காக்கையின் கனவுகளில் கூடு

by nagailango Sun Sep 16, 2012 8:25 am

-மலையருவி (முனைவர் நா.இளங்கோ)

சுள்ளிகள் பொறுக்கும்
காக்கையின் கனவுகளில்
கூடு..,

கூட்டில் குலவும்
இணையின்
இதமான உரசலும் நெருக்கமும்,

நெருக்கத்தில் விளைச்சலில்
கூடுநிறை முட்டைகள்,

சிறகணைப்பின் சூட்டில்
சிலிர்த்துத் தலைநீட்டும்
குஞ்சுகள்,

வழியெல்லாம் தேடி
வாகாய்க் கொணர்ந்த
இரை,

இரை கேட்டு
வாய் பிளக்கும்
குஞ்சுகளின் பசிக்குரல்,

பசி தீர்க்கும் தாய்மையின்
பரிவான வாய் ஊட்டல்.

ஓயாத பகற்கனவும்
அயராத உழைப்புமாய்க்
காலம் கடக்க,
நனவானது
முதல்கனவு

கூட்டின் முழுமையில்
குதூகலித்துத்
துயில் கொண்ட
முதல்நாள் இரவு

கருத்தது மேகம்
சிறுத்தது மேனி
சுழன்றது காற்று
உழன்றது மரக்கிளை
கூடு சிதைந்தது
காடு கவிழ்ந்தது

உயிர்த்தெழுந்த காகம்
மீண்டும்
சுள்ளிகள் பொறுக்கும்.

சுள்ளிகள் பொறுக்கும்
காக்கையின் கனவுகளில்
மீண்டும் கூடு..

by **சிவா** Sun Sep 16, 2012 8:44 am

//சுள்ளிகள் பொறுக்கும்
காக்கையின் கனவுகளில்
மீண்டும் கூடு.. //

கவிதையை அழகாகத் துவங்கி சிறப்பாக முடித்துள்ளீர்கள்! பாராட்டுக்கள் ஐயா! நன்றி

by nagailango Sun Sep 16, 2012 8:55 am

நேர்த்தியான வாசிப்புக்கு நன்றி!
-முனைவர் நா.இளங்கோ

by **சிவா** Sun Sep 16, 2012 8:58 am

nagailango wrote:நேர்த்தியான வாசிப்புக்கு நன்றி!
-முனைவர் நா.இளங்கோ

தாங்கள் எங்களுடன் இணைந்ததில் மிக்க மகிழ்ச்சி! நான் உங்களைப் பற்றி அறிவேன், அதே நேரம் நம் உறவுகளும் தங்களைப் பற்றி அறிந்து கொள்ள ஏதுவாக உறுப்பினர் அறிமுகம் பகுதியில் ஒரு சிறு அறிமுகத்தை தாருங்கள் ஐயா!