நாளை கடைசி போட்டி: இந்தியா ஹாட்ரிக் வெற்றி பெறுமா?

**சிவா** · **சிவா** Fri 3 Aug 2012 - 20:30

டோனி தலைமையிலான இந்திய கிரிக்கெட் அணி இலங்கையில் சுற்றுப்பயணம் செய்து விளையாடி வருகிறது. இரு அணிகள் இடையேயான 5 ஒருநாள் போட்டித் தொடரில் முதல் ஆட்டத்தில் 21 ரன்னிலும், 3-வது ஆட்டத்தில் 5 விக்கெட் வித்தியாசத்திலும், 4-வது ஆட்டத்தில் 6 விக்கெட் வித்தியாசத்திலும் இந்தியா வெற்றி பெற்றது. 2-வது ஆட்டத்தில் இலங்கை 9 விக்கெட்டில் வெற்றி பெற்றது. இதனால் இந்தியா 3-1 என்ற கணக்கில் தொடரை கைப்பற்றி உள்ளது.

இந்தியா-இலங்கை அணிகள் மோதும் 5-வது மற்றும் கடைசி ஒருநாள் போட்டி கொழும்பில் நாளை (4-ந் தேதி) நடக்கிறது. தொடர்ந்து 2 ஆட்டத்தில் வெற்றி பெற்ற இந்திய அணி நாளைய போட்டியிலும் வெற்றி பெற்று ஹாட்ரிக் சாதனை படைக்குமா? என்று ரசிகர்கள் ஆவலுடன் எதிர்நோக்கி உள்ளனர்.

பேட்டிங்கில் வீராட் கோலி, காம்பீர், ஷேவாக், ரெய்னா ஆகியோர் சிறப்பாக ஆடிவருவது அணிக்கு சாதகமான நிலையை ஏற்படுத்தி உள்ளது. மிடில் ஆர்டரில் விளையாடும் ரோகித் சர்மா 4 ஆட்டத்திலும் சோபிக்கவில்லை. இதனால் அவருக்கு பதிலாக ரகானேவுக்கு டோனி வாய்ப்பு கொடுக்கலாம். கடந்த போட்டியில் பகுதி நேர பவுலராக மனோஜ் திவாரி சிறப்பாக வீசினார். இதனால் அவர் தொடர்ந்து அணியில் நீடிக்கப்படலாம்.

இலங்கை அணி அதன் சொந்த மண்ணில் ஒருநாள் தொடரை இழந்தது பரிதாபமே. சங்ககரா காயம் காரணமாக விளையாடாதது அந்த அணிக்கு பாதிப்பே. அதை சரிசெய்ய வேண்டிய நிலையில் இலங்கை பேட்ஸ்மேன்கள் உள்ளனர்.

கடைசி போட்டியில் வெற்றிபெற அந்த அணி கடுமையாக போராடும். நாளைய போட்டி பகல்-இரவாக நடக்கிறது. இந்திய நேரப்படி பிற்பகல் 2.30 மணிக்கு போட்டி தொடங்குகிறது. டென் கிரிக்கெட் சேனலில் இந்தப் போட்டி நேரிடையாக ஒளிபரப்பு செய்யப்படுகிறது.