தூத்துக்குடி அனல்மின் நிலையத்தில் மீண்டும் தீ விபத்து; பல கோடி சேதம்

தூத்துக்குடி அனல்மின் நிலையத்தில் நேற்று பயங்கர தீ விபத்து ஏற்பட்டது. இதில் நிலக்கரி கொண்டு செல்ல பயன்படுத்தப்படும் `கன்வேயர் பெல்ட்' உள்ளிட்ட கோடிக்கணக்கான ரூபாய் மதிப்பிலான பொருட்கள் எரிந்து நாசமாயின. 2 பேர் காயம் அடைந்தனர்.

தூத்துக்குடி அனல்மின் நிலையம்

தூத்துக்குடி துறைமுகம் அருகே தமிழக அரசுக்கு சொந்தமான அனல்மின் நிலையம் இயங்கி வருகிறது. இது தமிழகத்தில் உள்ள முக்கிய அனல்மின் நிலையங்களில் ஒன்றாகும்.

அனல்மின் நிலையத்துக்கு தேவையான நிலக்கரி கப்பல் மூலம் தூத்துக்குடி துறைமுகத்துக்கு கொண்டு வரப்படுகிறது. அங்குள்ள கரி இறக்குமதி தளத்தில் இருந்து அனல்மின் நிலையத்துக்கு நிலக்கரியை கொண்டு செல்வதற்காக, துறைமுகம் முதல் அனல்மின் நிலையம் வரை சுமார் 4 கிலோ மீட்டர் நீளத்துக்கு கன்வேயர் பெல்ட் அமைக்கப்பட்டு உள்ளது.

இது ஆசியாவிலேயே நீளமான கன்வேயர் பெல்ட் என்ற சிறப்புக்குரியது. சமீப காலமாக அவ்வப்போது நிலக்கரி எடுத்துச் செல்லும் கன்வேயர் பெல்ட் அடிக்கடி தீ விபத்துக்குள்ளாகி வருகிறது.

கடந்த ஜுலை மாதம் 2-ந் தேதியன்று அதிகாலையில் ஏற்பட்ட தீ விபத்தில் சுமார் 300 மீட்டர் நீளமுள்ள கன்வேயர் பெல்ட் எரிந்து சேதம் அடைந்தது. பின்னர் தண்ணீர் பற்றாக்குறை உள்ளிட்ட காரணங்களால் அடிக்கடி அனல்மின் நிலையத்தில் சிறு, சிறு தீ விபத்துகள் ஏற்பட்டன. எந்திர கோளாறு காரணமாகவும் மின்சார உற்பத்தி பாதிக்கப்பட்டது.

மீண்டும் பெரிய தீ விபத்து

இந்த நிலையில், தூத்துக்குடி அனல்மின் நிலையத்தில் நேற்று மீண்டும் பயங்கர தீ விபத்து ஏற்பட்டது.

தூத்துக்குடி துறைமுகத்தில் இருந்து அனல்மின் நிலையத்தின் 2, 3-வது மின்உற்பத்தி யூனிட்டுகள் மற்றும் யார்டுக்கு நிலக்கரி கொண்டு செல்லும் கன்வேயர் பெல்ட்டில் பகல் 11 மணி அளவில் திடீர் என்று தீப்பிடித்தது. இந்த பெல்ட்டில் பெரிய கட்டிகளாக உள்ள நிலக்கரியை அரைத்து தூள் போன்று மாற்றுவதற்கு, பழைய கிரஷர் ஒன்றும் இயங்குகிறது.

இந்த கிரஷரில்தான் முதலில் தீப்பிடித்ததாக கூறப்படுகிறது. அப்போது பலத்த காற்று வீசியதால் தீ மளமளவென்று பரவத் தொடங்கியது. பின்னர் கன்வேயர் பெல்ட்டுக்கும் பரவியது. இதனால் அந்த பகுதி முழுவதும் புகை மண்டலமாக காட்சி அளித்தது.

தீயை அணைக்க போராட்டம்

இது குறித்து தகவல் அறிந்ததும் தூத்துக்குடி, சிப்காட், துறைமுகம் உள்ளிட்ட பகுதிளைச் சேர்ந்த 6 தீயணைப்பு வாகனங்களில் தீயணைப்பு படை வீரர்கள் விரைந்து வந்து தீயை அணைக்க போராடினர். கன்வேயர் பெல்ட்டின் அருகே பாரத் கியாஸ் நிறுவனம், வெடிக்கக்கூடிய ரசாயன பொருளை சேகரித்து வைக்கக்கூடிய இடமும் அமைந்து இருக்கிறது.

எனவே தீ அந்த பகுதிகளுக்கு பரவி விடாமல் தீயணைப்பு வீரர்கள் உரிய நடவடிக்கை மேற்கொண்டனர். 3 மணி நேர போராட்டத்துக்கு பிறகு மதியம் 2 மணி அளவில் தீ அணைக்கப்பட்டது.

கோடி கணக்கில் சேதம்

இந்த தீ விபத்தில் சுமார் 500 மீட்டர் நீளத்துக்கு கன்வேயர் பெல்ட் எரிந்தது. இதன் மதிப்பு பல கோடி ரூபாய் இருக்கும் என்று கூறப்படுகிறது. தீ விபத்தில் தூத்துக்குடியை சேர்ந்த செல்வக்கண்ணன், சின்னத்துரை ஆகிய 2 பேர் லேசான காயம் அடைந்தனர். அவர்களுக்கு அங்கு உள்ள ஆஸ்பத்திரியில் சிகிச்சை அளிக்கப்பட்டது.

தீ விபத்து காரணமாக 2, 3-வது மின் உற்பத்தி யூனிட்டுகளுக்கு நிலக்கரி கொண்டு செல்வதில் சற்று சிரமம் ஏற்பட்டது. ஆனால் இந்த அலகுகளுக்கு நிலக்கரி யார்டில் இருந்து மற்றொரு பைபாஸ் கன்வேயர் பெல்ட் மூலம் நிலக்கரி வினியோகிக்கப்பட்டது. இதனால் மின்சார உற்பத்தியில் பாதிப்பு ஏற்படவில்லை.

தூத்துக்குடி போலீஸ் உதவி சூப்பிரண்டு மகேஷ் மற்றும் போலீசார் சம்பவ இடத்துக்கு விரைந்து வந்து விசாரணை நடத்தினர். இந்த விபத்தில் சேதம் அடைந்த பகுதிகளை சரி செய்ய தீவிர நடவடிக்கை எடுக்கப்பட்டு வருகிறது.

இந்தோனேசியா நாட்டில் இருந்து இறக்குமதி செய்யப்படும் நிலக்கரியில் ஏற்பட்ட அதிக உராய்வு காரணமாக இந்த தீ விபத்து ஏற்பட்டு இருக்கலாம் என்று கருதப்படுகிறது. தொடர்ந்து விசாரணை நடந்து வருகிறது.

தினத்தந்தி

அது எப்படி எல்லா அனல் மின் நிலையத்தில் பெல்ட் மட்டும் எரிது? எந்த அளவுல பராமரிப் பணி நடக்குது.