வண்டு மாற்றி ஊதியதேன்..?

ஒட்டக்கூத்தர், சோழ மன்னனின் அரசவையில் தலைவராக இருந்தார். புகழேந்திப் புலவரும் சோழ மன்னன் அரசவையை அலங்கரித்தார். இரண்டு பெரும் புலவர்களும் தங்கள் இலக்கிய விவாதத்தால் குலோத்துங்க சோழனையும் மற்ற கவிஞர்கள், அறிஞர்களையும் மகிழச் செய்தனர்.

ஒரு நாள் புகழேந்திப் புலவர் தாம் இயற்றிய நளவெண்பாவில் உள்ள பாடல்களைப் பாடி விளக்கமளித்தார். அவற்றில் ஒரு பாடலில் அந்திமாலைப் பொழுதை வர்ணித்திருந்தார். ஒரு பாடலில் அந்திப் பொழுதை அரசனாக உருவகம் செய்துள்ளார். "அரசன் அரசவைக்கு வரும்போது சங்குகள் ஊதும். அதுபோல் மல்லிகை மலர்களைச் சங்காகக்கொண்டு வண்டுகள் ஊதுகின்றன. அரசனுக்கு மெய்க்காப்பாளனாக கரும்புவில் ஏந்திய மன்மதன் வருகிறான். அரசனின் தோளில் மாலை அசைவது போல் முல்லை மலர்ந்திருக்க, அந்திப்பொழுது என்னும் அரசன் ஆட்சி செய்ய வருகிறான்' என்ற பொருளில்,


""மல்லிகையே வெண் சங்கா வண்டூத வான்கரும்பு
வில்லி கணை தெரிந்து மெய்காப்ப - முல்லையெனும்
மென்மாலை தோளசைய மெல்ல நடந்ததே
புன்மாலை அந்திப் பொழுது''


என்று பாடியுள்ளார். புகழேந்திப் புலவர் அந்திப் பொழுதின் அழகைப் பாடி விளக்கம் சொன்னவுடன் ஒட்டக்கூத்தர், ""புகழேந்திப் புலவர் அந்திப்பொழுதின் அழகைப் பாடி விளக்கியது மிக அழகாக இருந்தது. மேலும், சங்கை ஊதுபவன் சங்கின் அடிப்பகுதியில் வாயை வைத்தல்லவா ஊதுவான்; புகழேந்திப் புலவரோ வண்டு மல்லிகையின் மேற்பகுதியில் வாய் வைத்து ஊதியது போல் ரீங்காரம் செய்தது என்றல்லவா பாடியுள்ளார். இது எப்படிப் பொருந்தும்?'' என்று கேட்டார்.

அதற்குப் புகழேந்திப் புலவர், ""ஒட்டக்கூத்தர் கூறியதுபோல் சங்கின் அடிப்பகுதியில் வாய் வைத்துத்தான் ஊத வேண்டும். ஆனால், வண்டு முதலில் மல்லிகையில் உள்ள தேனைக் குடித்துவிட்டது. தேனை "மது' வென்றும் சொல்வார்கள். அதனால், மதுவை உண்ட வண்டு அறிவு மயங்கி, மல்லிகையைச் சங்காகக்கொண்டு ஊதும்போது, அதன் மேல் பகுதி எது? கீழ்ப்பகுதி எது என்று தெரியாமல் மேற்பகுதியைச் ஊதியது போல் ரீங்காரம் செய்தது'' என்று பதில் கூறினார்.

குலோத்துங்க சோழனும் மற்ற கவிஞர்களும் புகழேந்திப் புலவர் கூறிய பொருத்தமான பதிலைக் கேட்டுப் பாராட்டினர்.

புலவர் கி. கிருஷ்ணசாமி