அவதூறு வழக்கில் கருணாநிதியை குறுக்கு விசாரணை செய்வேன் - வைகோ

அவதூறு வழக்கில் சாட்சியம் அளிக்க கோர்ட்டில் கருணாநிதி ஆஜராகும்போது, அவரை நானே குறுக்கு விசாரணை செய்வேன் என்று வைகோ கூறினார்.

பிரமதருக்கு கடிதம்

பிரதமர் மன்மோகன்சிங், காங்கிரஸ் தலைவி சோனியா காந்தி ஆகியோருக்கு ம.தி.மு.க. பொதுச் செயலாளர் வைகோ கடிதம் அனுப்பினார்.

அந்த கடிதத்தில், `ம.தி.மு.க.வில் இருந்து எல்.கணேசன், செஞ்சி ராமசந்திரன் ஆகியோரை பிரித்து, என் கட்சியை அழிக்க முதல்-அமைச்சர் கருணாநிதி முயற்சிக்கிறார்` என்று கூறியிருந்தார். இந்த செய்தி, 25.12.2006 அன்று இந்தியன் எக்ஸ்பிரஸ் பத்திரிகையில் செய்தியாக வெளியானது.

அவதூறு வழக்கு

இந்த செய்தியின் அடிப்படையில், வைகோ மீது கிரிமினல் அவதூறு வழக்கை அப்போதைய தமிழக முதல்-அமைச்சர் கருணாநிதி சார்பில் சென்னை மாவட்ட செசன்சு கோர்ட்டில் மாநகர அரசு வக்கீல் தாக்கல் செய்தார். இந்த வழக்கு சென்னை 7-வது கூடுதல் செசன்சு கோர்ட்டில் நீதிபதி கலியமூர்த்தி (பொறுப்பு) முன்பு நேற்று விசாரணைக்கு வந்தது.

அப்போது வைகோ நேரில் ஆஜரானார். அரசு தரப்பில் கூடுதல் அரசு வக்கீல் எம்.கே.அசோகன் ஆஜரானார். அவரிடம், `அரசு தரப்பு சாட்சிகள் ஏன் ஆஜராகவில்லை?` என்று நீதிபதி கேள்வி எழுப்பினார். பின்னர், வழக்கு விசாரணையை செப்டம்பர் 17-ந் தேதிக்கு தள்ளிவைத்து நீதிபதி உத்தரவிட்டார்.

மேலும், இந்த வழக்கின் அரசு தரப்பு முதல் 2 சாட்சிகளான, பொதுதுறை பிரிவு அதிகாரி, தலைமை குற்றவியல் கோர்ட்டு அச்சகப்பிரிவு தலைமை எழுத்தர் ஆகியோர் செப்டம்பர் 17-ந் தேதி நேரில் ஆஜராக வேண்டும் என்று சம்மன் அனுப்ப நீதிபதி உத்தரவிட்டார்.

போலி பொதுக்குழு

கோர்ட்டில் இருந்து வெளியில் வந்த வைகோ நிருபர்களிடம் கூறியதாவது:-

ம.தி.மு.க.வில் இருந்து எல். கணேசன், செஞ்சி ராமசந்திரன் ஆகியோர் வெளியேறினர். அவர்கள் மூலம் போலி பொதுக்குழு கூட்டத்தை கருணாநிதி நடத்தினார். இதை சொன்னால், என் மீது இந்த அவதூறு வழக்கை தொடர்ந்துள்ளார். கருணாநிதி மீது அதே குற்றச்சாட்டை இப்போதும் சுமத்துகிறேன். வேண்டுமென்றால், அவர் இன்னொரு அவதூறு வழக்கு தொடரட்டும்.

குறுக்கு விசாரணை செய்வேன்

ம.தி.மு.க.வை அழிக்க வேண்டும் என்ற நோக்கத்துடன் கருணாநிதி செயல்பட்டதற்கு என்னிடம் ஆதாரம் இருக்கிறது. என் மீதான அவதூறு வழக்கில் சாட்சியாக கருணாநிதி பெயரும் உள்ளது. கருணாநிதி சாட்சி அளிக்க கோர்ட்டுக்கு வரும்போது, வக்கீலை வைத்துக் கொள்ளாமல் நானே அவரை குறுக்கு விசாரணை செய்வேன். கருணாநிதி மீது நான் சுமத்திய குற்றச்சாட்டு உண்மை என்பதை நிரூபிப்பேன். அந்த நாளை ஆவலுடன் எதிர்பார்க்கிறேன்.

இவ்வாறு அவர் கூறினார்.

தினத்தந்தி