கிரிக்கெட் மைதானத்தில் இந்தியர்கள் மீது பாட்டில்களை வீசிய இலங்கை ரசிகர்கள்

First topic message reminder :



கொழும்பு: இலங்கை, இந்தியா நாடுகளுக்கு இடையிலான 4வது ஒருநாள் போட்டியை காண கொழும்பு மைதானத்திற்கு சென்ற இந்திய ரசிகர்களின் மீது இலங்கை ரசிகர்கள் பீர் பாட்டில்களை வீசியதாக தகவல் வெளியாகி உள்ளது.

இலங்கைக்கு சுற்றுப்பயணம் மேற்கொண்டுள்ள இந்திய அணி, அந்நாட்டு அணியுடன் 5 போட்டிகள் கொண்ட ஒருநாள் தொடரில் பங்கேற்று வருகிறது. இதில் இரு அணிகளுக்கு இடையிலான 4வது ஒருநாள் போட்டி கடந்த 31ம் தேதி நடைபெற்றது.
கொழும்புவில் உள்ள் பிரேமதாசா மைதானத்தில் நடைபெற்ற இப்போட்டியில் இந்திய அணி 6 விக்கெட் வித்தியாசத்தில் வெற்றி பெற்றது. இதன்மூலம் ஒருநாள் தொடரை 3-1 என்ற கணக்கில் இந்தியா வென்றது. இந்த நிலையில் போட்டியை காண மைதானத்திற்கு சென்ற இந்திய ரசிகர்களை, இலங்கை கொடிகளை எடுத்து காட்டுமாறு இலங்கை ரசிகர்கள் தொல்லை கொடுத்துள்ளனர்.

போட்டியில் இந்திய அணி வெற்றி பெறுவது போன்ற சூழ்நிலை ஏற்பட்ட போது, இந்திய ரசிகர்கள் உற்சாகம் அடைந்துள்ளனர். அதை கண்டு கோபமடைந்த இலங்கை ரசிகர்கள், அவர்களை மிரட்டியுள்ளனர். இதில் இந்திய மாஸ்டர் பேட்ஸ்மேன் சச்சினின் தீவிர ரசிகர் ஒருவரை சூழ்ந்து கொண்ட இலங்கை ரசிகர்கள் அவரை, இலங்கை கொடியை ஏந்தி, அசைத்து காட்டி இலங்கை வீரர்களை உற்சாகப்படுத்த கூறி மிரட்டியுள்ளனர்.

மேலும் மைதானத்தில் பீர் அருந்திய இலங்கை ரசிகர்கள் சிலர், மதுபாட்டில்களை இந்திய பெண் ரசிகர்கள் மீது ஏறிந்துள்ளனர். மைதானத்தில் கடும் போலீஸ் பாதுகாப்பு இருந்தும், இந்திய ரசிகர்களின் மீது தாக்குதல் நடத்தப்பட்டதாக, இந்திய நிருபர் ஒருவர் டுவிட்டர் இணையதளத்தில் தெரிவித்துள்ளார்.

இது குறித்து அவர் டுவிட்டர் இணையதளத்தில் கூறியிருப்பதாவது,
உலகில் வேறெந்த கிரிக்கெட் மைதானத்திலும் இது போன்ற தாக்குதல் சம்பவங்களை நான் பார்த்தது இல்லை. இலங்கை ரசிகர்களை விட, வங்கதேசத்தை சேர்ந்த கிரிக்கெட் ரசிகர்கள் மரியாதையாக நடந்து கொள்கின்றனர் என்று தெரிவித்துள்ளார்.

இது குறித்து டுவிட்டரில் வருத்தம் தெரிவித்துள்ள முன்னாள் இலங்கை வீரர் ரஷல் அர்னால்டு, இது போன்ற சம்பவங்கள் இனி நடைபெறாமல் இருக்க இலங்கை கிரிக்கெட் வாரியம் தகுந்த நடவடிக்கை எடுக்கும் என்று உறுதி அளித்துள்ளார். மேலும் நடைபெற்ற சம்பவம் மீது தகுந்த நடவடிக்கை எடுக்கப்படும் என்றார்.

நன்றி ஒன் இந்தியா

தகவலுக்கு நன்றி ரமேஷ்.