144 தடை உத்தரவு எதிரொலி: பாதுகாப்பு வளையத்தில் கூடங்குளம்

கூடங்குளத்தை சுற்றி 7 கிலோ மீட்டர் தூரத்துக்கு 144 தடை உத்தரவு விரிவுபடுத்தப்பட்டு உள்ளதால் ஆயிரக்கணக்கான போலீசார் பாதுகாப்பு பணியில் இரவு-பகலாக ஈடுபட்டு வருகிறார்கள். கூடங்குளம் பகுதிக்கு வரும் வாகனங்கள் அனைத்தும் தீவிரமாக கண்காணிக்கப்படுகின்றன.

கூடங்குளம் போராட்டம்

நெல்லை மாவட்டம் கூடங்குளம் அணுமின் நிலைய எதிர்ப்பாளர்களின் போராட்டத்தை முடிவுக்கு கொண்டு வர மத்திய, மாநில அரசுகள் நடவடிக்கை எடுத்து வருகின்றன. இதற்கிடையே வெகு விரைவில் கூடங்குளம் அணுமின் நிலையத்தில் மின்சார உற்பத்தியை தொடங்குவதற்காக அணுமின் நிலைய நிர்வாகம் அனைத்து பணிகளையும் முடுக்கி விட்டுள்ளது. இதற்காக முதல் அணு உலையில் விரைவில் யுரேனியம் எரிபொருள் நிரப்பப்படும் என்று அறிவிக்கப்பட்டு உள்ளது.

இதற்கு எதிர்ப்பு தெரிவித்தும், அணு உலை எதிர்ப்பாளர்களின் போராட்டத்தை கண்டுகொள்ளவில்லை என்று கூறி மத்திய, மாநில அரசுகளை கண்டித்தும் அணு உலை எதிர்ப்பாளர்கள் சுதந்திர தினத்தை கறுப்பு தினமாக கடைபிடிக்கப் போவதாக அறிவித்துள்ளனர்.

பாதுகாப்பு வளையம்

இதுபோன்ற காரணங்களால் கூடங்குளத்தில் அமல்படுத்தப்பட்டு இருந்த 144 தடை உத்தரவு அதிரடியாக 7 கிலோ மீட்டர் சுற்றளவுக்கு விரிவுபடுத்தப்பட்டு இருக்கிறது. உடனடியாக ஆயிரக்கணக்கான போலீசார் குவிக்கப்பட்டனர். அணுமின் நிலையத்துக்கும் பாதுகாப்பு மேலும் பலப்படுத்தப்பட்டு உள்ளது.

அணு உலையில் எரிபொருள் நிரப்பப்படும் போது போராட்டக்காரர்கள் புதிய போராட்டங்களில் ஈடுபட வாய்ப்பு உள்ளது என்று கருதி கூடுதல் போலீஸ் பாதுகாப்பு போடப்பட்டு இருப்பதாகவும் கூறுகிறார்கள். கூடங்குளத்துக்கு வரும் வாகனங்களும் தீவிரமாக கண்காணிக்கப்படுகின்றன. போராட்ட பந்தல் அமைந்துள்ள இடிந்தகரைக்கு சென்று வரும் வாகனங்களும் கண்காணிக்கப்படுகின்றன.

போலீஸ் குவிப்பு காரணமாக கூடங்குளம் பகுதியில் பதற்றம் நிலவுகிறது.


தினத்தந்தி!

யாரு தடுத்தாலும் நம்ம அரசியல்வாதிங்க நினைத்ததை செய்யாமல் விடமாட்டார்கள்

ஒன்னு கூடங்குளத்தை கைவிட்டுடனும் இல்லைன்னா மின் உற்பத்தி ஆரம்பிக்கனும். ரெண்டுக்கும் வழியில்லையே