நிச்சயமா இந்தியா ஏழை நாடு இல்லைங்க...

நிச்சயமா இந்தியா ஏழை நாடு இல்லைங்க...


உபயோகமான வேலை ஒன்றை -"ஜனநாயக சீர்திருத்தம் மற்றும் தேசிய தேர்தல் கண்காணிப்பகம்" என்ற தன்னார்வ அமைப்பு செய்துள்ளது. 2004ல் இருந்து 2011ம் ஆண்டு வரை, நாட்டில் உள்ள அரசியல் கட்சிகளுக்கு, கிடைத்த வருமானம் எவ்வளவு என்பதைக் கண்டறிய ஆய்வு மேற்கொண்டது. அந்த ஆய்வின் முடிவில் - கட்சிகள் எல்லாம் வசூல் மன்னர்களாக இருப்பது தெரிய வந்துள்ளது. ஊழல் மற்றும் வாரிசு அரசியலில் மட்டுமல்ல - சொத்து சேர்ப்பதிலும் காங்கிரஸ்க்கே முதலிடம் கிடைத்துள்ளது.

நூற்றாண்டு கண்ட காங்கிரஸ்க்கு இந்த பெருமை கூட இல்லையென்றால் எப்படி. 2004ல் இருந்து 2011ம் ஆண்டு வரை, காங்கிரஸ் கட்சிக்கு - 2,008 கோடி ரூபாயும், எதிர்க்கட்சியான பா.ஜ., வுக்கு, 994 கோடி ரூபாயும், வருமானமாய் கிடைத்துள்ளது. மொத்தமாக - நாட்டிலுள்ள அரசியல் கட்சிகள் அனைத்துமாக 4,662 கோடி ரூபாய் வருமானத்தை ஈட்டியுள்ளன.

கடந்த ஏழு ஆண்டுகளில், நாட்டில் உள்ள அரசியல் கட்சிகள் - தேர்தல் ஆணையத்திடம் தாக்கல் செய்துள்ளதன் மூலமும் மற்றும் வருமான வரி கணக்கு விவரங்கள் மூலமும், தகவல் அறியும் உரிமைச் சட்டத்தின் கீழும், வருமான வரித்துறையிடம் பெற்ற, தகவலின் அடிப்படையிலும், கட்சிகளின் வருமானம் கணக்கிடப்பட்டுள்ளது. நாடு முழுவதும் உள்ள அரசியல் கட்சிகள், ஏழு ஆண்டுகளில், பெருமளவு வருவாய் ஈட்டியுள்ளன. வருமானத்தில் மூன்றாவது இடம், மாயாவதியின் பகுஜன் சமாஜ் கட்சிக்கு கிடைத்துள்ளது. ஏழு ஆண்டுகளில், 484 கோடி ரூபாய் வருவாய் ஈட்டியுள்ளது.

ஆட்சியிலிருந்தாலும் இல்லாவிட்டாலும் வருமானத்திற்கு அரசியல் கட்சிகளுக்கும் பஞ்சமில்லை. அரசியல்வாதிகளுக்கும் பஞ்சமில்லை. அவர்களை ஆட்சியில் உட்கார வைத்து அழகு பார்க்கும் பொதுமக்களுக்கோ - வேலைக்கு போனால் தான் காசு. ஏழை எளியவர்களின் கட்சியான மார்க்சிஸ்ட் கம்யூனிஸ்ட் கட்சிக்கு, 417 கோடி வருமானம் கிட்டியுள்ளது. இல்லையென்றால் நட்சத்திர விடுதி போல பிரம்மாண்டமாய் கட்சி அலுவலகம் கட்ட முடியுமா? தொழிலாளர்களுக்கெல்லாம் கம்யூ கட்சி சொத்து பெருமையளிக்குமே.



அதே நேரத்தில், அதன் சகோதர கட்சியான இந்திய கம்யூனிஸ்ட் கட்சி, 6.7 கோடி ரூபாய் அளவுக்கு மட்டுமே, வருவாய் ஈட்டியுள்ளது. என்ன கஷ்ட காலமோ அதற்கு. சமாஜ்வாதி கட்சிக்கு, 278 கோடி ரூபாய் வருவாய் கிடைத்துள்ளது. தேசியவாத காங்கிரஸ், 160 கோடி ரூபாய் வருவாய் பெற்றுள்ளது. மாநில கட்சிகளில் அ.தி.மு.க., 59 கோடிகளையும், தெலுங்கு தேசம், 53 கோடிகளையும், தி.மு.க., 44 கோடிகளையும், சிவசேனா, 32 கோடிகளையும், சிரோன்மணி அகாலி தளம், 25 கோடி ரூபாய்களையும் வருவாயாக ஈட்டியுள்ளன.

இந்த ரேஸில் தி.மு.க., வை அ.தி.மு.க., பின்னுக்கு தள்ளியது ஆச்சர்யமாக உள்ளது. கணக்கில் ஏதேனும் கோளாறு, பிழை இருக்கலாம். வருமானம் எல்லாம் பெரும் பணக்காரர்களிடம், நிறுவனங்களிடம் நன்கொடையாக பெற்றவை. ஏழை பாழைகளிடம் உண்டியல் குலுக்கி அல்ல... இப்படி இருக்கும்போது - அரசியல் கட்சிகள் யாருக்கு விசுவாசமாக இருக்கும். நாட்டு மக்களுக்கா, பணக்கார முதலைகளுக்கா... சுரங்க ஊழலில் தொடர்புடையதாக கருதப்படும் சில நிறுவனங்களும், அரசியல் கட்சிகளுக்கு நன்கொடை அளித்துள்ளதாம்.

நன்கொடை பெறுவதில், விதிமுறைகள் மீறலும் நடந்துள்ளன. அரசியல் கட்சிகளின், நிதி திரட்டும் நடவடிக்கையை ஒழுங்குபடுத்தினால் மட்டுமே, விதி மீறல்களை கட்டுப்படுத்த முடியும்." என்று ஜனநாயக சீர்திருத்தம் மற்றும் தேசிய தேர்தல் கண்காணிப்பகம் என்கிற தன்னார்வ அமைப்பு தெரிவித்துள்ளது.இந்த சொத்து விபரத்தை பார்த்து "நம் கட்சியை விட அந்த கட்சி ஏதய்யா அவ்வளவு வருமானம்" என்று வயிறு எரிந்து முறைகேடாக வருவாயை பெருக்க முனைய வேண்டாம். பெரிய கட்சிகளுக்கு எப்படியோ நன்கொடை கிடைத்துவிடுகிறது.


லெட்டர் பேடு கட்சிகள், சின்ன கட்சிகள், சினிமா நடிகர் கட்சிகள், சாதி கட்சிகளுக்கு எப்படி வருமானம் கிடைக்கிறது. இருக்கவே இருக்கிறது கட்டப்பஞ்சாயத்து. இன்றைக்கு தமிழகத்தில் - பெரிய, சிறிய என்கிற பேதமின்றி பெரும்பாலான அரசியல்கட்சிகள் - சொந்தமாய் கட்சி அலுவலகம், சொந்தமாய் தொலைக்காட்சி சேனல் இல்லாமல் இல்லை என்பது குறிப்பிடத்தக்கது. அரசியல் கட்சிகள் ஏன் இந்தியா ஏழை நாடு என்றால் ஒப்பு கொள்ள மறுக்கிறது என்பது புரிகிறதா?

ஆக்கத்திற்கு உதவி, தினமலர் செய்தி.

தினமலர் - உன்ன மாதிரி பத்திரிகைய ஒழிச்ச இந்திய முன்னேறிடும் ..

சரியாக சொன்னீர்கள் மதன்.

இந்த பொய் கணக்கிலையே இவ்ளோ கோடீன்னா
மெய்யாலுமே எம்புட்டு கோடிய அடிச்சிருப்பானுங்க இந்த கேடிங்க...

இதையெல்லாம் நாம யாருக்கு புரியவைக்கிறோம் யார் புரிந்துக் கொண்டு என்ன ஆகப்போகிறது... இந்தியா ஏழை நாடு இல்லை என்றால் ஏன் இந்தியாவில் ஏழைகள் வாழ்கிறார்கள்.??

நல்ல விழிப்புணர்வு தகவல்