மாவோயிஸ்டுகள் தாக்குதலில் 18 போலீஸ் பலி

மாவோயிஸ்டுகள் தாக்குதலில் 18 போலீஸ் பலி : 4 மணி நேரம் நடந்தது மோதல்


நாக்பூர் : மகாராஷ்டிராவில் லகிரி என்ற இடத்தில் உள்ள போலீஸ் ஸ்டேஷனை, 150க்கும் மேற்பட்ட நக்சலைட்கள் சுற்றிவளைத்து நேற்று அதிரடியாக தாக்கினர். நான்கு மணி நேரம் நடந்த சண்டையில் 18 போலீசார் கொல்லப்பட்டனர். சட்டசபை தேர்தல் நடப்பதற்கு இன்னும் சில நாட்களே உள்ள நிலையில், மாவோயிஸ்டுகள் நடத்திய இந்த தாக்குதல் மகாராஷ்டிராவில் பெரும் பரபரப்பை ஏற்படுத்தியுள்ளது.


மகாராஷ்டிராவில், வரும் 13ம் தேதி சட்டசபை தேர்தல் நடக்கவுள்ளது. அரசியல் கட்சிகளின் பிரசாரம் உச்சகட்டத்தை அடைந்துள்ளது. இந்த பரபரப்பான சூழ்நிலையில், நேற்று கட்சிரோலி மாவட்டத்தில் லகிரி என்ற கிராமம் அருகே உள்ள போலீஸ் ஸ்டேஷனை, 150க்கும் மேற்பட்ட நக்சலைட்கள் பயங்கர ஆயுதங்களுடன் அதிரடியாக முற்றுகையிட்டனர். இந்த சம்பவம் நடந்தபோது 45க்கும் மேற்பட்ட போலீசார் அங்கு இருந்தனர். இரு தரப்பினருக்கும் இடையே கடும் துப்பாக்கிச் சண்டை நடந்தது. நக்சலைட்கள் குண்டுகளை வீசியும் தாக்குதல் நடத்தினர். நான்கு மணி நேரத்துக்கும் மேலாக நடந்த இந்த சண்டை முடிவுக்கு வந்ததும், நக்சலைட்கள் அங்கிருந்து தப்பி ஓடினர். நக்சலைட்கள் நடத்திய தாக்குதலில் எஸ்.ஐ., தேஷ்முக் உட்பட 18 போலீசார் கொல்லப்பட்டனர். இங்குள்ள போலீஸ் சோதனைச் சாவடி மீதும், கிராம ஊராட்சி அலுவலகம் மீதும் நக்சலைட்கள் தாக்குதல் நடத்தினர். சம்பவ இடத்திற்கு கூடுதல் போலீஸ் படை அனுப்பி வைக்கப்பட்டது. தப்பி ஓடிய நக்சலைட்களை போலீசார் தீவிரமாக தேடி வருகின்றனர்.


இதுகுறித்து போலீஸ் அதிகாரி ஒருவர் கூறுகையில்,"இரு தரப்பினருக்கும் இடையே நடந்த சண்டையில் நக்சலைட்களுக்கும் பாதிப்பு ஏற்பட்டுள்ளது. இருந்தாலும், இதுகுறித்து தகவலை உறுதிப்படுத்த முடியவில்லை' என்றார். சட்டசபை தேர்தல் நடப்பதற்கு இன்னும் நான்கு நாட்களே உள்ள நிலையில், நக்சலைட்கள் நடத்திய இந்த தாக்குதல், மகாராஷ்டிராவில் பெரும் பரபரப்பை ஏற்படுத்தியுள்ளது. தேர்தலை அமைதியாக நடக்கவிடாமல் தடுக்கும் வகையில் மாவோயிஸ்டுகள் இந்த தாக்குதலை நடத்தியிருக்கலாம் என, போலீஸ் தரப்பில் தெரிவிக்கப்படுகிறது.


இதுகுறித்து மகாராஷ்டிரா உள்துறை அமைச்சர் ஜெயந்த் பட்டீல் கூறுகையில், "நக்சலைட்கள் நடத்திய தாக்குல் மிகவும் கொடூரமானது. நக்சலைட்களுக்கு எதிரான போலீசாரின் நடவடிக்கை மேலும் தீவிரப் படுத்தப்படும்' என்றார். கடந்த பிப்ரவரி மற்றும் மே மாதங்களில் கட்சிரோலி மாவட்டத்தில் நக்சலைட்கள் நடத்திய தாக்குதல் சம்பவங்களில் ஐந்து பெண்கள் மற்றும் 26 போலீசார் கொல்லப்பட்டனர் என்பது குறிப்பிடத்தக்கது.

சபாஸ் சரியான போட்டி