சென்னையில் இலங்கைத் துணைத்தூதரகம் தேவையில்லை - சீமான் சீற்றம்

சென்னை ஆழ்வார்ப்பேட்டையில் இன்று, இலங்கைத் துணைத் தூதரகம் முன்னிலையில்,
இயக்குனர் சீமான் தலைமையிலான நாம் தமிழர் இயக்கத்தினர் ஆர்ப்பாட்டம்
நடத்தினர். இந்த ஆர்ப்பாட்டத்தில், சீமான் உள்ளிட்ட நூற்றுக்கணக்கானோர்
தமிழர்களை கொச்சைப்படுத்திய பேசிய இலங்கை துணை தூதர் வடிவேல்
கிருஷ்ணமூர்த்திக்கு எதிராக கோஷங்கள் எழுப்பி ஆர்ப்பாட்டம் செய்தனர்.
போராட்டத்தில் கலந்து கொண்ட பலரும், விடுதலை புலிகள் தலைவர் பிரபாகரனின்
படங்கள் கொண்ட பேனர், புலி கொடி ஆகியவற்றை ஏந்தியிருந்தனர்.

இந்த ஆர்ப்பாட்டத்தில் கலந்து கொண்டோர் மத்தியில் உரையாற்றிய சீமான்
தனது உரையில், ஈழத் தமிழர்களை பார்ப்பதற்கு அனுமதி வழங்கப்படுமா? எனப்
பத்திரிகையாளர்கள் கேட்டபோது, அதற்குப் பதிலளித்த இலங்கை துணை தூதர்
வடிவேல் கிருஷ்ணமூர்த்தி அது மிருகக் காட்சி சாலை அல்ல என
வாய்க்கொழுப்புடன் பதிலளித்துள்ளார். அது மட்டுமல்லாது, தமிழக மீனவர்கள்
மீது இலங்கை ராணுவம் தாக்குவதாக வெளியான செய்திகள் தவறானது எனவும்
கூறுகிறார். தமிழ்நாட்டுக்கே வந்து தமிழர்களை கொச்சைப்படுத்தும்
விதமாகவும், இழிவுபடுத்தும் விதமாகவும், பேசுகின்ற அவரை இங்கு
தொடர்ந்து பணியாற்ற அனுமதிக்கக்கூடாது.மத்திய அரசும், தமிழக
அரசும், கூட்டாகச் செயற்பட்டு, அவரை உடனடியாக இங்கிருந்து வெளியேற்ற
வேண்டும். தமிழ்நாட்டுக்கு இலங்கை துணை தூதரகம் என்பதே தேவையில்லை.
உண்மையில் தமிழினத்துக்கான ஒரு தூதரகம்தான் சென்னையில் அமைய வேண்டும்.
இலங்கைத் துணைத்தூதர் வடிவேல் கிருஷ்ணமூர்த்தியை வெளியேற்றாவிட்டால்
மாநிலம் தழுவிய அளவில் மிக பெரிய போராட்டங்களை நடத்துவோம் எனவும்
குறிப்பிட்டார்.

மேலும் செய்திகளுக்கு

சீமானுக்கு இன்னும் தமிழகத் தமிழர்கள் ஆதரவளிக்கவில்லை! வெளிநாடுகளில் வாழும் தமிழர்கள்தான் சீமானுக்கு ஆதரவாக செயல்படுகிறார்கள். சீமான் போன்ற தமிழுணர்வாளர்களை மேலும் ஊக்கப் படுத்த வேண்டும்!