மலருக்காக உயிரை விடும் மான்கள்!

**சிவா** · **சிவா** Fri Oct 09, 2009 1:14 am

பெ.நா.பாளையம்: கோவை அருகே, மலையோர விவசாய நிலங்களில் கூட்டம், கூட்டமாக ஊடுருவும் மான்கள் மல்லி, முல்லை மலர்களை தின்று, விவசாயிகளுக்கு நஷ்டம் ஏற்படுத்துகின்றன. இரண்டு நாட்களுக்கு முன் வழக்கம் போல மலர்களை சுவைக்க ஊடுருவிய இரு புள்ளி மான்களை, நாய்கள் கடித்து குதறி கொன்றன.

கோவை மேற்கு தொடர்ச்சி மலைப் பகுதியில் யானை, கரடி, சிறுத்தை, காட்டெருமை, மான், காட்டுப்பன்றிகளின் எண்ணிக்கை அதிகரித்து வருகிறது. வனப்பகுதியில் போதிய உணவு கிடைக்காத விலங்குகள், கிராமங்களிலுள்ள விவசாய நிலத்தை முற்றுகையிட துவங்கியுள்ளன. யானையை தொடர்ந்து மயில், மான், காட்டுப்பன்றி ஆகியவையும் மலையோர கிராமங்களை நோக்கி வரத்துவங்கியுள்ளன. விவசாய பூமியில் பயிரிடப்பட்டுள்ள தக்காளி மற்றும் பழ வகைகளை உட்கொள்ள மயில்கள் கூட்டம், கூட்டமாக படையெடுத்து வருகின்றன. கட்டுப்படுத்த முடியாமல் விவசாயிகள் திணறி வருகின்றனர். இதே போல மல்லிகை, முல்லை செடிகளில் உள்ள பூக்களை தின்ன அதிகாலை நேரத்தில் மான்கள் வருகின்றன.

ஒரு மணி நேரத்தில் இரண்டு ஏக்கர் பரப்பில் உள்ள பூச்செடிகளில் உள்ள பூக்களை தின்று விட்டு மாயமாகிவிடுகின்றன. காட்டுப்பன்றிகள், மரவள்ளி செடிகளின் வேர் பகுதியை குடைந்து கிழங்குகளை உட்கொள்கின்றன. இவற்றை விரட்ட காடுகளில் விடிய, விடிய காவல் காக்கும் பணியில் விவசாயிகள் ஈடுபட்டுள்ளனர். கூ.கவுண்டம்பாளையம் பேரூராட்சிக்குட்பட்ட பாரதிநகர் பகுதியில் இரண்டு நாட்களுக்கு முன், ஐந்து வயது ஆண் மான் இரை தேடி தோட்டத்துக்குள் புகுந்துள் ளது. மானை கண்டதும், அங்கு சுற்றித்திரிந்த நாய்கள் துரத்தி கடித்து குதறியது. காயமடைந்த மான் அதே இடத்தில் இறந்தது. பெரியநாயக்கன்பாளையம் வனத் துறைக்கு தகவல் தெரிவிக்கப் பட்டு, மான் எரிக்கப்பட்டது. அதே போன்று, பாரதி நகர் பகுதியில் இரை தேடி வந்த, ஆறு வயது ஆண் மானை துரத்திய நாய்கள் கடித்து கொன்றது.

அடுத்தடுத்து புள்ளி மான்கள் கொல்லப்பட்ட சம்பவம் குறித்து வனத்துறை ரேஞ்சர் பன்னீர் செல்வம் கூறியதாவது: வனத்துறை சட்டப்படி, பாதுக் காக்கப்பட்ட விலங்கினங்களின் பட்டியலில் மான் உள்ளது. பாதுகாப்பு அளிக்க வேண்டியது அனைவரின் கடமை. வழி தவறி கிராமங்களுக்குள் வரும் விலங்குகள் குறித்து வனத்துறையினருக்கு தெரிவிக்க வேண்டும். இது போன்ற சம்பவங்கள் தொடர்ந்தால் நாய் வளர்ப்போர் மீது வனத்துறை சட்டப்படி நடவடிக்கை எடுக்கப்படும் இவ்வாறு, பன்னீர்செல்வம் தெரிவித்தார்.