கூடங்குளத்தில் போலீசார் குவிப்பு; அணுமின் நிலையத்தை முற்றுகையிட கிராம மக்கள் திரண்டதால் பதற்றம்

by **சிவா** Fri Sep 07, 2012 9:03 am

கூடங்குளம் அணுமின் நிலையத்தை கிராம மக்கள் முற்றுகையிட போவதாக வதந்தி பரவியதால் திடீர் பரபரப்பு ஏற்பட்டது. இதைத்தொடர்ந்து அங்கு ஏராளமான போலீசார் குவிக்கப்பட்டுள்ளனர்.

ஆலோசனை கூட்டம்

நெல்லை மாவட்டம் கூடங்குளம் அணுமின் நிலையத்தில் மின் உற்பத்தி தொடங்குவதற்கான ஏற்பாடுகள் தீவிரமாக நடந்து வருகின்றன. அணுமின் நிலையம் போலீசாரின் பாதுகாப்பு வளையத்துக்குள் இருந்து வருகிறது.

இந்த நிலையில் அணு உலைக்கு எதிரான போராட்டக் குழுவினர் அடுத்த கட்ட போராட்டம் குறித்து இடிந்தகரை புனித லூர்து அன்னை ஆலய வளாகத்தில் நேற்று ஆலோசனை நடத்த முடிவு செய்து இருந்தனர். அதன்படி ஊருக்கு 5 அல்லது 10 பேர் கூட்டத்தில் கலந்து கொள்ள வேண்டும் என்றும் அறிவுறுத்தி இருந்தனர்.

தடுத்து நிறுத்திய போலீசார்

இதை தொடர்ந்து கூத்தன்குழி, வைராவிகிணறு, பெருமணல், கூடுதாழை உள்ளிட்ட கடற்கரையோர கிராமங்களில் இருந்து ஏராளமானவர்கள் இடிந்தகரைக்கு புறப்பட்டு வந்தனர். அப்போது, போராட்டக்குழுவினர் அணுமின் நிலையத்தை முற்றுகையிட போகிறார்கள் என்ற வதந்தி பரவியது.

ஏற்கனவே 144 தடை உத்தரவு அந்தப்பகுதியில் அமலில் இருந்து வருகிறது.

இதனால் இடிந்தகரையை நோக்கி வந்த பொதுமக்களை, ஆங்காங்கே பாதுகாப்புக்கு நின்ற போலீசார் திருப்பி அனுப்பினார்கள். அப்போது போலீசாருக்கும், பொதுமக்களுக்கும் இடையே வாக்குவாதம் ஏற்பட்டது. இதுபற்றி இடிந்தகரையில் கூடியிருந்த கிராம மக்களுக்கு தெரியவந்தது.

2 ஆயிரம் பேர் திரண்டனர்

உடனே இடிந்தகரை புனித லூர்து அன்னை ஆலயத்தில் உள்ள மணி அடிக்கப்பட்டது. கடற்கரையோர கிராம மக்கள் சுமார் 2 ஆயிரத்துக்கும் மேற்பட்டவர்கள் இடிந்தகரையில் திரண்டனர். அவர்கள் அங்கிருந்து ஊர்வலமாக விஜயாபதி விலக்கிற்கு வந்தனர். பொதுமக்கள் ஆவேசமாக திரண்டு வந்த உடன் 2 வாகனங்களில் பாதுகாப்புக்கு நின்ற போலீசார் திரும்பி வந்தனர்.

பின்னர் அங்கு கூடியிருந்தவர்களிடம், உதயகுமார், புஷ்பராயன், மை.பா.ஜேசுராஜ் ஆகியோர் பேசினார்கள். அப்போது, நாம் அடுத்த கட்ட போராட்டம் பற்றி முடிவு எடுக்க வேண்டும். அதற்காக அனைவரும் இடிந்தகரைக்கு செல்வோம் என்று கூறினார்கள்.

ஆலோசனை

பின்னர் அங்கிருந்து 2 ஆயிரத்துக்கும் மேற்பட்டவர்களும் ஊர்வலமாக இடிந்தகரைக்கு வந்து சேர்ந்தனர். அப்போது போலீசார் வைத்திருந்த 2 தடுப்புகளை தூக்கி வந்தனர். இந்த சம்பவத்தினால் கூடங்குளம் அணுமின் நிலைய பகுதியில் திடீர் பரபரப்பு ஏற்பட்டது.

இதை தொடர்ந்து இடிந்தகரையில் அடுத்த கட்ட போராட்டம் குறித்து போராட்டக்குழுவினர் விவாதித்தனர். அப்போது ஒரு கிராமத்தை சேர்ந்த 5 பேர் வீதம் இந்த ஆலோசனை கூட்டத்தில் ஏராளமானவர்கள் கலந்து கொண்டனர்.

தினத்தந்தி