இந்தியாவில் தயாரிக்கப்பட்ட கிரையோஜெனிக் என்ஜின் பொருத்தப்பட்ட ராக்கெட் அடுத்த ஆண்டு ஏவப்படும்

இந்தியாவில் தயாரிக்கப்பட்ட கிரையோஜெனிக் என்ஜின் பொருத்தப்பட்ட ஜி.எஸ்.எல்.வி. ராக்கெட் 2013-ம் ஆண்டு விண்ணில் செலுத்தப்படும் என்று இந்திய விண்வெளி ஆராய்ச்சி கழக தலைவர் விஞ்ஞானி ராதாகிருஷ்ணன் தெரிவித்தார்.

பட்டமளிப்பு விழா

டாக்டர் எம்.ஜி.ஆர். கல்வி மற்றும் ஆராய்ச்சி பல்கலைக்கழகத்தின் 21-வது பட்டமளிப்பு விழா சென்னை வேலப்பன் சாவடியில் உள்ள ஏ.சி.எஸ். மருத்துவக் கல்லூரி மற்றும் மருத்துவமனை வளாகத்தில் நடைபெற்றது. விழாவுக்கு பல்கலைக்கழக தலைவர் ஏ.சி.எஸ். அருண்குமார் தலைமை தாங்கினார். பல்கலைக்கழக நிறுவனர் மற்றும் சேர்மன் ஏ.சி.சண்முகம் கலந்து கொண்டார்.

இந்திய விண்வெளி ஆராய்ச்சி கழக (இஸ்ரோ) தலைவர் விஞ்ஞானி கே.ராதாகிருஷ்ணன் சிறப்பு அழைப்பாளராக கலந்து கொண்டு மாணவ-மாணவிகளுக்கு பட்டங்களையும் பதக்கங்களையும் வழங்கினார்.

அப்போது அவர் பேசுகையில் கூறியதாவது:-

100-வது ராக்கெட்

விண்வெளி ஆராய்ச்சியில் இந்தியா முன்மாதிரியாக விளங்குகிறது. உலகில் 6 நாடுகள் சொந்தமாக விண்வெளிக்கு ராக்கெட்டுகளை அனுப்புகின்றன. அந்த 6 நாடுகளில் இந்தியாவும் ஒன்றாகும் என்பது பெருமைத்தக்கது.

நாம் அனுப்பிய 20 செயற்கைகோள்கள் விண்ணில் சுற்றிக்கொண்டிருக்கின்றன. அவை தொலை தொடர்பு, இயற்கை வளம், சுற்றுச்சூழல், காலநிலை, இயற்கை பேரிடர் ஆகியவற்றை கண்காணித்து துல்லியமாக தகவல் தெரிவிக்கின்றன. இது பெரிதும் பயனுள்ளதாக இருக்கிறது. மழை வெள்ளம், புயல், போன்ற இயற்கை பேரிடர் ஏற்படும் போது செயற்கைகோள்கள் மூலம் வெகுவாக பயன் அடைகிறோம்.

இவ்வாறு விஞ்ஞானி ராதாகிருஷ்ணன் கூறினார்.

பின்னர் அவர் நிருபர்களிடம் கூறியதாவது:-

கிரையோஜெனிக் என்ஜின்

இந்திய விண்வெளி ஆராய்ச்சி திட்டத்தின் 50-வது ஆண்டில் பி.எஸ்.எல்.வி. சி-21 ராக்கெட்டை செப்டம்பர் 2-வது வாரத்தில் விண்ணில் செலுத்த உள்ளோம். இது 100-வது ராக்கெட் ஆகும். அது ஒரு ஜப்பான் செயற்கை கோளையும், ஒரு பிரான்ஸ் செயற்கைகோளையும் சுமந்து செல்லும்.

இந்தியாவில் தயாரிக்கப்பட்ட கிரையோஜெனிக் என்ஜின் மூலம் ஏப்ரல் 15-ந் தேதி ஜி.எஸ்.எல்.வி.-டி3 ராக்கெட்டை விண்ணில் செலுத்தும் முயற்சி தோல்வியில் முடிந்தது. இதேபோல் மற்றொரு முயற்சியும் தோல்வி கண்டது.

அடுத்த ஆண்டு

அடுத்த ஆண்டில், இந்தியாவில் தயாரிக்கப்பட்ட கிரையோஜனிக் என்ஜின் மூலம் ஜி.எஸ்.எல்.வி. ராக்கெட்டை விண்ணில் செலுத்த இருக்கிறோம். அதற்கு முன்னதாக செப்டம்பர் முதல் நவம்பர் வரை 2 முறை கிரையோஜெனிக் என்ஜின் ஆய்வு செய்யப்பட உள்ளது. அந்த ஆய்வுகளில் வெற்றி கண்ட பின்னர் அந்த என்ஜின் மூலம் ராக்கெட்டை ஏவ உள்ளோம்.

மேலும் இப்போது ராக்கெட்டை ஒரு முறைதான் பயன்படுத்த முடிகிறது. இனிமேல் ராக்கெட் மேலேபோய்விட்டு பின்னர் அது பயன்படுத்தக்கூடிய நிலையில் கீழே பூமிக்கு வருவதற்கான தொழில்நுட்பத்தை 2 வருடத்திற்குள் செய்து முடிப்போம்.

இவ்வாறு கே.ராதாகிருஷ்ணன் தெரிவித்தார்.

கலந்து கொண்டவர்கள்

இந்த பட்டமளிப்பு விழாவில் பல்கலைக்கழக ஆலோசகர்கள் பேராசிரியர் ஆர்.எம்.வாசகம், பி.டி.மனோகரன், நிர்வாக அறங்காவலர் லலிதா லட்சுமி, செயலாளர் ஏ.ரவிக்குமார், துணைவேந்தர் டாக்டர் மீர் முஸ்தபா உசேன், பதிவாளர் சி.பி.பழனிவேலு, ரெக்டர் ஜி.கோபாலகிருஷ்ணன் உள்பட பலர் கலந்து கொண்டனர்.

தினத்தந்தி

இந்தியாவின் விண்வெளி ஆராய்ச்சி விண்ணைத் தொட வாழ்த்துகிறேன்.