பாராலிம்பிக்: வெள்ளி வென்றார் கிரிஷா * இந்தியாவுக்கு முதல் பதக்கம்..!

லண்டன்: பாராலிம்பிக்கில் இந்தியாவுக்கு முதல் பதக்கம் கிடைத்தது. உயரம் தாண்டுதலில் கிரிஷா ஹொசானாகரா நாகராஜிகவுடா வெள்ளிப் பதக்கம் வென்று அசத்தினார்.
லண்டனில், மாற்றுத்திறனாளிகளுக்கான 14வது பாராலிம்பிக் போட்டி நடக்கிறது. இதன் உயரம் தாண்டுதலில் (எப் 42) கர்நாடகாவை சேர்ந்த கிரிஷா, 24, பங்கேற்றார். இவர், இடது காலில் குறைபாடு உள்ளவர்.
முதல் இந்தியர்:
இதில், கிரிஷா, பிஜியின் இலிசா டெலானா, போலந்தின் லூகாஸ் மாம்சார்ஜ் ஆகியோர் அதிகபட்சமாக 1.74 மீ., உயரம் தாண்டினர். இந்த இலக்கை பிஜி வீரர் டெலானா முதல் வாய்ப்பில் தாண்டியதால் தங்கம் வென்றார். இந்தியாவின் கிரிஷா இரண்டாவது வாய்ப்பில் அசத்தியதால் வெள்ளிப் பதக்கம் பெற்றார். போலந்து வீரர் <லூகாஸ் மூன்றாவது வாய்ப்பில் தாண்டியதால் வெண்கலம் வென்றார்.
இதன்மூலம் லண்டன் பாராலிம்பிக் போட்டியில் பதக்கம் வென்ற முதல் இந்தியர் என்ற சாதனை படைத்தார் கிரிஷா.
எட்டாவது பதக்கம்:
இது பாராலிம்பிக் வரலாற்றில் இந்தியாவுக்கு கிடைத்த எட்டாவது பதக்கம். மூன்றாவது வெள்ளிப் பதக்கம். முன்னதாக பெட்கர் (தங்கம், நீச்சல், 1972), பீம்ராவ் கேசர்கார் (வெள்ளி, ஈட்டி எறிதல், 1984), ஜோகிந்தர் சிங் பேடி ஒரு வெள்ளி( குண்டு எறிதல், 1984), 2 வெண்கலம்(ஈட்டி எறிதல், வட்டு எறிதல், 1984), தேவேந்திரா (தங்கம், ஈட்டி எறிதல், 2004), ராஜிந்தர் சிங் ரஹேலு (வெண்கலம், வலுதூக்குதல், 2004) ஆகியோர் பதக்கம் வென்றனர்.
தொடரும் ஏமாற்றம்:
மற்ற போட்டிகளில் இந்திய வீரர்கள் ஏமாற்றம் அளித்தனர். நீளம் தாண்டுதலில் (எப் 46) ஜாக்சீர் சிங் 6வது இடம்(6.42 மீ., தூரம்) பெற்றார்.
* 50 மீ., "பிரீஸ்டைல்' (எஸ் 8) நீச்சலில் சரத் கயாவத், தகுதிச் சுற்றில் 12வது இடம் பெற்றார்.
* 82.50 கி.கி., எடைப்பிரிவு வலுதூக்குதலில் சச்சின் சவுத்திரி, 9வது இடம் பிடித்தார்.
* 50 மீ., "ரைபிள் புரோன்' துப்பாக்கி சுடுதலில் நரேஷ் சர்மா, தகுதிச் சுற்றில் மொத்தம் 575 புள்ளிகள் பெற்று 36வது இடம் பிடித்தார்.
இங்கிலாந்தில் பயிற்சி
கிரிஷாவுக்கு பெங்களூருவில் உள்ள "சமர்தானம்' என்ற மாற்றுத்திறனாளிகளுக்கான என்.ஜி.ஓ., அமைப்பு உதவி செய்து வருகிறது. இவர், இங்கிலாந்தில் உள்ள பாசில்டன் பயிற்சி மையத்தில், மூன்று வார கால பயிற்சி மேற்கொள்ள இந்திய அரசு நிதி உதவி செய்தது.
ரூ. 30 லட்சம் பரிசு
பாராலிம்பிக் போட்டியில் வெள்ளிப் பதக்கம் வென்ற கிரிஷாவுக்கு ரூ. 30 லட்சம் பரிசு வழங்கப்படும் என மத்திய விளையாட்டுத் துறை அமைச்சர் அஜய் மேகன் அறிவித்தார். இதுகுறித்து இவர் கூறுகையில், ""ஒலிம்பிக் போட்டியில் பதக்கம் வென்றவர்களுக்கு வழங்கப்பட்ட அதே பரிசுத் தொகை, பாராலிம்பிக்கில் பதக்கம் வெல்பவர்களுக்கு வழங்கப்படும். இதன்படி தங்கம் வென்றால் ரூ. 50 லட்சம், வெள்ளி வென்றால் ரூ. 30 லட்சம், வெண்கலம் வென்றால் ரூ. 20 லட்சம் பரிசாக அளிக்கப்படும்,'' என்றார்.
5 தங்கம் வென்று சாதனை
ஆஸ்திரேலியா நீச்சல் வீராங்கனை ஜாக்குலின் பிரினி 100 மீ., "பிரீஸ்டைல்' பிரிவில் புதிய பாராலிம்பிக் சாதனை(1.09.39 வினாடி)படைத்து தங்கம் வென்றார். இதன் மூலம் லண்டன் பாராலிம்பிக் போட்டியில் தனது ஐந்தாவது தங்கப்பதக்கம் வென்றார். இவர் 100 மீ., "பேக் ஸ்டிரோக்', 50 மீ.,"பட்டர்பிளை', 200 மீ., தனிநபர் மெட்லே, 4*100 மீ., "பிரிஸ்டைல் ரிலே' ஆகிய பிரிவுகளிலும் ஏற்கனவே தங்கம் வென்றார்.
ஆண்கள் பிரிவில் ஆஸ்திரேலியாவின் நீச்சல் வீரர் மாத்தீவ் காவ்டிரே தனது 10வது "பாராலிம்பிக்' தங்கம் வென்று, சக வீரர் டிம் சல்லிவன் சாதனையை சமன் செய்துள்ளார்.

தினமலர்

வெள்ளி வென்ற கிரிஷாவுக்கு எனது அன்பு வாழ்த்துகள்...........

பாருங்கப்பா எப்படி தாவுறாருன்னு.........