இறைவனை அடைய நான்கு படிமுறைகள்!

ஓர் ஆன்மா பக்குவம் பெற்று இறைவனை அடைய நான்கு படிமுறைகள் இருக்கின்றன. இவற்றை சீலம், நோன்பு, செறிவு, அறிவு என்று கூறுவர். இப்படி இந்நான்கையும் எடுத்துக் கூறிய திருவாசகப்பாட்டு ஒன்றுண்டு.
“சீலமின்றி நோன்பின்றிச் செறிவே இன்றி அறிவின்றித்
தோலின் பாவைக் கூத்தாட்டாய் சுழன்று விழுந்து கிடப்பேனை
மாலும் காட்டி வழிகாட்டி வாரா உலக நெறியேறக்
கோலம் காட்டி ஆண்டானைக் கொடியேன் என்றோ கூடுவதே”.

சீலம்:
சீலம் என்பது நாடும் நகரமும் தேடித்திரிந்து தலங்கள் தோறும் சென்று இறைவனைக் கண்டு வழிபடல். தலங்கள் தோறும் செல்லாமல் ஒரே தலத்தைத் தேடிச் சென்று வழிபடுவதும் இது அடங்கும்.

சிலர் இந்நாளில் அவ்வப்போது குறிப்பிட்ட நாட்களில் ஐயப்பனை வழிபட சபரிமலைக்கு இருமுடி கட்டிச் செல்வது போன்றது இது. இப்படி சிலர் திருச்செந்தூர் போய்வருவர். சிலர் பழனிக்குப் போய்வருவர். சிலர் திருப்பதிக்குப் போய்வருவர். சிலர் பாடல் பெற்ற தலங்களுக்கு திட்டமிட்டுப் போய்வருவர். சிலர் அறுபடைவீட்டு முருகன் தலங்களுக்கு ஆண்டுதோறும் திட்டமிட்டுச் சென்றுவருவர். இவை எல்லாம் சீலத்தில் அடங்கும். சிலர் கிருத்திகை தோறும் திருப்போரூர் சென்றுவருவர். சிலர் பிரதோசம்தோறும் தவறாமல் சிவன் கோயிலுக்குச் சென்றுவருவர். இவை எல்லாம் கூட சீலத்தில் அடங்கும். இதனை திருமந்திரப் பாடல் இவ்வாறு கூறுகிறது.
“நாடும் நகரமும் நற்றிருக் கோயிலும்
தேடித் திரிந்து சிவபெருமான் என்று
பாடுமின் பாடிப் பணிமின் பணிந்தபின்
கூடிய நெஞ்சத்துக் கோயிலாக் கொள்வனே”

கோயிலுக்குச் செல்பவர்கள் என்னென்ன செய்யவேண்டும் அல்லது என்னென்ன செய்யலாம் என்பதைக்கற்றுக் கொடுப்பவர்களும் வழிகாட்டுபவர்களும் உண்டு.

பழந்தமிழகத்தில் நல்ல கணவன் வேண்டும் என்றும் நாட்டில் நல்ல மழை பெய்யவேண்டும் என்றும் சிறுமிகள் “பாவை நோன்பு” மார்கழி மாதத்தில் நோற்பர். அவர்கள் எப்படி ஆற்றங்கரைக்குச் சென்று குளித்துவிட்டு அங்கேயே மணலில் உமையைப் பாவையாகச் செய்து வழிபாடு செய்தல் வேண்டும் என்று, அவர்களுக்கு “முனித்துறை முதல்வியர்” வழிகாட்டுவர் என்று பரிபாடல் கூறுகிறது. அந்தச் சிறுமியர்களுக்கு அந்த முதல்வியர் “சீலகுரு” என்க.

இதுபோல, சீல குருக்கள் முதன்முதலில் வழிகாட்டிடும்போது செய்யும் சடங்கு “சீல தீக்கை” எனப்படும். ஐயப்பமார்களில் இருமுடி கட்டுவதையே பெரிய வழிபாடாகச் செய்வதை இக்கால உதாரணமாகக் கொள்ளலாம்.
(தொடரும்)

நல்லா இருக்கு ... மேல சொல்லுங்க சாமி!

அது சரி மலேசியாவுல எங்க போரது, தெரிஞ்சவங்க சொல்லுங்க.