மொத்தமாக எஸ்.எம்.எஸ்., அனுப்ப மத்திய அரசு அதிரடி தடை

**சிவா** · **சிவா** Sat Aug 18, 2012 8:33 am

அசாம் பிரச்சினையில் வதந்திகள் பரப்பப்படுவதை அடுத்து மொத்தமாக எஸ்.எம்.எஸ்., எம்.எம்.எஸ்., அனுப்ப மத்திய அரசு அதிரடி தடை விதித்துள்ளது. இது 15 நாள் அமலில் இருக்கும்.

வதந்திகள்

அசாம் இன கலவரங்களை தொடர்ந்து, தென் மாநிலங்களில் வாழ்ந்து வந்த அசாம் உள்ளிட்ட வட கிழக்கு மாநிலத்தவருக்கு, அவர்கள் தாக்கப்படப்போவதாக செல்போனில் எஸ்.எம்.எஸ்., மூலம் வதந்திகள் பரவின.

கற்பனையாக திரிக்கப்பட்ட படங்கள் எம்.எம்.எஸ்.களாகவும் செல்போன்களில் அனுப்பப்பட்டன. பேஸ்புக், டுவிட்டர் போன்ற சமூக வலைத்தளங்களிலும் இத்தகைய வதந்திகள் பரப்பப்பட்டன.

இதனால் தென்மாநிலங்களில் வசித்து வந்த வடகிழக்கு மாநிலத்தவர் பதற்றம் அடைந்து, கூட்டம் கூட்டமாக ரெயில்களில் சொந்த ஊருக்கு திரும்புகின்றனர்.

அதிரடி தடை

இந்த நிலையில் வதந்திகளை பரப்புவதை தடை செய்யும் நோக்கத்தில் மத்திய அரசு நேற்று அதிரடி நடவடிக்கை எடுத்தது. இதுகுறித்து, மத்திய உள்துறைச்செயலாளர் ஆர்.கே.சிங் கூறுகையில், "மொத்தம், மொத்தமாக எஸ்.எம்.எஸ்., எம்.எம்.எஸ்.கள் அனுப்புவதை நாங்கள் தடை செய்திருக்கிறோம்'' என்றார்.

இந்த உத்தரவை தொலைதொடர்பு சேவை நிறுவனங்கள் மூலம் உடனடியாக அமல்படுத்துமாறு தொலைதொடர்பு துறையை மத்திய உள்துறை அமைச்சகம் கேட்டுக்கொண்டது. அதைத் தொடர்ந்து மத்திய அரசின் தடை உத்தரவு நேற்றே அமலுக்கு வந்துள்ளது. ஒரே நேரத்தில் 5 எஸ்.எம்.எஸ்.களுக்கு மேல் யாரும் அனுப்ப முடியாது. செல்போன் வழியாக 20 கே.பி.க்கு அதிகமான தகவல்களையும் அனுப்ப இயலாது.

15 நாள் அமல்

இந்த தடை உத்தரவு நேற்று முதல் 15 நாட்கள் அமலில் இருக்கும்.

எஸ்.எம்.எஸ்., எம்.எம்.எஸ்., சமூக வலைத்தளங்கள் வாயிலாக வதந்திகளை பரப்புகிறவர்கள் சட்டத்தின் முன் நிறுத்தப்பட்டு கடுமையாக தண்டிக்கப்படுவார்கள் என்று பிரதமர் மன்மோகன் சிங் எச்சரித்திருப்பது குறிப்பிடத்தக்கது.

**சிவா** · **சிவா** Sat Aug 18, 2012 8:34 am

பெங்களூரில் பரபரப்பு: மணிப்பூர் மாநில வாலிபர் மீது தாக்குதல்: 5 பேர் கைது

பெங்களூரில் மணிப்பூர் மாநில வாலிபர் மீது தாக்குதல் நடத்தப்பட்டது. இதுதொடர்பாக 5 பேரை போலீசார் கைது செய்தனர்.

வாலிபர் மீது தாக்குதல்

வடகிழக்கு மாநிலமான மணிப்பூரை சேர்ந்தவர் லயாலியா விப்காய்(வயது 22). இவர் பெங்களூர் ஜெயநகரில் வசித்து வருகிறார். இவருடன் அதே மாநிலத்தை சேர்ந்த ராபர்ட் மற்றும் வால்டே ஆகியோரும் தங்கி இருக்கிறார்கள். நேற்று மதியம் இவர்கள் 3 பேரும் சாந்திநகர் பஸ் நிலையம் அருகே உள்ள வணிகவளாகத்திற்கு சென்று சில பொருட்களை வாங்கி விட்டு வெளியே வந்தார்கள்.

சாந்திநகர் டபுள் ரோட்டில் வரும்போது திடீரென்று அங்கு வந்த ஒரு கும்பல் தனியாக நடந்து சென்ற லயாலியாவை வழிமறித்து பயங்கரமாக தாக்கியது. இதை பார்த்து பின்னால் சிறிது தூரத்தில் நடந்து வந்த ராபர்ட், வால்டே அதிர்ச்சி அடைந்து ஓடி வந்தனர். உடனே அங்கிருந்து மர்ம கும்பல் தப்பி ஓடி விட்டது. இதுபற்றி வில்சன்கார்டன் போலீசில் லயாலியா புகார் செய்தார். அதன்பேரில் போலீசார் வழக்கு பதிவு செய்து கொண்டனர்.

5 பேர் கைது

இந்த சம்பவம் தகவல் கிடைத்ததும் போலீசார் அவசர ஆலோசனை நடத்தி, தலைமறைவான மர்மகும்பலை பிடிக்க நடவடிக்கை எடுத்தார்கள். சம்பவ இடத்திற்கு சென்று வணிக வளாகத்தில் உள்ள ரகசிய கண்காணிப்பு காமிராவில் வடமாநில வாலிபர்களை தாக்கிய மர்ம நபர்களின் உருவங்கள் பதிந்து உள்ளதா? பரிசோதித்தார்கள்.

அப்போது தாக்குதல் நடந்த சம்பவம் அதில் பதிவாகி இருந்தது. அதன் அடிப்படையில் வடமாநில வாலிபர் தாக்கப்பட்ட அடுத்த சில மணி நேரங்களில், இந்த சம்பவத்தில் தொடர்புடைய வில்சன்கார்டன் பகுதியை சேர்ந்த அப்ரர் அகமது(25), சல்மான்(22), வினய்(20) மற்றும் அவர்களுக்கு உதவிய முகமது, அந்தோணி ஆகிய 5 பேரை கைது செய்தனர். அவர்களிடம் விசாரணை நடந்து வருகிறது.