உயிர்வலி - வைரமுத்து

by **சிவா** Tue Sep 11, 2012 10:48 am

சின்னஞ்சிறியது இதயம்
இதில்
எத்தனை உடல்கள் புதைப்பேன் என்றேன்...

அனுபவம் என்றது மரணம்.

புல்லாங்குழல் ஒடிக்க
மலையடையும் போதெல்லாம்
காடு கரியாகக் கண்டேன்..

அனுபவம் என்றது ஏமாற்றம்.

நான் கடையும் பாற்கடல் மட்டும்
நஞ்சு வந்ததும் நின்று போவதேன்?
உயிர் உடைந்தழுதேன்...

அனுபவம் என்றது தோல்வி.

விருது வாங்கிவைக்க
வீட்டிலும் இடமில்லை
மரணம் வாங்கி வைக்க
நெஞ்சிலும் இடமில்லை
கதறிச் சிதறினேன்

அனுபவம் என்றது முரண்பாடு

சல்லிவேர்விட்ட
சநதோஷம் தீருமுன்னே
கிளை அறும் ஓசை
கிழிக்கிறது காதை என்றேன்.....

அனுபவம் என்றது இழப்பு.

சுடலைப்பொடி பூசி
நடனம் கொண்டாடி அலைய
நானொன்றும் சிவபெருனமான்
இல்லையென்று அழுதேன்...

அனுபவம் என்றது இடுகாடு

வால்நட்சத்திரமும்
மரணமும்
தூரத்தில் ஆச்சரியம்
பக்கத்தில் பயங்கரமென்றேன்..

அனுபவம் என்றது நிஜம்.

நான் கண்ணால் பார்த்த யாரும்
எனக்கு முன்னால் பயணப்பட வேண்டாம்
காற்று கிழியக் கத்தினேன்

அனுபவம் என்றது எதார்த்தம்.

பூவில் செய்த என் மனசு
இதில்
எலும்புத்தூள் சாம்பல்
நிரப்பாதே காலமே
நிறுத்தென்று கதறினேன்........

அனுபவம் என்றது வலி.

பாழாய்ப்போன அனுபவம்
பாதிச் சாவு அனுபவம்
வாழ்வு எரித்து
அனுபம் வாங்கி
என்ன சாதிக்க
என்று புலம்பினேன்........

பூரணம் என்றது அனுபவம்.