நஷ்ட ஈடு

பெருமத்தூர் என்ற சிற்றூரில் கந்தன் என்ற சலவைத் தொழிலாளி வாழ்ந்து வந்தான். கருப்பன் அதே ஊரில் குயவனாக இருந்தான். குப்பன்
எண்ணெய் வியாபாரி ஆவான்.

கந்தனின் கழுதை பொதி சுமக்காமல் சண்டித்தனம் செய்ததால் கோபப்பட்டு காலை அடித்து உடைத்தான், "சீ... எங்காவது தொலைந்துபோ...'' என விரட்டிவிட்டான்.

அது காலை நொண்டியபடியே வீதியில் சென்றது. இதைக் கண்ட எண்ணை வியாபாரி குப்பன் கழுதை மீது இரக்கப்பட்டு ஒரு பழைய துணியை கிழித்து எண்ணையில் நனைத்து காயம்பட்ட இடத்தில் கட்டுப்போட்டு விட்டான்.

கழுதை கவலையின்றி நடந்து சென்றது. குயவனின் மண்பானை சுட்ட சூளையில் படுத்து புரண்டது. அங்கே அணைக்காமல் கிடந்த சிறு நெருப்பு பட்டு கழுதையின் காலில் இருந்த துணியில் பற்றி தீப்பிடித்தது. அது கனைத்தபடியே அருகிலுள்ள கரும்பு வயலுக்குள் புகுந்தது. காய்ந்திருந்த கரும்புத் தோகை, சருகுகளில் தீப்பற்றி கரும்புத் தோட்டம் எரிந்து கருகியது.

கரும்புத் தோட்டத்து உரிமையாளரான ராமன், இதுகுறித்து ஊர் நாட்டாண்மையிடம் முறையிட்டான். நஷ்ட ஈடு கேட்டான். முதலில் சலவைத் தொழிலாளியை விசாரித்த நாட்டாண்மை, "நீ தான் நஷ்ட ஈடு கொடுக்க வேண்டும்'' என்றார்.ஆனால், கந்தனோ, "அய்யா சாமி..., நான்தான் கழுதையே வேண்டாம்னு விரட்டிவிட்டேனே. நான் எப்படி இவ்வளவு பெரிய தொகையை தர முடியும்'' எனக்கூறி நஷ்ட ஈடு தர முடியாது என திட்டவட்டமாய் தெரிவித்தான். அதைப்
போலவே எண்ணெய் வியாபாரியும், குயவனும் நஷ்ட ஈடு தர முடியாது என கூறிவிட்டார்கள்.

மூவரும் ஆளுக்கு கொஞ்சமாய் நஷ்ட ஈடு தர நாட்டாண்மை சொல்லியும் தரமறுத்தார்கள். எனவே "நீ போலீசில் புகார் கொடு ராமா'' என அனைவரும் சொல்லிவிட்டார்கள்.

அப்போது கூட்டத்தில் இருந்த சிறுவன் சதீஷ் எழுந்து, "போலீசுக்கெல்லாம் போக வேண்டாம். நானே தீர்ப்பு சொல்கிறேன்'' என்றான். கூட்டம் மொத்தமும் ஆச்சரியமாக அவனைப் பார்த்தது.

"அவர்கள் நஷ்டஈடு தரமாட்டேன் என்கிறார்கள். நாட்டாண்மையே மேற்கொண்டு என்ன சொல்வதென்று புரியாமல் இருக்கிறார். சிறுவன் நீ என்னடா? தீர்ப்பு சொல்லப்போகிறாய்?...'' என்றார்கள்.

"கரும்பு தோட்டத்திற்கு நான்கு புறமும் சரியாக வேலி அமைத்து இருந்தால் கழுதை நுழைந்திருக்க முடியுமா? வேலி அமைக்காதது யார் தவறு? தோட்டக்காரனின் தவறு. அதனால் நஷ்ட ஈடு யாரும் தர வேண்டியதில்லை'' என்றான் சதீஷ்.

"ஆமாம்... சதீஷ் சொல்வது சரிதான்...'' என்று ஒருவருக்கொருவர் பேசிக் கொண்டனர்.

நாட்டாண்மை கூட்டத்தை அமைதிகாக்கச் சொல்லிப் பேசினார், "சதீஷ் சொல்வதில் நியாயம் இருக்கிறது. உடமைகளுக்கு பாதுகாப்பு ஏற்படுத்திக் கொள்வது அவரவர் பொறுப்புதான். அதை சரிவரச் செய்யாததால்தான் இந்த இழப்பு. எனவே ராமனுக்கு நஷ்ட ஈடு பெற்றுத் தர முடியாது. மேலம் சிறு வயதிலேயே புத்திசாலித்தனமாக செயல்படும் சதீஷின் படிப்புச் செலவை இனி கிராமமே ஏற்றுக் கொள்ளும்'' என்றார். நஷ்ட ஈடு ராமன், தலையை தொங்கவிட்டபடியே நகர்ந்தான்.

கூட்டம் சதீசுக்கு கரகோஷம் எழுப்பி பாராட்டியது.

செல்.பச்சமுத்து