சாலைகளில் குப்பை கொட்டினால் ரூ.1,000 அபராதம்

**சிவா** · **சிவா** Thu 30 Aug 2012 - 11:00

சாலைகளில் குப்பை கொட்டினால் ரூ.1,000 அபராதம் விதிக்கப்படும் என்று மாநகராட்சி கமிஷனர் நந்தகோபால் எச்சரித்து உள்ளார்.

கரும்பு ஜுஸ் கடை

இது தொடர்பாக அவர் வெளியிட்டுள்ள செய்திக்குறிப்பில் கூறியிருப்பதாவது:-

மதுரை மாநகராட்சி எல்லைக்குட்பட்ட வணிக நிறுவனங்களில் சேரும் குப்பைகளை தாங்களே குப்பை தொட்டிகள் வாங்கி குப்பைகளை சேகரித்து வைக்க வேண்டும். சேகரித்த குப்பையை, குப்பை தொட்டியுடன் நிறுவனத்திற்கு முன்பு வைத்து மாநகராட்சி ஊழியரிடம் கொடுக்க வேண்டும்.

அதே போன்று தேநீர் விடுதி, உணவு விடுதி, ஜுஸ் கடை, இளநீர் கடை, கரும்பு ஜுஸ் கடை போன்றவையும் குப்பைகளை பொது இடங்களில் கொட்டக்கூடாது. குப்பை தொட்டிகளில் மட்டுமே கொட்ட வேண்டும்.

ரூ.1,000 அபராதம்

மாலை நேர உணவகங்கள், திருமண மண்டபங்கள் ஆகியவையும் சுகாதாரக்கேடு ஏற்படும் வகையில் இலைகள் மற்றும் உணவு கழிவுகளை வெளியில் கொட்டக்கூடாது. தாங்கள் வைத்துள்ள குப்பைத் தொட்டிகளில் மட்டுமே போட வேண்டும்.

அவ்வாறு அல்லாமல் பொது இடங்களிலோ, சாலைகளிலோ, தெருக்களிலோ குப்பைகளை கொட்டினாலோ, கழிவு நீரை சாலைகள் மற்றும் மழை வடிகாலில் விட்டாலோ தமிழ்நாடு பொது சுகாதார சட்டத்தின் கீழ் ரூ.500 முதல் ரூ.1,000 வரை அபராதம் விதிக்கப்படும்.

இவ்வாறு அதில் கூறப்பட்டுள்ளது.