குளித்தலை அருகே பயங்கரம், வக்கீல் உள்பட 2 பேர் படுகொலை

குளித்தலை அருகே திருச்சி வக்கீல் உள்பட 2 பேரை 15 பேர் கொண்ட கும்பல் வெட்டி படுகொலை செய்தது.

திருச்சி வக்கீல்

கரூர் மாவட்டம் குளித்தலை அருகே உள்ள கவுண்டம்பட்டியை சேர்ந்தவர் ரவிச்சந்திரன் (வயது 30). வக்கீலான இவர் தினமும் திருச்சிக்கு வந்து தொழில் செய்து வந்தார். இவரது அண்ணன் செல்வராஜின் மகன் சுரேஷ் (23). இவர் கவுண்டம்பட்டியில் சைக்கிள் கடை நடத்தி வந்தார்.

சுரேஷ் கவுண்டம்பட்டிக்கும், மேட்டுப்பட்டிக்கும் இடையில் உள்ள தனது வயலில் மல்லிகைப்பூ சாகுபடி செய்திருந்தார். இந்த வயலுக்கு வாய்க்காலில் இருந்து தண்ணீர் பாய்ச்சி வந்தார்.

தண்ணீர் பாய்ச்சுவதில் தகராறு

மேட்டுகாட்டை சேர்ந்த சம்பத் மகன் கண்ணனுக்கும் அருகிலேயே வயல் உள்ளது. அவரும் மல்லிகை சாகுபடி செய்துள்ளார். சுரேஷ் வயலுக்கு தண்ணீர் விடாமல் அவர் எப்போதும் தனது வயலுக்கே தண்ணீர் பாய்ச்சி வந்ததாக தெரிகிறது. இதனால் அவர்களுக்குள் சில நாட்களுக்கு முன்பு தகராறு ஏற்பட்டது.

இதுபற்றி சுரேஷ் தனது சித்தப்பா வக்கீல் ரவிச்சந்திரனிடம் கூறினார். அவர் இதுபற்றி கண்ணனிடம் கேட்டுக்கொள்ளலாம் என்று சொல்லி இருக்கிறார். இந்த நிலையில் சுரேஷ் வயலுக்கு செல்லும் தண்ணீரை கண்ணன் திருப்பி தனது வயலுக்கு விட்டுள்ளார். இதனால் அவர்களுக்கிடையே மீண்டும் தகராறு ஏற்பட்டது.

15 பேர் கும்பல் தாக்குதல்

நேற்று காலை சுரேஷ், ரவிச்சந்திரன் ஆகியோர் கண்ணன் வீட்டுக்கு சென்றனர். அப்போது கண்ணன் வீட்டில் இல்லை. அதனால் வீட்டில் இருந்தவர்களிடம் கண்ணனை கண்டித்து வைக்குமாறு சொல்லி விட்டு இருவரும் கிளம்பினார்கள்.

சுரேஷும், ரவிச்சந்திரனும் வீட்டுக்கு வந்து சத்தம் போட்ட தகவல் அறிந்து கண்ணன் ஆத்திரம் அடைந்தார். அவர் தனது ஆதரவாளர்கள் மணிவண்ணன், ஐயர், மகேஷ் உள்பட 15 பேருடன் நேற்று இரவு 10 மணிக்கு மோட்டார் சைக்கிள்களில் அரிவாள், கத்தி போன்ற ஆயுதங்களுடன் கவுண்டம்பட்டிக்கு சென்றனர். அப்போது சைக்கிள் கடை அருகே உட்கார்ந்திருந்த ரவிச்சந்திரனையும், சுரேஷையும் சரமாரியாக அரிவாளால் வெட்டிவிட்டு தப்பிச் சென்றனர்.

2 பேர் படுகொலை

இதில் இருவரும் ரத்த வெள்ளத்தில் தரையில் சாய்ந்து உயிருக்கு போராடிக்கொண்டு இருந்தனர். 2 பேரையும் அக்கம்பக்கத்தில் உள்ளவர்கள் மீட்டு திருச்சியில் உள்ள தனியார் ஆஸ்பத்திரிக்கு கொண்டு வந்தனர். வழியிலேயே 2 பேரும் பரிதாபமாக உயிர் இழந்தனர்.

இதுகுறித்து குளித்தலை போலீசார் வழக்கு பதிவு செய்து 15 பேர் கொண்ட கும்பலை வலைவீசி தேடி வருகிறார்கள்.

கொலையுண்ட வக்கீல் ரவிச்சந்திரனுக்கு நாகமணி என்ற மனைவியும், 2 மகள்களும் உள்ளனர். சுரேசுக்கு கவுதமி என்ற மனைவியும், அங்குராஜ் (2) என்ற மகனும் உள்ளனர். தற்போது கவுதமி நிறைமாத கர்ப்பிணியாக உள்ளார்.

தினத்தந்தி