பிரணாப் இன்று பதவியேற்பு

நாட்டின் 13-வது குடியரசுத் தலைவராக பிரணாப் முகர்ஜி புதன்கிழமை பதவியேற்கிறார்.

பிரதிபா பாட்டீலின் குடியரசுத் தலைவர் பதவிக்காலம் ஜூலை 25-ம் தேதியுடன் முடிவடைவதையடுத்து புதிய குடியரசுத் தலைவருக்கான தேர்தல் கடந்த 19-ம் தேதி நடைபெற்றது. காங்கிரஸ் கூட்டணியின் சார்பில் மத்திய முன்னாள் நிதியமைச்சர் பிரணாப் முகர்ஜியும், பாஜக கூட்டணி சார்பில் மக்களவை முன்னாள் தலைவர் பி.ஏ.சங்மாவும் போட்டியிட்டனர். ஜூலை 22-ம் தேதி வெளியான தேர்தல் முடிவுகளில் பிரணாப் முகர்ஜி அமோக வெற்றி பெற்றார்.

இதையடுத்து குடியரசுத் தலைவர் பதவியேற்பு விழா, நாடாளுமன்ற மைய மண்டபத்தில் புதன்கிழமை காலை 11.30 மணிக்கு நடக்கிறது. பிரணாப் முகர்ஜிக்கு உச்ச நீதிமன்ற தலைமை நீதிபதி எஸ்.எச். கபாடியா பதவிப் பிரமாணம் செய்துவைக்கிறார். இதைத் தொடர்ந்து பதவியிலிருந்து நிறைவுபெற்றுச் செல்லும் பிரதிபா பாட்டீலின் இருக்கையில் பிரணாப் அமர்வார். பின்னர், பிரணாப் முகர்ஜி பதவியேற்பு உரை நிகழ்த்துவார்.

இந்நிகழ்ச்சியில் குடியரசுத் துணைத் தலைவர் ஹமீது அன்சாரி, பிரதமர் மன்மோகன் சிங், மக்களவை தலைவர் மீரா குமார், காங்கிரஸ் தலைவர் சோனியா காந்தி, பாஜக மூத்த தலைவர் எல்.கே.அத்வானி, மக்களவை எதிர்க்கட்சித் தலைவர் சுஷ்மா ஸ்வராஜ், மேற்குவங்க முதல்வர் மம்தா பானர்ஜி உள்ளிட்ட முக்கிய பிரமுகர்கள் பங்கேற்கின்றனர்.

விழா முடிவில், பிரணாப் முகர்ஜி குடியரசுத் தலைவர் மாளிகைக்கு அழைத்துச் செல்லப்படுவார். அங்கு, அவரிடம் விடைபெற்று துக்ளக் சாலையில் தனக்கு ஒதுக்கப்பட்டுள்ள பங்களாவுக்கு பிரதிபா பாட்டீல் செல்வார். மரியாதை நிமித்தமாக பிரணாப் முகர்ஜியும் பிரதிபா பாட்டீலுடன் செல்வார். புணேயில் பிரதிபா பாட்டீலுக்கு ஒதுக்கப்பட்டுள்ள பங்களா தயாராகும் வரை, அவர் இங்கு தங்கியிருப்பார்.

பாதுகாப்பு ஏற்பாடுகள்: விழாவையொட்டி நாடாளுமன்ற வளாகத்திலிருந்து, குடியரசுத் தலைவர் மாளிகை வரை பலத்த பாதுகாப்பு ஏற்பாடுகள் செய்யப்பட்டுள்ளன. தில்லி வான் எல்லையில் கண்காணிப்புத் தீவிரப்படுத்தப்பட்டுள்ளது. தில்லி மற்றும் சுற்றுவட்டாரப் பகுதிகளில் விமானங்கள் பறக்கத் தடைவிதிக்கப்பட்டுள்ளது. வான் பாதுகாப்பைப் பலப்படுத்த ஓஎஸ்ஏ-ஏகே மற்றும் பெச்சோரா ஏவுகணைகளை இந்திய விமானப் படை தயார் நிலையில் வைத்துள்ளது. சுகோய்-30 மற்றும் மிக் - 21 ரக விமானங்கள் தயார் நிலையில் வைக்கப்பட்டுள்ளன.

dinamani

யார் பதவி பதவியேற்றாலும் நம்ம பிரச்சனைகளை தீர்க்க எதுவும் செய்யபோறது இல்ல