பெண்களின் "மொட்டை' கடிதங்களுக்கு போலீசார் வரவேற்பு: புகார் பெட்டி வைக்க யோசனை

சென்னை:தகவல் தொழில்நுட்ப நிறுவனங்களில் பணி புரியும், பெண்களுக்கு ஏற்படும் பாலியல் தொந்தரவு உள்ளிட்ட பிரச்னைகளை அறிய, ஒவ்வொரு நிறுவனத்தின் வாசலிலும், "புகார் பெட்டி' வைக்க போலீசார் வலியுறுத்தி உள்ளனர். அவற்றில் பாதிக்கப்படும் பெண்கள், பெயர், முகவரி எழுதாமல், "மொட்டை'யாக புகார்களை எழுதிப் போடலாம் என்றும் தெரிவிக்கப் பட்டு உள்ளது.பெண்களை பாதுகாக்கும் வகையில், போலீசார் எடுத்துள்ள இந்த நடவடிக்கை பாராட்டத்தக்க முயற்சி.இது அந்த நிறுவனங்களில் பணிபுரியும் பெண்களிடையே வரவேற்பை பெற்று உள்ளது.

சென்னை, ராஜிவ் காந்தி சாலையில், ஏராளமான தகவல் தொழில்நுட்ப நிறுவனங்கள் உள்ளன. அவற்றில் பல்லாயிரக்கணக்கான பெண்கள், மென்பொருள் பொறியாளர்களாக வேலை செய்கின்றனர். அவர்களுக்கு அலுவலகத்திலும், பணிக்கு செல்லும் வழியிலும், பல்வேறு பிரச்னைகள் ஏற்படுகின்றன.

தொடர் தொந்தரவு:சமீபத்தில், ராஜிவ் காந்தி சாலைக்கு அருகில் உள்ள, ரேடியல் சாலையில் உள்ள நிறுவனத்திற்கு, காரில் சென்ற பெண்ணை, கத்திமுனையில் மிரட்டி, நகைகளை பறித்த, சம்பவம் அரங்கேறியது. இரவில் பணி முடித்து திரும்பும் பெண்களிடம், பாலியல் தொல்லை, கிண்டல் செய்வது, வழிப்பறி போன்ற நிகழ்வுகள் ஆங்காங்கே நடக்கின்றன. பணியிடங்களிலும், வன்முறை சம்பவங்கள் நடக்கின்றன. இவை குறித்து, போலீசாருக்கு, வெளிப்படையாக புகார்கள் தெரிவிப்பதில்லை, என்றாலும் பாதிப்புகள் தொடர்கின்றன.இது குறித்து, போலீசாரின் பார்வைக்கு தகவல்கள் சென்றன. மாநகர போலீஸ் கமிஷனர் திரிபாதி, இது குறித்து, ஆய்வு செய்ய வேண்டும் என, பகுதி வாரியாக, போலீஸ் அதிகாரிகளுக்கு உத்தரவிட்டார்.

கலந்தாய்வு: இதையடுத்து, ரேடியல் சாலையில் உள்ள தகவல் தொழில்நுட்ப நிறுவன வளாகத்தில், சென்னையை சேர்ந்த பல்வேறு தகவல் தொழில்நுட்ப நிறுவனங்களின் மேலாளர்கள், மக்கள் தொடர்பு அலுவலர்கள் ஆகியோருடன் போலீஸ் அதிகாரிகள் நேற்று கலந்தாய்வு நிகழ்ச்சி ஒன்றை நடத்தினர்.

துரைப்பாக்கம், உதவி கமிஷனர், முகமது அஸ்லாம், இதில் பேசியதாவது:ராஜிவ்காந்தி சாலையில் உள்ள ஐ.டி., நிறுவனங்களில், பல்லாயிரக்கணக்கான பெண்கள் பணிபுரிந்து வருகின்றனர். அவர்களுக்கு பல்வேறு இன்னல்கள் ஏற்படுவதாக கூறப்படுகிறது. ஆனால், இது குறித்து புகார்கள் பெருமளவில் வரவில்லை. இருப்பினும், அவர்களுக்கு விழிப்புணர்வு ஏற்படுத்த வேண்டும்.ஐ.டி., நிறுவன பெண்களுக்கு, ஏற்படும் பிரச்னைகள் குறித்து, போலீசாருக்கு, புகார் தெரிவிக்க விரும்பாவிட்டாலும், எந்த வகையிலான பிரச்னைகள் ஏற்படுகின்றன என்பதை தெரிவிக்கும் வகையில், ஒவ்வொரு நிறுவனத்தின் முகப்பிலும், "புகார் பெட்டி' அவசியம் வைக்க வேண்டும். அதில், புகார் தெரிவிப்பவர்கள் தங்களின் பெயர், ஊர் விலாசம் எதையும் எழுத வேண்டியதில்லை. தங்களுக்கு ஏற்பட்ட பிரச்னைகள் என்ன என்பதை மட்டும் தெரிவித்தால் போதும்.இவ்வாறு முகமது அஸ்லாம் பேசினார்.

அறிவுரைகள்: பின்னர் தகவல் தொழில் நுட்ப நிறுவனங்களில் பணிபுரியும் பெண்கள், பாதுகாப்புக்காக கடைபிடிக்க வேண்டிய நடைமுறை குறித்து, போலீசார் விளக்கினர். அதன் விவரமாவது:

* அறிமுகம் இல்லாத நபரின் வாகனங்களில், "லிப்ட்' கேட்டு ஏற வேண்டாம்.

*பணி முடித்து, இரவு நேரத்தில் செல்லும் பெண்கள், தனியாக செல்ல வேண்டாம்.

*குழுவாக இணைந்து செல்ல வேண்டும்.

*ஆட்டோவில் தனியாக பயணிக்கும்போது, பதிவு எண்ணை குறித்துக் கொள்ள வேண்டும்.

* புகார்களை, போலீஸ் அவசர உதவி எண் 100 அல்லது; அந்தந்த போலீஸ் நிலையங்களுக்கு, உடனடியாக தெரிவிக்க வேண்டும்.

*ரேடியல் சாலையில், 24 மணி நேரமும், ரோந்து சுற்றும் போலீசாரிடமும் தகவல் தெரிவிக்கலாம்.

*குறுஞ்செய்தி, இணைய தளத்தின் மூலம் தகவல் தெரிவிக்கலாம்.

இவ்வாறு போலீசார் தெரிவித்துள்ளனர்.

நிகழ்ச்சியின்போது, பெண் கள், எதிரிகளிடம் தப்பிக்கும் வகையில் உருவாக்கப்பட்டுள்ள "பெப்பர் ஸ்பிரே' உள்ளிட்ட சாதனங்கள் குறித்து போலீசார் விளக்கம் அளித்தனர்.

தினமலர்

தன் மானத்திற்கு பங்கம் வரும் பொழுது - இதிலென்ன மொட்டை கடுதாசி?

பிரச்சினை தரவன பிடிச்சு மொட்டை போட்டு கரும்புள்ளி செம்புள்ளி குத்தி கழுதைல ஏத்தி அனுப்ப தைரியமா கடுதாசி போட சொல்ல வேண்டாமோ?