உழைப்பு

பூந்தோட்டம் வண்ண வண்ண பூக்களால் நிறைந்திருந்தது. மலர்கள் பூத்துக் குலுங்கி தலையாட்டி வண்டுகளை வரவேற்றுக் கொண்டிருந்தன.

தேன் சிட்டு ஒன்று, தன் கூரிய அலகால் தேனை உறிஞ்சி குடித்து பசியாறிக் கொண்டிருந்தது. ஒரு அழகிய சிவப்பு ரோஜா, யாரையோ அழைப்பதுபோல சிரித்துக் கொண்டிருந்தது. அப்பொழுது தேனீக்கள் கூட்டமாக அங்கு தேன் சேகரிக்க வந்தன. தேனீக்கள் மலர்ச் சோலையில் இருந்த ஒவ்வொரு பூக்களிலும் அமர்ந்து தேனைப் பருகத் தொடங்கின.

இதைப் பார்த்துக் கொண்டிருந்த தேன்சிட்டு, திடீரென வாய்விட்டு சிரித்தது. இதைக் கவனித்த தேனீ ஒன்று, "ஏ, தேன் சிட்டே... ஏன் எங்களைப் பார்த்து சிரிக்கிறாய்'' எனக் கேட்டது.

"உங்களுடைய அறியாமையை எண்ணிப் பார்த்தேன், சிரிப்பு வந்துவிட்டது'' என்றது தேன்சிட்டு.

"என்ன அறியாமையா? நீ சொல்வது ஒன்றும் புரியவில்லையே. எங்களிடம் என்ன அறியாமை இருக்கிறது?'' என்றது தலைவன் தேனீ.

"புரியும்படி சொல்கிறேன் கேளுங்கள்'' என்ற தேன்சிட்டு, "நீங்கள் கஷ்டப்பட்டு தேன்உறிஞ்சி அதை அடைகளில் சேமித்து வைக்கின்றீர்கள். ஆனால் மனிதர்கள் அதை இலகுவாக எடுத்து ருசித்து விடுகிறார்கள். ஆனாலும், நீங்கள் மீண்டும் மீண்டும் தேனைத் தேடி அலைந்து சேகரிக்கிறீர்களே? இதனால் உங்கள் உழைப்பு வீணாகிறது. நீங்களும் வீணாக அலைந்து கொண்டிருக்கிறீர்கள். அதைத்தான் உங்கள் அறியாமை என்கிறேன்'' என்றது தேன்சிட்டு.

"நீ சொல்வது உண்மைதான், நாங்கள் சேமிக்கும் தேனை மனிதர்கள் ருசிக்கத்தான் செய்கிறார்கள். அதற்காக தேனை சேமிக்காமல் எப்படி வாழ முடியும்'' என்று கேட்டது தேனீ தலைவன்.

"தேன் பூக்களிலேயே இருக்கட்டுமே. உங்களுக்குத் தேவையான நேரம் மட்டும் வந்து ருசித்து விட்டுப் போக வேண்டியதுதானே?'' தேன் சிட்டு யோசனை சொன்னது.

"தேன் சிட்டு நண்பா, நீ தவறாகப் புரிந்து கொண்டிருக்கிறாய். உழைப்பும், சேமிப்பும் இல்லாமல் வாழ்வது வாழ்க்கையே அல்ல. சோம்பேறித்தனம். மனிதர்கள் நாங்கள் சேரிக்கும் தேன்துளிகளைத்தான் திருடுகிறார்கள். ஆனால் அவர்களால் எங்கள் உழைப்பைத் திருட முடியாது.

உன் யோசனைப்படி செயல்பட்டால், உழைப்புக்கு பேர்போன நாங்கள் உருத் தெரியாமல் போய்விடுவோம். சேமிப்புக்கு பெயர் பெற்ற நாங்கள் சிதறுண்டு போவோம். மேலும் எங்கள் முயற்சியால் இயற்கை சுழற்சியாக மகரந்தச் சேர்க்கை நடைபெறுவதும் தடைபடும். அது மலர்களைப் பாதிக்கச் செய்து யாருக்குமே தேன் கிடைக்காமல் செய்துவிடும். இதனால் நாங்கள் மட்டுமல்லாமல் எல்லா ஜீவராசிகளும் பாதிக்கப்படும். எவ்வளவு தேன் சொட்டுக்களை இழந்தாலும் நாங்கள் உழைப்பையும், சேமிப்பையும் கைவிட மாட்டோம். எங்கள் திறமையை மனிதர்களும், உலகும் உணரும்படி செய்வோம்'' என்றது தேனீ தலைவன்.

"நீ சொல்வதும் சரிதான் நண்பா, எதை இழந்தாலும் உழைப்பை நிறுத்தக் கூடாது என்பதை புரிந்து கொண்டேன்'' என்ற தேன்சிட்டு, சிறகடித்து இடத்தை காலி செய்தது.

எஸ்.டேனியல் ஜுலியட்

மனிதர்கள் நாங்கள் சேரிக்கும் தேன்துளிகளைத்தான் திருடுகிறார்கள். ஆனால் அவர்களால் எங்கள் உழைப்பைத் திருட முடியாது