இசா மறு ஆய்வு : அரசாங்கம் 18 நாடுகளின் சட்டங்களை ஆராயவிருக்கிறது

இசா என்று அழைக்கப்படும் உள்நாட்டுப் பாதுகாப்புச் சட்ட மறு ஆய்வு தனது முயற்சியின் ஒரு பகுதியாக 18 நாடுகளின் தடுப்புச் சட்டங்களை ஒப்பீட்டு ஆய்வு செய்து வருகிறது.

அந்த நாடுகளில் அமெரிக்காவும் அடங்கும் என்று உள்துறை துணை அமைச்சர் அபு செமான் யூசோப் இன்று கூறினார்.

சிங்கப்பூர், ஆஸ்திரேலியா, தான்சானியா, புருணை, பிரிட்டன், தாய்லாந்து, வங்காள தேசம், அயர்லாந்து, கானா, உகாண்டா, தீமோர் லெஸ்த்தே, தென் கொரியா, மக்காவ், பாஹ்ரெய்ன், இலங்கை ஆகியவை மற்ற நாடுகள் என்று அவர் சொன்னார்.

அமெரிக்காவின் தடுப்புச் சட்டங்களில் 2001 ம் ஆண்டுக்கான விசுவாசச் சட்டம், 2002 ம் ஆண்டுக்கான உள்நாட்டுப் பாதுகாப்புச் சட்டம் ஆகியவை ஆராயப்படும் என்று அவர் தமது அலுவலகத்தில் நிருபர்களிடம் கூறினார்.

நாட்டிற்கு பொருத்தமான வகையில் இசா சட்டம் திருத்தப்படும் என்றும் அபு செமான் கூறினார்.

படையெடுப்பு மருட்டல்

உள்துறை அமைச்சு விவாதம் நடத்தியுள்ள அரசு சாரா அமைப்புக்கள், கல்விமான்கள், பொது மக்கள் ஆகிய எந்தத் தரப்பும் அந்த இசா சட்டம் ரத்துச் செய்யப்பட வேண்டும் என்று கோரவில்லை என்றும் அவர் தெரிவித்தார்.

“அவர்கள் நாடு மற்றும் மக்களுடைய பாதுகாப்புக்காக வைத்திருக்கப்பட வேண்டும் என்றும் ஆனால் மனித உரிமைகள், வெளிப்படையான தன்மை ஆகியவற்றை உறுதி செய்யும் வகையில் அது திருத்தப்பட வேண்டும் என்றும் கேட்டுக் கொண்டனர்”, என்றார் அவர்.

இம்மாதம் அந்தத் திருத்த மசோதா நாடாளுமன்றத்தில் சமர்பிக்கப்படும் வரையில் விவாதங்கள் தொடரும் என்றும் அபு செமான் தெரிவித்தார்.

மூங்கில் அம்புகளைக் கொண்டு இன்று மலேசியா மீது படையெடுக்கப் போவதாக இந்தோனிசியாவைச் சேர்ந்த பெண்டேரா என்று அழைக்கப்படும் பெந்தெங் டெமாக்கரசி ராக்யாட்டின் மிரட்டல் பற்றியும் அவர் கருத்துரைத்தார்.

எந்த ஒரு சூழ்நிலையையும் எதிர்கொள்வதற்கு பாதுகாப்புப் படைகள் விழிப்பு நிலையில் வைக்கப்பட்டிருப்பதாக உள்துறை துணை அமைச்சர் தெரிவித்தார்.

இந்தோனிசியாவுக்கு எதிராக இழைக்கப்படும் தவறுகள் என்று கூறப்படும் அம்சங்களுக்கு “பழி வாங்கும் பொருட்டு” மலேசியா மீது படையெடுக்க பெண்டேரா தயாராகி வருவதாக அறிவிக்கப்பட்டுள்ளது.