சிலந்தி வலையிலும் பட்டு தயாரிக்கலாம் - பெண் ஆராய்ச்சியாளரின் புதுத் தகவல்

by **சிவா** Tue Jul 31, 2012 6:51 pm

பட்டுப்புழுக்களின் இழைகளில் இருந்து பட்டுப் புடவை தயாராகிறது. அதுபோல் சிலந்தி பின்னும் வலை இழைகளில் இருந்தும் நவீன ரக பட்டுகளை நெய்யலாம் என்று, சிலந்திகளை ஆய்வு செய்யும் பெண் ஆராய்ச்சியாளர் சொல்கிறார்.

அவர் பெயர்: அன்னசுதாதேவி. நாகர்கோவில் ஸ்காட் கிறிஸ்தவக் கல்லூரியின் விலங்கியல் துறை முன்னாள் பேராசிரியை.

இந்த உலகத்தில் வாழும் ஜீவராசிகளில் சிலந்திகள் வித்தியாசமானவை. கட்டிடங்கள், மரங்கள், விவசாய விளைநிலங்களில் வலை பின்னி வாழ்வதால் வலையான் என்றும் சிலந்தி என்றும், எட்டுக்கால்கள் இருப்பதால் எட்டுக்கால் பூச்சி என்றும் பல்வேறு பெயர்களில் சிலந்திகளை அழைக்கிறோம். வீடுகளில் எங்காவது ஒரு மூலையில் சிலந்தி காணப்பட்டால் அதனை கொன்று, வலையையும் அழிப்பது மனித செயல். இது மிகத்தவறானது, மனிதருக்கு உதவும் பூச்சி இனங்களில் சிலந்தியும் ஒன்று என்று கூறுகிறார், பேராசிரியை அன்னசுதாதேவி.

இவர் 27 ஆண்டுகளுக்கு முன்பு, `மனித வாழ்க்கையில் சிலந்திகளின் பங்களிப்பு' என்ற தலைப்பில் சிலந்திகளை ஆய்வு செய்து டாக்டர் பட்டம் பெற்றவர்.

அவர் சொல்கிறார்..

"உலகில் 30 ஆயிரம் வகை சிலந்திகள் உள்ளன. பூச்சியினங்களில் சிலந்தியும், பட்டுப்பூச்சியின் லார்வா ஆகியவை மட்டுமே வலை பின்னி வாழ்கின்றன. சிலந்தியின் வலைகளில் `காப் வலை', `ஆர்ப் வலை', `சீட் வலை', `புனல் வலை' போன்று பல பிரிவுகள் உள்ளன.

விதவிதமாக சிலந்திகள் கூடுகட்டினாலும், அவைகளுக்கு கண் பார்வை கிடையாது. வலையில் ஏற்படும் அதிர்வுகளாலே உணவுப் பொருட்களை கண்டறிகிறது. சிலந்திகள் திரவ உணவை மட்டும் உண்ணுவதால் இரையின் உடலிலுள்ள திரவத்தை உறிஞ்சி தின்னுகிறது.

சிலந்தி தன் வலையில் தனக்கான உணவு ஒன்று வந்து சிக்கிக்கொண்டது என்பதை அறிந்ததும், தனது உடலிலுள்ள விஷம் போன்ற திரவத்தை இரையின் மீது செலுத்தி அதை ஓடவிடாமல் செய்து முடக்கிப்போட்டுவிடும். பின்பு நிதானமாக அந்த இரையை உறிஞ்சும்.

ஆர்ஜியோப்பல்சல்லா வகை சிலந்தி தான் வசிக்கும் வலையை நீளம்- அகலமாக அளவு பார்த்து, அழகாகப் பின்னும். அழகூட்டும் விதத்தில் வலையின் இருபுறமும் வெள்ளை நிறத்தில் நூல் போன்று ஏற்படுத்தி அதன் நடுவில் வாழும். கண் இல்லாத சிலந்திகள் இத்தனை கலைநுட்பத்தோடு வலை பின்னுகிறதே என்ற வியப்பு நமக்கு ஏற்படும். "யூலோபோரஸ்'' என்ற வகை சிலந்தியும் தான் வசிக்கும் வலைக்கூட்டை அழகுப்படுத்தும்.

வலைபின்னத் தெரியாத சில `இளவட்ட சிலந்திகள்' வீடுகளில் துள்ளித் திரிந்து வாழ்வதுடன், வீடுகளில் காணப்படும் ஈயை பிடித்துத் தின்பதால் ஈப்புலி என்று அழைக்கப்படுகிறது. மேலும் வலையில்லாமல் தான்தோன்றி தனமாக திரியும் `ஓநாய் சிலந்தி' தன் இரையை கொடூரமாக வேட்டையாடும். அதாவது இரையின் கழுத்தை கவ்விப்பிடிக்கும்.

பெண் சிலந்திகள் பெரிதாகவும், அழகாகவும், நிறம் கொண்டதாகவும் இருக்கும். ஆண் சிலந்திகள் மிக சிறியவைகளாகவும், நிறமற்றவைகளாகவும் அழகின்றி காணப்படும். எப்போதும் பெண் சிலந்திகளின் அருகிலேயே இருக்கும். இன சேர்க்கைக்குப் பின்பு பெண் சிலந்தி, ஆண் சிலந்தியை திடீரென்று அடித்து உறிஞ்சு தின்றுவிடும்.

சிலந்திகள் முட்டையிட்டு வலைபின்னி அவைகளை மூடி பாதுகாக்கும். இவை கூக்கூன் என்று அழைக்கப்படுகிறது. ஒரு கூக்கூன் உள்ளே 10 முதல் 500 முட்டைகள் வரை இருக்கும். முட்டையைப் பார்த்து அது எந்த சிலந்தி இனம் என்று கண்டுபிடித்துவிடலாம். முட்டையை அடைகாக்கும் சிலந்திகளும் உள்ளன.

கெட்டிரேபோடா வகை சிலந்தி தன்னுடைய கொம்புகளிலும், ஆர்ட்டீமியா என்ற சிலந்தி தன் வாயிலும், காலோரீமானா வகை சிலந்தி தன்னுடைய வலைபின்னும் உறுப்பிலும் முட்டைகளை வைத்து அடைகாக்கிறது.

ஆனைக்காலி அல்லது பூனைக்காலி எனக் கூறப்படும் பெரிய வகை சிலந்தி போய்சிலோதீரியா என்ற இனத்தை சார்ந்ததாகும். இந்த சிலந்தியிடம் சிறிய வகை குருவிகள் சிக்கிக்கொண்டால் பிடித்து தின்றுவிடும். முற்காலத்தில் கோவில்களில் விளக்குகளில் உள்ள எண்ணெய்யை குடித்து இவை வாழ்ந்தன. தற்போது பெரும்பாலும் இவை பனைமரங்களில் வாழ்கின்றன. பனைமரங்களும் அழிந்து வருவதால் இந்த வகை சிலந்திகளும் அழிந்து வருகின்றன.சிலந்தி வலைபின்னும் இழை அதன் வயிற்றுப் பகுதியிலிருந்து வெளிவரும். இது ஒருவகை திரவமாகும். இது காற்றுப்பட்ட உடன் கடினமாகி நூல் இழைபோல் மாறுகிறது. இந்த நூல் மிகவும் கடினமானது. காற்றாலும், மழையாலும் அழியாது. அதிக பலம் வாய்ந்ததாக இருப்பதாதல் மேலைநாடுகளில் இருதய அறுவை சிகிச்சைக்கும், பாரசூட்டுக்கும் சிலந்தி வலையில் தயாரித்த நூலை பயன்படுத்துகிறார்கள். சிறிய வகை தையல் குருவி தான் கூடு கட்டுவதற்கு இலைகளுடன், சிலந்தி வலைகளையும் பயன்படுத்துகிறது.

தற்போது சுற்றுப்புறச் சூழல் பல்வேறு வழிகளில் மாசுபடுகிறது. குறிப்பாக வயல்களில் தெளிக்கும் மருந்துகளால் காற்று மாசுபடுவதுடன் நாம் சாப்பிடும் உணவும் மாசுபடுகிறது. வயல்களில் மருந்துகள் தெளிப்பதை தவிர்த்து சிலந்திகளை வளர்த்தால் பயிர்களை பாதிக்கும் பூச்சிகளை அவை அழித்து விடும். சுற்றுப்புற சூழலும் மாசுபடாது. இது பற்றி விவசாயிகளிடம் விழிப்புணர்வு ஏற்படுத்திவருகிறேன்.

வீட்டில் சிலந்திகளை வளர்த்தால் கொசு, ஈ முதலிய தொற்று நோய்களை பரப்பும் பூச்சிகளை அவை அழித்துவிடும்.

`பிளக்சிபஸ்' என்ற ஒரு வகை சிலந்தி தினமும் பத்து ஈக்களை தின்னும். எனவே நாம் வீடுகளில் பசு, கோழி வளர்ப்பது போல சிலந்திகளையும் வளர்க்க வேண்டும். இதனால் ஆரோக்கியம் மேம்படும்.

என்னுடைய மகன் சீனு கல்லூரி பேராசிரியராக பணியாற்றி வருகிறார். அவரும் இயற்கை ஆர்வலர். எங்கள் வீட்டில் உள்ள மரம், செடி மற்றும் கூடுகளில் நூற்றுக்கணக்கான சிலந்திகள் வளர்த்து வருகிறோம். இவை வீட்டிலுள்ள பூச்சிகளை சாப்பிடுவதால் எங்களுக்கு தொற்று நோய்கள் ஏற்படுவதில்லை.

சிலந்திகள் ஒன்றை ஒன்று தின்றுவிடும். அவைகள் சேர்ந்திருக்காது. ஆனால் `ஸீகோடைபஸ்' வகை சிலந்தி கூட்டுக்குடும்பம் நடத்தி கூட்டமாக வாழ்கிறது. அம்மா, அப்பா, குழந்தைகள் என 100 முதல் 5 ஆயிரம் சிலந்திகள் வரை கூடி ஒரே வலைக் கூட்டில் வாழ்கின்றன. ஒரு குடும்பத்துக்கும் அடுத்த குடும்பத்திற்கும் உறவை ஏற்படுத்தும் விதத்தில் வலைகளை இணைத்துக்கொள்ளவும் செய்யும். இவ்வளவு சிறப்பு மிகுந்த சிலந்தி இனம் அழிந்துவருகிறது. அரசு பாதுகாக்க நடவடிக்கை எடுக்கவேண்டும்.

பட்டுப்பூச்சியிலிருந்து பட்டு நூல் எடுத்து பட்டு புடவைகள் நெய்வது போல், சிலந்தி வலையிலிருந்தும் பட்டு புடவை நெய்யலாம். அதுபற்றி ஆய்வுகளை மேற்கொண்டால் பட்டு தயாரிப்பில் புரட்சியை ஏற்படுத்தலாம். பெண் சமூகத்திற்கும் அற்புதமான ஆடைகள் கிடைக்கும்..'' என்கிறார், முனைவர் அன்னசுதாதேவி.

தினதந்தி!