தங்க மனசு

**சிவா** · **சிவா** Mon Aug 13, 2012 9:18 am

மாப்பிள்ளை வீட்டார் வந்து போனதிலிருந்து செல்வராஜா ஒரு மாதிரியாகவே இருந்தான். இதுவரை அவனது தங்கை சொர்ணாவை ஏழு பேருக்கு மேலாக வந்து பெண் பார்த்து விட்டு போய்விட்டார்கள்.

எல்லா மாப்பிள்ளைகளுக்கும் தங்கை சொர்ணாவை பிடித்து விடுகிறது. ஆனால், நகை, ரொக்கம் என்று பேச்சு வரும்போது மட்டும் சொர்ணாவை பிடிப்பதில்லை.

மாப்பிள்ளைகளின் நிராகரிப்புகள் சொர்ணாவின் காதுகளுக்கு போய் சேரும்போதெல்லாம் எழும் விரக்தியில் கண்களிலிருந்து திமிறி கண்ணீர் வெளியேறும். செல்வராஜாவுக்கும் கண்கள் கலங்கும்.

அந்த தருணங்களில் சொர்ணாவுக்கு மட்டுமல்ல, செல்வராஜாவுக்கும் சேர்த்து ஆறுதல் சொல்வது அவனது மனைவி கயல்விழி தான்.

"ஏங்க இப்படி வருத்தமா இருக்கீங்க? இந்த மாப்பிள்ளை இல்லையின்னா இனியொரு மாப்பிள்ளை. ஊரு உலகத்துல இல்லாமலா போயிடுவாங்க?...!'' கயல்விழி ஆறுதல் சொல்லும் போதெல்லாம் செல்வராஜா அவள் கரங்களை பற்றிக் கொள்வான். நொடியில் எல்லா கவலைகளும் ஓடி ஒளிந்துவிடும்.

அன்றும் சொர்ணாவை பெண் பார்க்க வந்த மாப்பிள்ளை வீட்டார் முப்பது பவுன் நகை கேட்கவே, மறுபடியும் மனம் வருந்தினான் செல்வராஜா.

"என்னங்க... உங்க கையில் இருபது பவுன் நகை இருக்கு, கூட பத்து பவுன் கேக்கறாங்க, உங்களால முடியலைன்னா பத்து பவுனுக்கு கவரிங் நகை வாங்கி போட்டாவது உங்க தங்கச்சி கல்யாணத்த முடிச்சிடுங்க...!'' கயல்விழி சொன்னபோது சுருக்கென்று கோபம் வந்தது. இருந்தாலும் அடக்கிக் கொண்டான்.

அன்றிரவு தனிமையில் கயல்விழி சொன்னதை யோசித்தபோது "அப்படி செய்தால் என்ன?'' என்று தோன்றியது செல்வராஜாவுக்கு.

மறுநாள் மாப்பிள்ளை வீட்டாருக்கு வாக்கு கொடுக்க, திருமணநாள் குறிக்கப்பட்டது.

திருமணநாள் நெருங்கியது. கையிலிருந்த நகைகள் அல்லாமல் பத்துபவுன் அளவிற்கு கவரிங் நகை வாங்கி வந்து யாருக்கும் தெரியாமல் தனது மனைவி கயல்விழியிடம் தந்தான்.

சொர்ணா கழுத்தில் மாப்பிள்ளை தாலி கட்ட இனியும் ஐந்து நிமிடங்களே பாக்கியிருந்தது.

செல்வராஜா பதட்டமாகவே இருந்தான்.

"ஏங்க... பதட்டமாவே இருக்கீங்க...?''

"உனக்கு தெரியாததா...!''

"நீங்க கவரிங் நகை போட்டத கண்டு பிடிச்சிடுவாங்களோன்னு பயப்படுறீங்களா? சான்சே இல்லீங்க, உங்க தங்கச்சி போட்டிருக்கிறது சுத்த தங்கம் தாங்க. கவரிங் போட்டிருக்கிறது நான்...!'' செல்வராஜா கயல்விழி சொன்னதைக்கேட்டு அதிர்ந்து போய் நின்றான்.

திருமணமாகி மூன்று மாதமே ஆன கயல்விழி அவளது நகைகளை கழட்டி தனது நாத்தனார் சொர்ணாவுக்கு தந்துவிட்டு கவரிங் நகைகளை தானே போட்டுக் கொண்டு ஒன்றும் அறியாதவள்போல் கல்யாண வேலைகளில் மும்முரமாக இருந்தாள்.

"ஏம்மா.. இப்படி செஞ்ச... உன் அம்மா அப்பாவுக்கு நீ போட்டிருக்கிறது கவரிங் நகைன்னு தெரிஞ்சா என்ன ஒரு மாதிரியா பேசுவாங்களே...!''

"இந்த விஷயம் மாப்பிள்ளை வீட்டுக்காரங்களுக்கு தெரிஞ்சு உங்கள தரக்குறைவா பேசுனா நம்மால பதில் சொல்லி சமாளிக்க முடியாது, அதே நேரத்துல என் அம்மா அப்பா கேட்டா அவங்கள நான் பதில் சொல்லி சமாளிச்சுக்குவேன்! ஏன்னா நான் உங்களோட சொத்துங்க..!'' சொல்லிவிட்டு கல்யாண வேலைகளை கவனித்த தனது மனைவியின் தங்க மனசை நினைத்து சிலிர்த்துக் கொண்டான் செல்வராஜா.

-ஐரேனிபுரம் பால் ராசய்யா