திருவானைக்காவல் கோவில் கோபுர சிலை இடிந்து விழுந்ததால் பரபரப்பு

திருச்சி திருவானைக்காவலில் உள்ள ஜம்புகேஸ்வரர் கோவில் கோபுர சிலை இடிந்து விழுந்ததால் பரபரப்பு ஏற்பட்டது.

கோவில் கோபுரம்

பஞ்சப்பூத திருத்தலங்களில் முதன்மையானதும், நீர்த்தலமாக விளங்கக்கூடியதுமாக இருப்பது திருவானைக்காவல் ஸ்ரீஅகிலாண்டேஸ்வரி ஜம்புகேஸ்வரர் கோவில். இந்த கோவில் சைவத்திருத்தலங்களில் முதன்மையானது என்பதால் தமிழகம் முழுவதும் உள்ள ஏராளமான சிவபக்தர்கள் இங்கு வந்து வழிபடுவது வழக்கம். இங்கு கடந்த 2000-ம் ஆண்டு கும்பாபிஷேகம் நடத்தப்பட்டது.

கடந்த சில மாதங்களுக்கு முன்பு கோவிலில் உள்ள ராஜகோபுரத்தில் உள்ள ஒரு சிறிய பகுதி இடிந்து விழுந்தது. கோபுரத்தில் சுவர் பகுதியில் ஆங்காங்கே மரம், செடிகள் வளர்ந்து வருகிறது. இதனால் மரங்களின் வேர்கள் சுவர் பகுதியில் ஊடுருவி செல்வதால், கோபுரங்களில் உள்ள சிலைகள் அவ்வப்போது இடிந்து விழுவதாக கூறப்பட்டது.

சிலை இடிந்து விழுந்தது...

இந்த நிலையில் நேற்று பகல் திருவானைக்காவல் அகிலாண்டேஸ்வரி அம்மன் கோவிலில் உள்ள 5 கோபுரங்களில் 3-வதாக உள்ள கார்த்திகை கோபுரத்தின் உச்சி கலசத்துக்கு கீழ் சுமார் 10 அடி நீளமுள்ள ஒரு சிறிய பகுதி திடீரென்று இடிந்து விழுந்தது.

அது கோபுரத்தின் மூலையில் வைக்கப்பட்டு இருந்த நந்தி சிலையின் மீது பட்டதால், அதுவும் உடைந்து விழுந்தது. இதனை கண்ட அந்த பகுதி மக்கள் அதிர்ச்சி அடைந்தனர். அதிர்ஷ்டவசமாக கோபுரத்தின் பக்கவாட்டு பகுதியில் சிலை உடைந்து விழுந்ததால், யாருக்கும் எந்தவித பாதிப்பும் இல்லை.

மராமத்து பணிகள் மேற்கொள்ள கோரிக்கை

இது குறித்து அந்த பகுதியை சேர்ந்த சிலர் கூறுகையில், ``திருவானைக்காவல் அகிலாண்டேஸ்வரி அம்மன் கோவில் மிகவும் பழமையானது. இங்கு இந்த ஆண்டு கும்பாபிஷேகம் நடைபெற இருக்கிறது. அதற்குள் இப்படி சிலைகள் இடிந்து விழுகிறது. ஏற்கனவே ஒரு முறை ராஜகோபுரத்தின் சிலை இடிந்து விழுந்தது. தற்போது மீண்டும் ஒரு சம்பவம் நடந்து உள்ளது.

ஆகவே கோவில் கோபுரத்தில் உள்ள சிலைகளில் மராமத்து பணிகளை உடனடியாக மேற்கொள்ள வேண்டும்'' என்று கூறினார்கள்.

சிறப்புவழி அது இது என பல வழிகளில் பணம் பக்தர்களிடம் பணம் பிடுங்கும் கோவில் நிர்வாகங்கள் பராமரிப்பு பணிகளை மட்டும் சரியாக கவனிப்பதில்லை என்பது மிகவும் கவலைக்கு உரியது

இந்த கோவிலில் காசு கொடுபவர்களை மட்டுமே சாமியை பார்க்க அனுமதிப்பர் மற்றவர்களை ஒரு சண்ணல் ஓட்டை வழியே மட்டுமே தீண்டதகாவர்களை போல் பார்க்க அனுமதிப்பர்

தமிழகத்தில் உள்ள அனைத்துக் கோவில்களிலும் இவ்வாறு தான் நடந்து கொள்கிறார்கள். பணம் கொடுத்தால் தான் சாமியின் அருள் கிடைக்கும் என்றால் அப்படி ஒரு தெய்வம் எனக்குத் தேவையில்லை.