இலங்கையில் தமிழர்கள் நிலையை நேரில் அறிய தமிழக எம்.பி.க்கள் இன்று பயணம்

சென்னை: இலங்கையில் தமிழர்களின் நிலை குறித்து ஆய்வு செய்யவுள்ள தமிழக எம்பிக்கள் குழுவினர் இன்று புறப்படுகின்றனர். அவர்கள் நேற்று தமிழக முதல்வர் கருணாநிதியை சந்தித்து ஆலோசனை நடத்தினர். ‘இலங்கை போரின் போது உள்நாட்டில் இடம் பெயர்ந்த லட்சக்கணக்கான தமிழர்கள் மீண்டும் அவர்களது வீடுகளுக்கு திரும்பவும், அவர்களுக்கு நிவாரணம் மற்றும் மறுவாழ்வு அளிக்கவும் தேவையான நடவடிக்கைகளை எடுக்க இலங்கை அரசை வலியுறுத்த வேண்டும்.

அப்பாவி தமிழக மீனவர்கள், இலங்கை கடற்படையினரால் தாக்கப்படுவதை தடுத்து நிறுத்தும்படி எச்சரிக்கை செய்ய வேண்டும்’ என்று கடந்த மாதம் 22ம் தேதி தமிழகத்தை சேர்ந்த திமுக, காங்கிரஸ், விடுதலை சிறுத்தைகள் கட்சிகளை சேர்ந்த எம்பிக்கள் பிரதமர் மன்மோகன் சிங், சோனியா காந்தி ஆகியோரை சந்தித்து வேண்டுகோள் விடுத்தனர். இதையடுத்து, கடந்த 3ம் தேதி உள்துறை அமைச்சர் ப.சிதம்பரம், முதல்வர் கருணாநிதியை சந்தித்து பேசினார். பின்னர் நிருபர்களிடம் கூறுகையில், ‘‘இலங்கைக்கு எம்பிக்கள் குழுவை அனுப்புவது பற்றி மத்திய அரசு ஆலோசித்து வருகிறது’’ என்றார்.

இந்நிலையில், முதல்வருடன் நேற்றுமுன்தினம் தொலைபேசியில் சிதம்பரம் பேசினார். பத்தாம் தேதி காலை தமிழக எம்பிக்கள் 10 பேர் கொண்ட குழு, இலங்கை செல்லவும் அங்கு 5 நாட்கள் பல பகுதிகளை பார்வையிடவும் முடிவு செய்யப்பட்டது. எம்பிக்கள் குழுவை சேர்ந்த எம்பிக்கள் டி.ஆர்.பாலு, கனிமொழி, டி.கே.எஸ்.இளங்கோவன், விஜயன், ஹெலன், சித்தன், சுதர்சன நாச்சியப்பன், கே.எஸ்.அழகிரி, திருமாவளவன் மற்றும் தமிழக காங்கிரஸ் தலைவர் தங்கபாலு ஆகியோர் முதல்வர் கருணாநிதியை அவரது இல்லத்தில் நேற்று சந்தித்து பேசினர். பின்னர் நிருபர்களிடம் தங்கபாலு கூறியதாவது: தமிழக முதல்வர் கருணாநிதிக்கு, இலங்கை அதிபர் ராஜபக்சே கடிதம் எழுதி உள்ளார். அதில், இலங்கைக்கு வந்து இலங்கை தமிழர்கள் முகாம்களை பார்க்கும்படி அழைப்பு விடுத்திருந்தார்.

அதன் அடிப்படையில் தமிழக மக்கள் சார்பில் தமிழகத்தை சேர்ந்த எம்பிக்கள் 10 பேர் கொண்ட குழுவினர் டி.ஆர்.பாலு தலைமையில் இலங்கை செல்கின்றனர். நாளை 10ம் தேதி முதல் 14ம் தேதி வரை 5 நாட்கள் இலங்கையில் தமிழர்கள் வாழும் பகுதிகளை அவர்கள் பார்வையிடுகின்றனர். இலங்கை அரசியல்வாதிகள், அதிகாரிகளை சந்தித்து பேசுகின்றனர். முகாம்களை பார்வையிட்டு உண்மை நிலையை கண்டறிய உள்ளனர். அதன்பிறகு அறிக்கை தயார் செய்து முதல்வரிடம் சமர்ப்பிப்பார்கள்.

அதை வைத்து முதல்வர் கருணாநிதி, தமிழர்களுக்கு செய்ய வேண்டிய உதவிகள் மற்றும் நடவடிக்கைகள் குறித்து மத்திய அரசுடன் ஆலோசனை நடத்துவார். எம்பிக்கள் எங்கெங்கு செல்ல வேண்டும் என்பதை தமிழக அரசு, மத்திய அரசு மற்றும் இலங்கை அரசு ஆகிய 3 அரசுகளும் முடிவு செய்யும். இலங்கை அதிபர் ராஜ பக்சேவையும் சந்தித்து பேசுவார்கள். இவ்வாறு தங்கபாலு கூறினார். முதல்வரை சந்தித்த 9 எம்.பி.க்களுடன் ஜே.எம்.ஆரூணும் இலங்கை செல்லும் எம்.பி.க்கள் குழுவில் இடம் பெற்றுள்ளார்.