கறுப்பு பணத்தை ஒழிக்க 500, 1000 ரூபாய் நோட்டுகள் செல்லாது என்று அறிவிக்கப்படுமா?

கறுப்பு பணத்தை ஒழிப்பதற்கு, 500 மற்றும் 1000 ரூபாய் நோட்டுகளை செல்லாது என்று அறிவிப்பது குறித்து, மத்திய அரசு குழு அறிக்கை தாக்கல் செய்துள்ளது.

கறுப்பு பணம் பிரச்சினை

ஊழல் மற்றும் கறுப்பு பணம் ஒழிப்பு பிரச்சினை தற்போது இந்திய அரசியலில் முக்கிய இடம் பெற்றுள்ளது. இந்த பிரச்சினை குறித்து நாடு தழுவிய மக்கள் இயக்கம் தீவிரம் அடைந்து வருகிறது. அதைத் தொடர்ந்து இந்த பிரச்சினைக்கு தீர்வு காண்பதற்கு மத்திய அரசு தீவிர நடவடிக்கை மேற்கொண்டு வருகிறது.

மத்திய நேரடி வரி விதிப்பு வாரியம் சார்பில், கறுப்பு பணம் மற்றும் சட்டவிரோத நிதி தொடர்பான பிரச்சினைகளை தீர்ப்பதற்கான ஆலோசனைகளை வழங்கும்படி பொது மக்களுக்கு வேண்டுகோள் விடுக்கப்பட்டு இருந்தது. அதன்படி, பொதுமக்களிடம் இருந்து பல்வேறு யோசனைகள் தெரிவிக்கப்பட்டன.

500, 1000 ரூபாய் நோட்டுகள்

அந்த யோசனைகள் குறித்து மத்திய நிதித்துறை அமைச்சகத்தின் கட்டுப்பாட்டில் உள்ள நேரடி வரிவிதிப்பு வாரிய தலைவர் தலைமையிலான குழு ஆய்வு செய்து மத்திய அரசுக்கு அறிக்கை ஒன்றை தாக்கல் செய்து உள்ளது. அதன்படி, ரூ.500 மற்றும் 1000 ரூபாய் நோட்டுகளை செல்லாது என்று அறிவிக்கவேண்டும் என்பதே பொதுமக்களிடம் இருந்து அதிக அளவில் தெரிவிக்கப்பட்ட யோசனையாகும்.

ஆனால், கறுப்பு பணத்தை கட்டுப்படுத்த இந்த யோசனை உரிய பயன் அளிக்காது என்று அந்த அறிக்கையில் ஆய்வு குழு தெரிவித்து உள்ளது. ஏன் என்றால், தற்போது கறுப்பு பணம் ரூபாய் நோட்டுகளாக அல்லாமல், பினாமி பெயரில் சொத்துகள், தங்கம், வெள்ளி நாணயங்கள் மற்றும் நகைகளில் முதலீடு செய்யப்படுவதாக, அதில் குறிப்பிடப்பட்டு உள்ளது.

வங்கிப்பணிகளில் சிக்கல்

"அதே நேரத்தில் இந்த யோசனையை அமல்படுத்தினால், 1000 மற்றும் 500 ரூபாய் நோட்டுகளுக்கு இணையாக சில்லரை நோட்டுகளை அச்சிடுவதற்கு கூடுதல் செலவு ஆகும். அத்துடன் வங்கி நடைமுறை பணிகளில் எதிர்விளைவையும் இந்த நடவடிக்கை ஏற்படுத்திவிடும். பணப்பரிமாற்றம் சிக்கலாகிவிடுவதுடன், நிறுவனங்கள் சம்பளம் மற்றும் கூலிகளை வழங்குவதிலும் சிக்கலலை ஏற்படுத்தி விடும்'' என்றும் அறிக்கையில் குறிப்பிடப்பட்டு உள்ளது.

மேலும் இந்த யோசனையை மத்திய நிதி அமைச்சகத்தின் உயர் அமைப்புகளான அமலாக்க பிரிவு, வருவாய் புலனாய்வு இயக்குனரகம், நிதி புலனாய்வு பிரிவு போன்றவைகளும் ஏற்க மறுத்துவிட்டன. இந்த யோசனையைத் தவிர, வலுவான லோக்பால் சட்டம் கொண்டு வருவது, கறுப்பு பணம் பதுக்கி வைத்து இருப்பவர்களை தாங்களே முன்வந்து அரசிடம் ஒப்படைக்கக் கோருவது போன்ற யோசனைகளும் பொது மக்களால் தெரிவிக்கப்பட்டு இருந்தது.

தினத்தந்தி

கள்ளப் பணம் வைத்திருப்பவர்களுக்கு தெரியாதா எப்படி சட்டம் வருமுன் மாற்றுவது என்று?

இதிலும் பாதிக்கப்படப் போவது நடுத்தர மக்கள் வைத்திருக்கும் கொஞ்ச நஞ்ச பணத்துக்குத் தான்.

இது எனக்கென்னவோ 'மூட்டைப்பூச்சிக்கு பயந்து வீட்டை கொளுத்திய கதைதான்' என்று தோன்றுகிறது.

கள்ளப்பணத்தை தடுப்பது இருக்கட்டும்,, முதலில் கருப்பு பணத்தை ஒழிப்பதில் அரசு ஈடுபடுமா?
நாம்தான் திருடன் கையில் சாவியை கொடுத்திருக்கிறோமே!!
அவர்கள்.. திருடன் கையில் தேள் கொட்டியதை போல் மௌனம் சாதிக்கிறார்கள்.. சுவிஸ்வங்கி கணக்காளர்களை வெளிக்கொணருவதைத்தான் சொல்கிறேன்...

கறுப்பு பணம் பதுக்கி வைத்து இருப்பவர்களை தாங்களே முன்வந்து அரசிடம்
ஒப்படைக்கக் கோருவது

சொன்னவுடன் செய்து விடுவார்கள்...