கிரானைட் முறைகேடு : பிஆர்பி உரிமையாளர் பழனிச்சாமி சரண்

மகா பிரபு · மகா பிரபு Sat Aug 18, 2012 1:24 pm

மதுரையில் கிரானைட் சுரங்க முறைகேட்டில் ஈடுபட்டதாக கண்டறியப்பட்டுள்ள பிஆர்பி கிரானைட் நிறுவனத்தின் உரிமையாளர் பி.ஆர். பழனிச்சாமி மதுரை காவல்துறை கண்காணிப்பாளர் முன்னிலையில் இன்று சரண் அடைந்தார். இன்று மதியம் ஏராளமான வழக்குரைஞர்களுடன் காவல்துறை கண்காணிப்பாளர் அலுவலகத்துக்கு வந்து பழனிச்சாமி சரண் அடைந்துள்ளார்.

இதுவரை இந்த முறைகேட்டுப் புகாரில் 26 பேர் கைது செய்யப்பட்டுள்ளனர். முறைகேட்டில் ஈடுபட்ட பிஆர்பி நிறுவனத்துக்கு மாவட்ட ஆட்சியர் கடந்த வாரம் சீல் வைத்தார். பிஆர்பி நிறுவனத்துக்கு சொந்தமான 20 பேருந்துகளும் பறிமுதல் செய்யப்பட்டன. தலைமறைவாக இருந்த பழனிச்சாமிய காவல்துறையினர் தேடி வந்த நிலையில், இன்று மதியம் அவர் சரண் அடைந்துள்ளார்.

சட்டவிரோதமாக கிரானைட்களை வெட்டி எடுத்தது உள்ளிட்ட பல்வேறு வழக்குகள் பழனிச்சாமி மீது உள்ளது. கடந்த 15 நாட்களுக்கும் மேலாக மதுரையில் கிரானைட் சுரங்கங்களில் அதிகாரிகள் தீவிர ஆய்வு நடத்தி வருகின்றனர். இதில் பல கோடி அளவுக்கு முறைகேடு நடந்திருப்பது தெரிய வந்துள்ளதாக தகவல்கள் தெரிவிக்கின்றன.

தினமணி