சிங்கம்புணரி ஒன்றிய அ.தி.மு.க. நிர்வாகி மனைவி கழுத்தை அறுத்து கொலை

சிங்கம்புணரி ஒன்றிய அ.தி.மு.க. நிர்வாகியின் மனைவியை கழுத்தை அறுத்து கொலை செய்த மர்ம கும்பலை போலீசார் தேடி வருகின்றனர். சிவகங்கை மாவட்டம், சிங்கம்புணரி அருகே உள்ள நாடார் வேங்கைபட்டியை சேர்ந்தவர் அழகு (வயது 45) இவர் சிங்கம்புணரி ஒன்றிய அ.தி.மு.க. துணை செயலாளராக உள்ளார். இவரது மனைவி பொம்மி (வயது 36). இவர்களுக்கு ராமச்சந்திரன், ராஜேஷ் என்ற 2 மகன்கள் உள்ளனர்.

இருவரும் வெளியூரில் வேலை பார்த்து வருகின்றனர். இந்நிலையில் நேற்று அழகு வெளியே சென்று விட்டு இரவு வீடு திரும்பினார். அப்போது வீட்டில் பொம்மி இல்லை. இதனால் அவர் மனைவியை தேடிப்பார்த்தார். ஆனால் எங்கும் இல்லை. இதையடுத்து மனைவி அருகில் உள்ள உறவினர்கள் வீட்டுக்கு சென்று இருப்பார் என்று நினைத்துக் கொண்டு, அழகு வீட்டிலேயே தூங்கி விட்டார். இன்று காலை அழகு, எழுந்தார். அப்போது வீட்டின் அருகே பொம்மி மர்மமான முறையில் கழுத்தை அறுத்த நிலையில் கொலை செய்யப்பட்டு பிணமாக கிடப்பதை பார்த்து அதிர்ச்சி அடைந்த அழகு,

இதுகுறித்து சிங்கம்புணரி போலீசில் புகார் செய்தார். இதையடுத்து போலீசார் சம்பவ இடத்திற்கு விரைந்து வந்து பிணத்தை கைப்பற்றி பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர். மேலும் மோப்ப நாயும் வரவழைக்கப் பட்டு விசாரணை நடந்தது. போலீஸ் இன்ஸ்பெக்டர் (பொறுப்பு) ரவிச்சந்திரன், சப்-இன்ஸ்பெக்டர்கள் ராஜேந்திரன், அமுதவள்ளி மற்றும் போலீசார் இது தொடர்பாக வழக்கு பதிவு செய்து கொலை செய்தது யார்? எதற்காக கொலை செய்யப்பட்டார்? முன் விரோதம் காரணமா? என்ற பல்வேறு கோணங்களில் விசாரணை நடத்தி வருகின்றனர். மேலும் கொலை செய்த மர்ம கும்பலை தேடி வருகின்றனர்.

கடந்த ஆண்டு பொம்மியின் தங்கை வெள்ளையம்மாள் என்பவரும் மர்மமான முறையில் கொலை செய்யப்பட்டார் என்பது குறிப்பிடத்தக்கது. தங்கையை தொடர்ந்து, அக்காளும் கொலை செய்யப்பட்டிருப்பது அப்பகுதியில் பீதியை ஏற்படுத்தி உள்ளது.

மாலைமலர்

என்ன கொடுமை இது..

பெரும் பரபரப்பை ஏற்படுத்தியுள்ளது இச்சம்பவம்.........

விரைவில் குற்றவாளியை கண்டுபிடித்து விடுவார்கள் என நினைக்கிறேன்.......

இன்றைய நிலவரம்

அழகு என்பவரின் அண்ணன் பையன் சிவக்குமார் என்பவர் தான் கொலை செய்தது என்று போலீஸார் தெரிவித்துள்ளனர். சிவக்குமாரை கைதும் செய்துவிட்டனர்.