கோவை குண்டுவெடிப்பு வழக்கில் 2 பேர் விடுதலை

கோவை தொடர் குண்டு வெடிப்பு வழக்கில், ஆயுள் தண்டனை விதிக்கப்பட்ட இருவரை, சென்னை ஐகோர்ட் விடுதலை செய்தது. கடந்த 1998ம் ஆண்டு கோவையில் நடந்த, தொடர் குண்டு வெடிப்புச் சம்பவத்தில், 58 பேர் பலியாயினர்.


தடை செய்யப்பட்ட அல் - உம்மா இயக்கத் தலைவர் பாஷா, கேரள மக்கள் ஜனநாயக கட்சியின் தலைவர் மதானி உள்ளிட்ட பலர் மீது வழக்கு பதிவு செய்யப்பட்டது. மதானி உள்ளிட்ட எட்டு பேர் விடுதலை செய்யப்பட்டனர். பாஷா உள்ளிட்ட 43 பேருக்கு ஆயுள் தண்டனை விதிக்கப்பட்டது. 2007ம் ஆண்டு அக்டோபர் மாதம், கோவை சிறப்பு கோர்ட் இந்த உத்தரவை பிறப்பித்தது. ஆயுள் தண்டனை விதிக்கப்பட்டவர்களில் முஜிபுர் ரகுமான், அம்ஜத் அலியும் அடங்குவர். சம்பவம் நடக்கும்போது, முஜிபுர் ரகுமானும், அம்ஜத் அலியும் 18 வயது நிரம்பாதவர்கள்.முஜிபுர் ரகுமானுக்கு 16 வயது, 10 மாதங்கள். அம்ஜத் அலிக்கு 17 வயது ஒரு மாதம். இளம் சிறார் சட்டம் 1986ன்படி, 16 வயது வரை பாதுகாப்பு பெறலாம். இவர்கள் இருவரும் 16 வயதை தாண்டி விட்டதால், இளம் சிறார் சட்டத்தின் கீழ் பாதுகாப்பு பெற உரிமையில்லை எனக் கூறி, இவர்கள் மீதான வழக்கை கோவை சிறப்பு கோர்ட் விசாரித்தது. இருவருக்கும் ஆயுள் தண்டனையும் விதிக்கப்பட்டது. இவர்கள் தாக்கல் செய்த அப்பீல் வழக்கு, ஐகோர்ட்டில் விசாரணையில் உள்ளது.





இதற்கிடையில், இவர்கள் தரப்பில் தாக்கல் செய்யப்பட்ட மனு: கடந்த 2000ம் ஆண்டு கொண்டு வரப்பட்ட இளம் சிறார் பாதுகாப்புச் சட்டத்தில், 18 வயது வரை பாதுகாப்பு கோர வகை செய்யப்பட்டது. மேலும், 2007ம் ஆண்டு சில விதிமுறைகளும் கொண்டு வரப்பட்டது. அதன்படி, தண்டனை விதிக்கப்பட்டவர்கள், விசாரணையை எதிர்கொள்பவர்கள், அப்பீல் மனு நிலுவையில் உள்ளவர்கள் 18 வயதை தாண்டிவிட்டால், அவர்களை சிறார் பள்ளியில் வைத்திருக்க வேண்டும்.





23 வயது நிரம்பிய பின், அவர்களை விடுதலை செய்ய வேண்டும் எனக் கூறப்பட்டுள்ளது. இந்த விதிமுறையை சுப்ரீம் கோர்ட் பரிசீலித்து, ஒருவரை விடுதலை செய்துள்ளது. இதன் அடிப்படையில், எங்களையும் விடுதலை செய்ய உத்தரவிட வேண்டும். இவ்வாறு மனுவில் கூறப்பட்டுள்ளது. இம்மனுவை விசாரித்த நீதிபதிகள் பிரபாஸ்ரீதேவன், சத்தியநாராயணன் அடங்கிய, "டிவிஷன் பெஞ்ச்' பிறப்பித்த உத்தரவு: சிறார் பாதுகாப்புச் சட்டத்தின் கீழ், பாதுகாப்பு பெற மனுதாரர்களுக்கு உரிமை உள்ளது. குற்றவியல் நடைமுறைச் சட்டத்தின் கீழ், இவர்களுக்கு எதிராக நடவடிக்கை எடுக்க தகுதியில்லை.





சிறார் பாதுகாப்பு வாரியம், விசாரணை நடத்தியிருக்க வேண்டும். இருவரும் அதிகபட்ச நாட்கள் சிறையில் இருந்துள்ளனர். இந்த வழக்கை, மீண்டும் சிறார் பாதுகாப்பு வாரியத்தின் விசாரணைக்கு அனுப்புவதில் எந்தப் பலனும் இல்லை எனக் கருதுகிறோம். இவர்கள் இருவரையும் விடுதலை செய்ய உத்தரவிடுகிறோம். சிறார் பாதுகாப்புச் சட்டம் கொண்டு வரப்பட்டதன் நோக்கத்தை புரிந்து, தங்களுக்குரிய சமூக பொறுப்பை உணர்வர் என நம்புகிறோம். அப்பீல் மனுக்கள் மீதான விசாரணை நடந்தாலும், சிறார் பாதுகாப்புச் சட்டத்தின் கீழ் பாதுகாப்பு பெற மனுதாரர்களுக்கு உரிமை உள்ளது. வேறு எந்த வழக்கிலும் இவர்களின் காவல் தேவையில்லை என்றால், அவசியமில்லாமல் ஒரு நாள் கூட இவர்கள் காவலில் இருக்க வேண்டியதில்லை. இவ்வாறு "டிவிஷன் பெஞ்ச்' உத்தரவிட்டுள்ளது.