காமராஜர்

நான்
குருசேத்திரத்தில்
குருவானவன்
ஜெருசேலத்தில்
கருவானவன்
உன்
முகக்கண்ணுக்கு தெரியாத
மூச்சுக்காற்று நான்
யுகம் தோறும்
முகம் எனக்கு வேறு
நான் ஒன்றுதான்
நீ
இந்து எனில்
நான் இஸ்லாம்
நீ
இஸ்லாம் எனில்
நான் கிறிஸ்து

சிந்தித்து சிந்தித்து
சிந்தனை சிக்காகிவிட்டதா?
பேனா
பேமாரித்தனம் செய்கிறது
சிந்தனை
சீமத்தனம் செய்கிறதா?
நீ
கருவாவதற்கு முன்பே
கல்லறையானவனை கவியரங்கின்
கருவாக்கிவிட்டார்களே!
சொல்லிவிட்டால்
கொல்லிமலையும்
இடம்பெயர்ந்து வரும்
இவனை இதிகாசமாக்க
உன்
கவிதைகளா இந்த
காவியணியாதவனை
காவியமாக்கப்போகிறது?
அவன் கோவில்

காமராஜ்
கல்கியின்
பொன்னியின் செல்வன்
இல்லை
குமாரசாமியின்
சிவகாமியின் செல்வன்

கோகினூரிலிந்து
கொள்ளையடிக்கப்பட்ட
வைரம் இல்லை
விருதுப்பட்டியிலிருந்து
வெட்டி எடுக்கப்பட்ட
கட்டித்தங்கம்

தமிழுக்கு
தனியிலக்கணம் தந்த
தொல்காப்பியன்
இல்லை
அரசியலுக்கு
அணியிலக்கணம் தந்த
சொல்காப்பியன்

காமத்துப்பால்
கலவாத திருக்குறள்
இதுவரை
அறத்துப்பாலில் இணையாத
அதிகாரம்

பல்கலைக் கழக
பெயர்ப்பலகை மட்டுமல்ல
காமராஜ் - அவன்
கட்டாயபாடமாக வேண்டிய
பாடத்திட்டம்.

காற்றில்
கரைந்து போகும்
கற்பூரமல்ல
காமராஜ்
கப்பலை கரைசேர்த்த
நங்கூரம்
தமிழனுக்கு
கர்வம் தந்த
கம்பீரம்

எல்லையைத்
தாண்டி வந்து
குமரியின்
தாகம் தீர்த்த
தாமிரபரணி

திருவாசகத்தில்
ஒருவாசகம்கூட
பயிலாத
பெருவாசகம்

இந்தியாவின்
பட்டத்து யானை
அவன்
ஆள்காட்டி விரலில்
பிரதமர்களின்
பட்டியல்
ஆடிப்போகும்

காமராஜ்
வெல்ல முடியாத
வெற்றி
மூழ்க முடியாத
ஆழம்
ஏறமுடியாத
உயரம்
கடக்க முடியாத
தூரம்
கணக்கிட முடியாத
எண்ணிக்கை

அவன்
தொண்டுகளை
அடுக்கினால் அதன்
கொண்டையில்
வானம் தட்டும்
இன்றுவரை
பூமி சுற்றிய
சுற்றுகளின் மொத்தம்
அவற்றைப்
புத்தகமாக்க
இந்த பூமியில்
பதிப்பகங்கள்
பத்தாது
அது
தொட்க்கம் தெரியாத
பூமியின் பாதை
பாதியில் நிற்கும்
பாரதியின்
பாஞ்சாலி சபதம்
மீதியைத் தர
மீண்டும் அவனே
வரவேண்டும்

காமராஜ்
வாடகை வீட்டில்
வாழ்ந்த
கொத்தனார்
மாற்றுத்துணி
இல்லாத
நெசவாளி
கருப்பு நிறத்தில்
கரந்த பால்
ஆறடி உயர
திருவிளக்கு
நடை பாதைக்கும்
வெளிச்சம் தந்த
நகராட்சி
தெருவிளக்கு.

-பி.எம்.நாகராஜன்

நன்றி நாகராஜன் மற்றும் பாலா அண்ணே

காமராஜர் பற்றிய கவிதை அருமை
பகிர்வுக்கு நன்றி பாலா சார்

உண்மையில் அவர் ஒரு கர்ம யோகி ! அவர் ஆட்சியின் போது நிறைவேற்றப்பட்ட கல்விக்கான அடிப்படை கட்டமைப்பு ; நீராதாரத்திற்க்கான அடிப்படை கட்டமைப்பு திட்டங்களே இன்று வரை வளர்சிப்பணிக்கானவை ! மிக குறுகிய காலத்தில் சுய லாபம் கமிஷன் கருதாமல் தமிழகத்திற்கு நன்மை செய்தவர் !

உலக அரசியல் வாயிலே பேசிக்கொண்டு கன்னியாகுமரியை தமிழ்நாட்டுடன் இணைக்க சொல்லி இம்சை கொடுத்த ஜீவாவுக்காய் ;தண்ணீர் வளம் மிக்க இடுக்கி மாவட்டத்தை கேரளாவுக்கு விட்டு கொடுத்த ஒரே ஒரு பிழை இன்று ராமநாதபுரம் மாவட்டம் வறட்சியை அடைந்தாலும் அந்த பாவம் ஜீவாவையே சாரும் !

சாகும் வரை சொத்து பந்து மித்திரர் இல்லாமல் கடவுள் ஒருவரையே நம்பி வாழ்ந்த கர்ம யோகி ! உலகம் அவரை புரிந்து கொள்ளாவிட்டாலும் ; மாயைகளை ,அலங்கார பேச்சுகளை நம்பி அவரை ஓரங்கட்டினாலும் ; அவரது மகத்தான பணிக்கு கூலி கடவுளிடத்து நிச்சயம் உண்டு !

அருமை...