார்.

"ரெண்டு பேரும் ரொம்பவும் கரிசனப்பட்டு மச்சானுக்காக பொண்ணத் தேடி அலையறீங்களாமே. உங்களுக்கொண்ணும் பைத்தியமில்லையே.....'' குத்தலாய் கேட்டார்.

"என்னப்பா இப்படி பேசறீங்க? நாங்க என்ன மூனாவது, நாலாவது மனுஷனுக்காகவா பொண்ணத்தேடி அலையறோம். செத்துப்போன அக்கா புருஷனுக்காகத் தானே பொண்ணத் தேடுறோம்...'' மோகனா தணிவாய் சொன்னாள்.

"என்னா பெரிய அக்கா புருஷன்... நம்ம வீட்டுப் பொண்ணே, மண்ணோடு மண்ணாய் போன பொறவு அந்தாளுக்காக நாம் ஏன் சிரமப்படணும்?''

"என்னப்பா ஊருலகம் தெரியாத மனுஷராட்டம் பேசறீங்க... ஒரு குடும்பத்துல கட்டிக்கொடுத்த பொண்ணு புருஷனால வதை பட்டு மாமியார் நாத்தனாரால சித்ரவதைக்கு உட்பட்டு, கொடுமை தாங்காம செத்துப் போய்ட்டா, பெத்தவங்க, கத்திக்கதறி மண்ண வாரியடிச்சு சாபமெல்லாம் போட்டு போலீசுக்குப் போய் கேசெல்லாம் போடுறதை பார்த்திருக்கோம். ஆனா இப்படி எதுவுமே இல்லாம அக்காவோட வாழ்ந்த கொஞ்ச காலத்திலும் அவளோட அன்பை பரிபூரணமா பெற்ற மச்சானுக்கு ஒரு நல்ல வாழ்க்கை தேடிக்கொடுத்தா தாம்ப்பா அகால மரணம் அடைஞ்ச அக்காவோட ஆத்மா சாந்தியடையும். நாம ஒரு நல்ல மருமகனுக்காக, கண்ணியமான மச்சானுக்காக ஏம்பா ஒரு நல்ல பொண்ணா பாத்து கட்டி வைக்க முயற்சி பண்ணக்கூடாது?''

மகள் மோகனாவின் நியாயமான தெளிவான பேச்சைக் கேட்ட அப்பா சிவலிங்கம், அதற்குமேல் வாயைத் திறந்து எதையுமே சொல்லவில்லை.

பி.எஸ்.நீலவண்ணன்

நமீதாதான் ஏதோ சொல்லி இருக்காங்களோன்னு உள்ள வந்தேன்.

பகிர்வுக்கு நன்றி சிவா.

என்னையா கூப்பிட்டீங்க மாமா அங்கள். என்ன விசயம்ழ