தீவிரவாதிகள் ஊடுருவுவதற்கு வசதியாக சுரங்கப்பாதை பாகிஸ்தானிடம் இந்திய எல்லை பாதுகாப்பு படை புகார்

காஷ்மீர் மாநிலம் சம்பா மாவட்டத்தில் உள்ள சர்வதேச எல்லையை ஒட்டிய பகுதியில் கடந்த 28-ந் தேதி பாகிஸ்தான் நாட்டில் இருந்து தீவிரவாதிகள் மற்றும் கடத்தல்காரர்கள் இந்தியாவிற்குள் ஊடுருவி வருவதற்கு வசதியாக பூமிக்கு அடியில் 400 மீட்டர் நீள சுரங்கப் பாதை தோண்டப்பட்டு இருந்தது கண்டுபிடிக்கப்பட்டது.

அந்த சுரங்கப்பாதையானது இந்தியாவில் காஷ்மீர் மாநிலம் சில்யாரி நிலை மற்றும் பாகிஸ்தானின் லும்பெரியால் நிலைகளுக்கு இடையே சர்வதேச எல்லைப்பகுதியில் 25 அடி ஆழத்தின் கீழ் தோண்டப்பட்டு இருந்தது. அது 3 மீட்டர் அகலம் மற்றும் 3 மீட்டர் உயர இடைவெளியுடன் காணப்பட்டது. அதன் வழியாக சென்று வருபவர்கள் சுவாசிப்பதற்கு வசதியாக ஆக்சிஜன் கொண்டு செல்லும் நோக்கில் 2 அங்குல விட்டம் உள்ள ஒரு பிளாஸ்டிக் குழாயும் அந்த சுரங்கப் பாதையில் அமைக்கப்பட்டு இருந்தது.

அந்த சுரங்கப் பாதையை பார்த்து எல்லை பாதுகாப்பு படை வீரர்கள் கடும் அதிர்ச்சி அடைந்தனர். இதுதொடர்பாக உரிய விசாரணை நடத்தப்படும் என்றும், மத்திய உள்துறை அமைச்சகம், ராணுவ அமைச்சகம் மற்றும் வெளியுறவுத்துறை அமைச்சகம் ஆகியவை கலந்து பேசி, அதில் எடுக்கப்படும் முடிவை பாகிஸ்தானுக்கு தெரியப்படுத்தி, இந்த பிரச்சினைக்கு ஒரு தீர்வு காண்பதற்கு முயற்சிகள் மேற்கொள்ளப்படும் என்றும் மத்திய அரசு அறிவித்து உள்ளது.

இந்த நிலையில், நேற்று பிற்பகல் 3 மணி அளவில் காஷ்மீர் மாநிலம் ஆர்.எஸ்.புரம் மண்டலத்தில் உள்ள ஒக்டோராய் நிலை பகுதியில் இந்தியா மற்றும் பாகிஸ்தான் நாடுகளின் எல்லைப் பாதுகாப்பு படை வீரர்களின் கொடி வணக்க கூட்டம் நடைபெற்றது.

அந்த கூட்டத்தின்போது, பாகிஸ்தான் வீரர்களிடம் சுரங்க விவகாரம் தொடர்பாக இந்திய எல்லை பாதுகாப்பு படை வீரர்கள் பிரச்சினை எழுப்பினார்கள். அவர்களிடம், சுரங்கப் பாதை கண்டுபிடிக்கப்பட்டதற்கான புகைப்பட ஆதாரங்கள் மற்றும் ஆவணங்களுடன் புகார் அளித்ததாக எல்லை பாதுகாப்பு படையின் உயர் அதிகாரி ஒருவர் தெரிவித்தார்.